ແມ່ນພາກສ່ວນໜຶ່ງຂອງສື່ມວນຊົນປະຕິວັດລາວ ທີ່ໄດ້ຮັບການສ້າງຕັ້ງຂຶ້ນໃນວັນທີ 20 ມັງກອນ 1965 ຢູ່ທີ່ເມືອງວຽງໄຊ ແຂວງຫົວພັນຖານທີ່ໝັ້ນການປະຕິວັດ, ໃນທ່າມກາງແປວໄຟສົງຄາມຕໍ່ສູ້ກັບຈັກກະພັດຜູ້ຮຸກຮານ. ມີມູນເຊື້ອອັນສະຫງ່າລາສີໃນການເປັນເຄື່ອງມືໂຄສະນາສຶກສາອົບຮົມໃຫ້ນາຍ ແລະ ພົນທະຫານ ກໍຄືປະຊາຊົນຊັ້ນຄົນຕ່າງໆມີນ້ຳໃຈຮັກຊາດ, ຄຽດແຄ້ນສັດຕູ ແລະ ປຸກລະດົມມານະຈິດໃນການສູ້ຮົບຕໍ່ສູ້ກູ້ຊາດ, ປະກອບສ່ວນເຂົ້າໃນໄຊຊະນະລວມຂອງຊາດໃນເມື່ອກ່ອນ ກໍຄືໃນພາລະກິດປົກປັກຮັກສາ ແລະ ພັດທະນາປະເທດຊາດຢ່າງສົມກຽດ.
ປັດຈຸບັນໜັງສືພິມກອງທັບ ເປັນກອງເອກະລາດ ແລະ ເປັນກອງວິຊາສະເພາະ ເຮັດໜ້າທີ່ສື່ມວນຊົນ, ຜະລິດສື່ສິ່ງພິມທີ່ຢູ່ພາຍໃຕ້ການຊີ້ນໍາໂດຍກົງຮອບດ້ານຈາກກົມໃຫຍ່ການເມືອງກອງທັບ ແລະ ຊີ້ນໍາດ້ານເນື້ອໃນທິດທາງໂຄສະນາຈາກກົມໂຄສະນາອົບຮົມ, ມີພາລະບົດບາດໜ້າທີ່ເປັນປາກກະບອກສຽງຂອງຄະນະພັກກະຊວງ ແລະ ກະຊວງປ້ອງກັນປະເທດ ໃນການເຄື່ອນໄຫວວຽກງານແນວຄິດ-ວັດທະນະທໍາຢູ່ໃນກອງທັບ ດ້ວຍການໂຄ ສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ສຶກສາອົບຮົມໃຫ້ປະຊາຊົນບັນດາເຜົ່າມີແນວຄິດ ແລະ ການກະທໍາທີ່ຖືກຕ້ອງຕາມແນວທາງຂອງພັກ, ສ່ອງແສງຄວາມມຸ່ງມາດປາຖະໜາຂອງມະຫາຊົນ, ການພັດທະນາເສດຖະກິດ-ສັງຄົມ, ສ່ອງແສງວຽກດີຄົນເດັ່ນ, ວຽກຈິງຄົນແທ້ ປະກອບສ່ວນຕ້ານປະກົດການຫຍໍ້ທໍ້ໃນສັງຄົມ, ຕອບໂຕ້ການໂຄສະນາບິດເບືອນໃສ່ຮ້າຍປ້າຍສີຂອງພວກອິດທິກໍາລັງປໍລະປັກ. ນອກນີ້ຍັງເປັນເວທີໃຫ້ແກ່ມະຫາຊົນໃນການສະແດງອອກເຖິງວິໄສທັດອັນມອງກວ້າງເຫັນໄກຂອງພັກ ຕໍ່ອະນາຄົດອັນໃສແຈ້ງຂອງປະເທດຊາດ, ເປັນແຫຼ່ງຂໍ້ມູນຂ່າວສານ, ສາລະໜ້າຮູ້ ແລະ ຄວາມບັນເທີງ...