ບົດລາຍງານຫຼ້າສຸດຈາກກະຊວງດັ່ງກ່າວ ໃນວັນ 28 ມິຖຸນາ ຜ່ານມາ ຊີ້ໃຫ້ເຫັນວ່າ: ຈຳນວນເຂດສຸຂະພາບທີ່ໄດ້ຮັບຜົນກະທົບໃນ 3 ແຂວງຂອງ DR Congo ຄື: ອິຕູຣີ, ກີວູເໜືອ ແລະ ກີວູໃຕ້ ໄດ້ເພີ່ມຂຶ້ນເປັນ 35 ແຫ່ງ ໃນວັນທີ 26 ມິຖຸນາ ຜ່ານມາ. ໂດຍເຂດສຸຂະພາບແມ່ນໜ່ວຍງານທີ່ຄຸ້ມຄອງສາທາລະນະສຸກ ແລະ ການດູແລຂັ້ນພື້ນຖານ, ລວມທັງໂຮງໝໍ, ສູນສຸຂະພາບ ແລະ ຊຸມຊົນອ້ອມຂ້າງ.
DR Congo ມີກໍລະນີທີ່ຢືນຢັນຂອງພະຍາດອີໂບລາແລ້ວ 1,274 ຄົນ, ລວມທັງຜູ້ເສຍຊີວິດ 360 ຄົນ, ເຮັດໃຫ້ອັດຕາການເສຍຊີວິດໂດຍລວມແມ່ນ 28.3%. ໃນຂະນະດຽວກັນ, ມີຄົນເຈັບ 178 ຄົນໄດ້ຫາຍດີ ແລະ ມີ 502 ຄົນໄດ້ເຂົ້າຮັກສາໃນໂຮງໝໍ ຫຼື ຖືກກັກຕົວ, ມີຜູ້ສົງໃສຕິດພະຍາດ 239 ຄົນ, ລວມທັງຜູ້ເສຍຊີວິດ 70 ຄົນ.
ກະຊວງດັ່ງກ່າວໄດ້ເນັ້ນໜັກເຖິງສິ່ງທ້າທາຍໃນການຮັບມືກັບການລະບາດ, ລວມທັງການຕໍ່ຕ້ານຂອງຊຸມຊົນໃນການເກັບຕົວຢ່າງຈາກຜູ້ເສຍຊີວິດ, ຂີດຄວາມສາມາດທີ່ບໍ່ພຽງພໍຂອງສູນປິ່ນປົວ, ການຕິດຕາມຜູ້ທີ່ສຳຜັດພະຍາດທີ່ບໍ່ເໝາະສົມ, ການຂາດແຄນຢາ ແລະ ອຸປະກອນປ້ອງກັນທີ່ຈຳເປັນ, ຄວາມບໍ່ປອດໄພ ແລະ ຄວາມຫຍຸ້ງຍາກໃນການເຂົ້າເຖິງບາງພື້ນທີ່ລ້ວນແຕ່ເປັນປັດໄຈທີ່ປະກອບສ່ວນ.
ສຳລັບ 3 ແຂວງທີ່ໄດ້ຮັບຜົນກະທົບຈາກພະຍາດອີໂບລາຄື: ອິຕູຣີ, ກີວູເໜືອ ແລະ ກີວູໃຕ້ ມີປະຊາກອນລວມກັນເກືອບ 15 ລ້ານຄົນ ແລະ ກຳລັງປະເຊີນກັບການຍ້າຍຖິ່ນຖານໃນປະເທດຄັ້ງໃຫຍ່, ລວມທັງການຍົກຍ້າຍຂ້າມຊາຍແດນໄປຍັງປະເທດເພື່ອນບ້ານ.
ຄໍາເຫັນ