ພາຍໃຕ້ການນຳພາຂອງພັກເຮັດໃຫ້ລາວໂທລະຄົມເຕີບໃຫຍ່ເຂັ້ມແຂງທາງດ້ານປະລິມານ ແລະ ຄຸນນະພາບ

 ບໍລິສັດ ລາວໂທລະຄົມມະນາຄົມມະຫາຊົນ ໄດ້ສະແດງຄວາມຮູ້ສຶກຕໍ່ວັນດັ່ງກ່າວວ່າ:ພາຍໃຕ້ການນໍາພາທີ່ສະຫຼາດສ່ອງໃສຂອງພັກປະຊາຊົນ ປະຕິວັດລາວຕະຫຼອດໄລຍະ 70 ປີຜ່ານມາ, ໂດຍການສືບທອດພາລະກິດຈາກພັກກອມມູນິດອິນດູຈີນຊຶ່ງແມ່ນປະທານ ໄກສອນ ພົມວິຫານ ເປັນຫຼັກແຫຼ່ງ ແກ່ນສານໃນການນໍາພາກໍ່ຕັ້ງ, ຖະນຸບໍາລຸງ, ຝຶກຝົນຫຼໍ່ຫຼອມ, ກໍ່ສ້າງ ແລະ ປັບປຸງໃຫ້ ໜັກແໜ້ນ, ເຂັ້ມແຂງ ຢ່າງບໍ່ຢຸດຢັ້ງ.

ສະຫາຍ ສຸພົນ ຈັນທະວີໄຊກ່າວວ່າ:ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ ພັກປະຊາຊົນປະຕິວັດລາວ ໄດ້ສືບຕໍ່ນໍາພາປະຊາຊົນລາວບັນດາເຜົ່າ ປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຄວາມສົມບູນພູນສຸກຂອງປະຊາຊົນລາວບັນດາເຜົ່າ ແລະ ເພື່ອອຸດົມການສັງຄົມນິຍົມ. ຜົນງານອັນໃຫຍ່ຫຼວງ ແລະ ພົ້ນເດັ່ນໃນໄລຍະໃໝ່ນີ້ ພັກເຮົາໄດ້ມີການຫັນປ່ຽນໃໝ່ໃນການນໍາພາຂອງຕົນ ໃຫ້ສອດຄ່ອງກັບສະພາບຄວາມເປັນຈິງຂອງປະເທດ ແລະ ສາກົນ ດ້ວຍການວາງແນວທາງປ່ຽນແປງໃໝ່ຢ່າງຮອບດ້ານທີ່ມີຫຼັກການຂອງພັກ ຊຶ່ງສາມາດປົກປັກຮັກສາຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດໄວ້ໄດ້ຢ່າງໝັ້ນຄົງ, ເສດຖະກິດ-ສັງຄົມ ໄດ້ຂະຫຍາຍຕົວຕໍ່ເນື່ອງ ຕາມທິດຫັນເປັນອຸດສາຫະກໍາທັນສະໄໝ, ສິດເປັນເຈົ້າຂອງປະຊາຊົນລາວບັນດາເຜົ່າ ໄດ້ຮັບການເສີມຂະຫຍາຍ ແລະ ເປີດກວ້າງອອກໃນສັງຄົມ, ຄວາມສາມັກຄີເປັນເອກະພາບ ພາຍໃນພັກ ແລະ ຄວາມເປັນປຶກແຜ່ນທົ່ວປວງຊົນລາວທັງຊາດ ນັບມື້ໄດ້ຮັບການປັບປຸງດີຂຶ້ນ,ບົດບາດ ອິດທິພົນ ຂອງປະເທດຊາດ ໄດ້ຮັບການເຊີດຊູສູງຂຶ້ນໃນເວທີພາກພື້ນ ແລະ ສາກົນ.