ຍ້ອນແນວນັ້ນ, ໃນໄລຍະຜ່ານມາ ກໍຄືປັດຈຸບັນ ໜັງສືພິມກອງທັບປະຊາຊົນລາວ ໄດ້ເອົາໃຈໃສ່ພັດທະນາຕົນເອງຢູ່ສະເໝີ ດ້ວຍການປັບປຸງຮູບແບບແຜນການໂຄສະນາໃຫ້ມີຫຼາຍຊ່ອງທາງ, ປັບປຸງບັນດາຄໍລໍາໃຫ້ແທດເໝາະກັບສະພາບການ, ດ້ານເນື້ອໃນສັ້ນ-ກະທັດຮັດມີຂໍ້ມູນຄົບຖ້ວນ ແລະ ເລິກເຊິ່ງ ສ່ອງແສງໄດ້ຂະບວນການປົກປັກຮັກສາ ແລະ ສ້າງສາພັດທະນາປະເທດຊາດ, ການເຕີບໃຫຍ່ຂະຫຍາຍຕົວຂອງກອງທັບຕາມທິດສ້າງກອງທັບໃຫ້ມີລະບຽບແບບແຜນ ແລະ ທັນສະໄໝ ໂດຍເລັ່ງໃສ່ຂະບວນການສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ, ການສ້າງກົມກອງວັດທະນະທໍາ-ນັກຮົບວັດທະນະທໍາ, ຂະບວນການຮໍ່າຮຽນການເມືອງ, ເຝິກແອບການທະຫານ, ຂະບວນການປັບປຸງກໍ່ສ້າງກົມກອງ, ການທໍາການຜະລິດແກ້ໄຂຊີວິດການເປັນຢູ່ຂອງພະນັກງານ-ນັກຮົບ ແລະ ຂະບວນການອື່ນໆທີ່ປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ກະຊວງປ້ອງກັນປະເທດວາງອອກ.
ໜັງສືພິມກອງທັບ ນອກຈາກຜະລິດສື່ສິ່ງພິມຂອງຕົນແລ້ວ ຍັງຜະລິດໜັງສືພິມເອເລັກໂຕຣນິກ ຫຼື ເວັບໄຊ ມີທັງພາສາລາວ ແລະ ພາສາອັງກິດ, ໃນຕໍ່ໜ້ານີ້ ຍັງມີແຜນການອອກເປັນພາສາຫວຽດນາມ ພ້ອມນັ້ນກໍໄດ້ສ້າງແຟນເພສ ເຟສບຸກ: Lao People’s Army News ໂດຍໄດ້ເພີ່ມຄຣິບວິດີໂອເຂົ້າຕື່ມ ທັງນີ້ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານໂຄສະນາອົບຮົມໃນລະໄລຍະໃໝ່. ສະເພາະໃນ 6 ຕົ້ນປີ 2024 ນີ້, ສາມາດສະໜອງຂ່າວພາຍໃນໄດ້ 3.960 ຂ່າວ, ຂ່າວຕ່າງປະເທດ 1.215 ຂ່າວ, ບົດ 720 ບົດ, ຮູບພາບ 4.270 ຮູບ ແລະ ເຄື່ອນໄຫວເກັບກໍາຂ່າວ 1.785 ເທື່ອຄັ້ງ.
