ໂດຍ: ແສງຈັນ
ພິທີອັງເຊີນພະພຸດທະຮູບລົງຈາກພັດທະສົມມາ ແລະ ສາລາໂຮງທຳ ໄປສູ່ຫໍໂຮງທຳຕາມປະເພນີທີ່ເຄີຍປະຕິບັດກັນມາແຕ່ບູຮານນະການ ກ່ອນຈະໃຫ້ພຸດທະສາສະນິກະຊົນໄດ້ຫົດສົງ, ໃນການອັງເຊີນພະພຸດທະຮູບໄປສູ່ຫໍໂຮງທຳນັ້ນ ແມ່ນຈະເລີ່ມຈາກການແຫ່ພະພຸດທະຮູບອ້ອມຮອບສິມ ຈຳນວນ 3 ຮອບ ຈາກພະສົງ ສໍາມະເນນ ທີ່ຕາງໜ້າຈາກວັດ 100 ກວ່າວັດພາຍໃນເມືອງໄຊທານີ ແລະ ການນຳພ້ອມດ້ວຍປະຊາຊົນພາຍໃນບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ຈາກນັ້ນຍັງໄດ້ອັງເຊີນພະພຸດທະຮູບໄປສົ່ງຫໍໂຮງສົດ.
ທ່ານ ວຽງຄໍາ ສີຫາໂຄດ ເຈົ້າເມືອງໆໄຊທານີ ໄດ້ໃຫ້ສໍາພາດ ວ່າ: ກິດຈະກຳຄັ້ງນີ້ ມີຄວາມໝາຍສຳຄັນນອກຈາກເປັນກິດຈະກກຳທີ່ສືບທອດກັນມາແຕ່ບູຮານນະການແລ້ວ ຍັງເປັນການເສີມສ້າງຄວາມສາມັກຄີຄວາມເປັນເອກະພາບຂອງພະສົງສຳມະເນນ ລະຫວ່າງວັດພາຍໃນເມືອງ ແລະ ສ້າງຄວາມສາມັກຄີລະຫວ່າງພະສົງສຳມະເນນ ແລະ ພຸດທະສາສະນິກະຊົນໃນການສົ່ງເສີມທະນະທຳ ປະເພນີອັນດີງາມຂອງຊາດ ຊຶ່ງຈຸດປະສົງຂອງການຈັດພິທີໃນຄັ້ງນີ້ ມີ 3 ຈຸດປະສົງຫຼັກ ຄື: ເພື່ອສືບທອດມູນມໍລະດົກ ແລະ ປະເພນີ, ວັດທະນະທໍາອັນດີງາມຂອງຊາດລາວເຮົາ ເວົ້າລວມ, ເວົ້າສະເພາະ ກໍຄືຮີດຄອງປະເພນີອັນດີງາມຂອງຊາວເມືອງໄຊທານີ ເປັນການອະນຸລັກຮັກສາໄວ້ໃຫ້ຮຸ່ນລູກ-ຫຼານ ໄດ້ປົກປັກຮັກສາ, ເພື່ອເປັນການປະກອບສ່ວນເຂົ້າໃນປີທ່ອງທ່ຽວລາວ 2024 ໃຫ້ມີເນື້ອໃນຄວາມໝາຍ ຄວາມສໍາຄັນ ແລະ ເຕັມໄປດ້ວຍບັນຍາກາດແຫ່ງຄວາມເບີກບານມ່ວນຊື່ນ.
ທ່ານ ວຽງຄໍາ ສີຫາໂຄດ ກ່າວຕື່ມວ່າ: ພາຍຫຼັງຈົບພິທີດັ່ງກ່າວ, ຮຽກຮ້ອງມາຍັງເຈົ້າອາທິການວັດ ກໍຄື ພະສົງ-ສໍາມະເນນຢູ່ແຕ່ລະວັດ, ອົງການຈັດຕັ້ງທຸກພາກສ່ວນ ແລະ ປະຊາຊົນ ຊາວເມືອງໄຊທານີ ຈົ່ງໄດ້ນໍາເອົາເນື້ອໃນຈິດໃຈຂອງການຈັດງານໃນຄັ້ງນີ້ ນໍາໄປຈັດຕັ້ງປະຕິບັດຢູ່ຂັ້ນທ້ອງຖິ່ນ, ບ້ານຂອງຕົນ ໃຫ້ຖືກຕ້ອງ, ສອດຄ່ອງຕາມປະເພນີ, ການຫົດສົງ ໃຫ້ຖືກ ກໍຄື ການເຮັດພິທີ ໃຫ້ຮັບປະກັນ ດ້ານເນື້ອໃນ ແລະ ຮູບການ.
ພະອາຈານ ໂສພາ ສີບຸນເຮືອງ ປະທານອົງການພຸດທະສາສະໜາສໍາພັນລາວ (ອພສ) ເມືອງໄຊທານີ ເຈົ້າອາທິການວັດ ວັດພະເຈົ້າໃຫຍ່ໄຊທານີ ສີຣິມຸງຄຸນ, ກ່າວວ່າ: ມື້ນີ້ ວັດພະເຈົ້າໃຫຍ່ໄຊທານີ ສີຣິມຸງຄຸນ, ໄດ້ຈັດພິທີທາງພຸດທະສາສະໜາຕາມຮີດຄອງປະເພນີ ໂດຍມີຄວາມເປັນເອກະພາບ ທົ່ວເມືອງ ໄດ້ຈັດກິດຈະກໍາຂຶ້ນທີ່ວັດ ແຫ່ງນີ້ ຊຶ່ງໄດ້ອັງເຊີນພະພຸດທະຮູບລົງສົງ ແລະ ເພື່ອຮັດແໜ້ນຄວາມສາມັກຄີ, ເຕົ້າໂຮມປວງຊົນທົ່ວເມືອງ ໃຫ້ເປັນນໍ້າໜຶ່ງໃຈດຽວກັນ ແລະ ເພື່ອເປັນການສືບທອດພະພຸດທະສາສະໜາໃຫ້ເຕັມຮູບແບບ ແລະ ເປັນຮູບແບບໃຫ້ພະສົງ ອົງຄະເຈົ້າທົ່ວເມືອງມີຄວາມເປັນເອກະພາບ ແລະ ສືບທອດຕໍ່ໆໄປ.
ພາຍຫຼັງອັງເຊີນພະພຸດທະຮູບລົງສູ່ຫໍໂຮງທຳ, ພະສົງສຳມະເນນ ແລະ ພຸດທະສາສະນິກະຊົນທີ່ເຂົ້າຮ່ວມກໍໄດ້ພ້ອມພາກັນນຳເອົານໍ້າສະອາດທີ່ໄດ້ປຸງແຕ່ງຈາກດອກໄມ້, ນໍ້າຫອມ ຫົດສົງພະພຸດທະຮູບ ແລະ ພິທີບາສີສູ່ຂວັນ ຕາມປະເພນີທີ່ສືບທອດກັນມາ ເພື່ອຄວາມເປັນສິຣິມົງຄຸນແກ່ຕົນເອງ ແລະ ຄອບຄົວ.
ຄໍາເຫັນ