ສະຫາຍ ສຸພົນ ຈັນທະວີໄຊກ່າວຕື່ມວ່າ:ພາຍໃຕ້ການນໍາພາ-ຊີ້ນໍາ ຮອບດ້ານຂອງອົງຄະນະພັກ ກະຊວງເຕັກໂນໂລຊີ ແລະ ການສື່ສານ ຮາກຖານພັກພວກເຮົາ ໄດ້ຮັກສາ ແລະ ເສີມຂະຫຍາຍ ບົດບາດການເປັນເສນາທິການໃຫ້ກະຊວງເຕັກໂນໂລຊີ ແລະ ການສື່ສານ ເພື່ອໃຫ້ບໍລິການໂທລະຄົມມະນາຄົມ,ຜ່ານການຈັດຕັ້ງປະຕິບັດ ລລທ ໄດ້ເອົາໃຈໃສ່ ແລະ ເຮັດສໍາເລັດ 4 ວຽກສໍາຄັນທີ່ເປັນບຸລິມະສິດຄື:ສ້າງອົງກອນໃຫ້ເປັນດີຈີຕອນ,ພັດທະນາລະບົບການບໍລິຫານຈັດການພາຍໃນໃຫ້ເປັນດີຈີຕອນ,ຊຸກຍູ້ສົ່ງເສີມນໍາໃຊ້ນະວັດຕະກໍາໃໝ່ ແລະ ພັດທະນາລະບົບໃຫ້ເປັນ ດີຈີຕອນແລະ ພັດທະນາບຸກຄະລາກອນ ດີຈີຕອນ, ດໍາເນີນ 8 ແຜນວຽກຈຸດສຸມຄື:ການພັດທະນາວຽກງານບໍລິຫານໃຫ້ເປັນທັນສະໄໝ,ການພັດທະນາວຽກງານຈັດຕັ້ງ,ວຽກງານກວດກາພາຍໃນໃຫ້ເປັນມາດຕະຖານສາກົນ, ຄຸ້ມຄອງວຽກງານເສດຖະກິດ-ການເງິນ, ພັດທະນາວຽກງານການຕະຫຼາດ-ການຂາຍ, ພັດທະນາວຽກງານເຕັກນິກ ແລະ ພັດທະນາເຄືອຂ່າຍ, ການຮ່ວມມືທາງດ້ານ Inter Business ແລະ ການເຊື່ອມໂຍງຕ່າງປະເທດ ແລະ ວຽກງານ ບໍລິສັດ ລາວໂມບາຍມັນນີ ແລະ ປະຕິບັດ 17 ແຜນງານ ແລະ 20 ໂຄງການ,ນອກຈາກປະຕິບັດໜ້າທີ່ຍຸດທະສາດ,ຄະນະພັກພວກເຮົາ ຍັງໄດ້ເອົາໃຈໃສ່ວຽກງານການກໍ່ສ້າງພັກທາງດ້ານການເມືອງ-ແນວຄິດ ຖືເປັນວຽກບຸລິມະສິດ ເພື່ອໃຫ້ຖັນແຖວສະມາຊິກພັກ ໄດ້ຮັບການສຶກສາຮໍ່າຮຽນອຸດົມການຂອງພັກ, ທັດສະນະຫຼັກໝັ້ນຊົນຊັ້ນ, ທິດສະດີມາກ-ເລນິນ, ແນວຄິດໄກສອນ ພົມວິຫານ, ແນວທາງການເມືອງຂອງພັກ, ທາດແທ້ມູນເຊື້ອຂອງພັກ, ລວມທັງບັນດາ ມະຕິ, ຄຳສັ່ງຂອງພັກໃຫ້ຖັນແຖວສະມາຊິກພັກຢ່າງທົ່ວເຖິງ ດ້ວຍຫຼາຍຮູບການ-ຫຼາຍວິທີການ, ສຸມໃສ່ຊຸກຍູ້ຂະບວນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ໂຄສະນາອົບຮົມ ເພື່ອອົບຮົມເປົ້າໝາຍມະຫາຊົນຜູ້ກ້າວໜ້າຂະຫຍາຍເຂົ້າພັກ.

ໃນໂອກາດດັ່ງກ່າວ,ສະຫາຍ ສຸພົນຈັນທະວີໄຊໄດ້ຕາງໜ້າຄະນະພັກຮາກຖານ-ຄະນະອໍານວຍການ,ສະມາຊິກພັກ-ພະນັກງານ ບໍລິສັດ ລາວໂທລະຄົມມະນາຄົມ ມະຫາຊົນ ຂໍຈົດຈໍາ ແລະ ຮູ້ບຸນຄຸນຢ່າງສູງ ຕໍ່ພັກປະຊາຊົນປະຕິວັດລາວ ແລະ ຂໍອວຍພອນໄຊອັນປະເສີດ ມາຍັງການນໍາພັກ-ລັດ ຈົ່ງມີສຸຂະພາບເຂັ້ມແຂງ, ມີຜົນສໍາເລັດໃນໜ້າທີ່ວຽກງານ, ສືບຕໍ່ເປັນຫຼັກແຫຼ່ງແກ່ນສານໃນການນໍາພາ-ຊີ້ນໍາ ການພັດທະນາປະເທດຊາດໃຫ້ກ້າວຂຶ້ນສູ່ຈຸດໝາຍສັງຄົມນິຍົມເທື່ອລະກ້າວ.