ເພື່ອເຮັດສໍາເລັດໜ້າທີ່ການເມືອງຂອງຕົນໃນຕໍ່ໜ້ານີ້, ໜັງສືພິມກອງທັບ ຈະສືບຕໍ່ປັບປຸງທາງດ້ານເນື້ອໃນໃຫ້ມີຄວາມອຸດົມສົມບູນ ໂດຍນໍາສະເໜີບັນຫາທີ່ສັງຄົມໃຫ້ຄວາມສົນໃຈເພີ່ມຂຶ້ນ, ຮັບປະກັນຄວາມຖືກຕ້ອງຊັດເຈນ, ບໍ່ຜິດພາດທາງດ້ານການເມືອງ, ສະເໜີຂ່າວໃຫ້ວ່ອງໄວທັນເວລາ, ປັບປຸງວີທີການນໍາສະເໜີຂ່າວ, ຮູບແບບໂຄງສ້າງຂ່າວທີ່ກະທັດຮັດກົງກັບປະເດັນ, ຫຼາກຫຼາຍ, ປະດິດສ້າງ ແລະ ຊວນອ່ານ; ຈັດຕັ້ງແລກປ່ຽນບົດຮຽນລະ ຫວ່າງນັກຂ່າວຮຸ່ນອາວຸໂສກັບນັກຂ່າວຮຸ່ນໃໝ່, ສື່ຂອງກອງທັບກັບສື່ມວນຊົນອ້ອມຂ້າງສູນກາງ ໃນການຂຽນຂ່າວ, ຂຽນບົດ, ຖ່າຍຮູບ ແລະ ດ້ານເຕັກນິກການຈັດໜ້າອອກແບບໃຫ້ເຂົ້າສູ່ຫຼັກການ ແລະ ມີຈຸດພິເສດເດັ່ນສະເພາະຂອງໜັງສືພິມກອງທັບ; ສືບຕໍ່ສ້າງນັກຂ່າວຢູ່ບັນດາກົມກອງທ້ອງຖິ່ນໃຫ້ມີລະດັບການຂຽນດີຂຶ້ນເລື້ອຍໆ ແລະ ສົ່ງຂ່າວປ້ອນໜັງສືພິມກອງທັບໃຫ້ຫຼາຍຂຶ້ນ; ປັບປຸງໜ້າເວັບໄຊໃຫ້ທັນສະໄໝ ມີເນື້ອໃນດີ, ບັນຈຸຫຼາຍຄໍລຳ ແລະ ເພີ່ມບັນດາກົດໝາຍທີ່ກ່ຽວຂ້ອງກັບກອງທັບ ແລະ ກົດໝາຍອື່ນໆທີ່ສຳຄັນເຂົ້າໃນເວັບໄຊໜັງສືພິມກອງທັບ.
ເນື່ອງໃນໂອກາດວັນສື່ມວນຊົນ ແລະ ການພິມຈຳໜ່າຍ ຄົບຮອບ 74 ປີ, ຕາງໜ້າຄະນະບັນນາທິການ ແລະ ພະນັກງານ-ນັກຂ່າວໜັງສືພິມກອງທັບປະຊາຊົນລາວ ຂໍອວຍພອນໄຊອັນປະເສີດແດ່ຜູ້ນຳພັກ-ລັດ, ການນຳກະຊວງປ້ອງກັນປະເທດ ແລະ ປະຊາຊົນລາວບັນດາເຜົ່າທຸກຖ້ວນໜ້າຈົ່ງມີສຸຂະພາບແຂງແຮງ, ສືບຕໍ່ນໍາພາ-ຊີ້ນໍາ ແລະ ພັດທະນາສື່ມວນຊົນລາວໃຫ້ກ້າວຂຶ້ນ, ສື່ມວນຊົນກອງທັບປະຊາຊົນລາວ ຂໍເປັນສ່ວນໜຶ່ງປະກອບ ສ່ວນເຂົ້າໃນພາລະກິດສ້າງສາພັດທະນາປະເທດຊາດໃຫ້ມີຄວາມມັ່ງຄັ່ງເຂັ້ມແຂງ, ສັງຄົມມີຄວາມສະຫງົບສຸກ,ເສດຖະກິດຂະຫຍາຍຕົວດີຂຶ້ນຢ່າງຕໍ່ເນື່ອງ, ວັດທະນະທຳ-ສັງຄົມໄດ້ຮັບການອະນຸລັກຮັກສາ ແລະ ຊີວິດຄວາມເປັນຢູ່ຂອງປະຊາຊົນນັບມື້ດີຂຶ້ນ.
ຄໍາເຫັນ