ພາຍໃຕ້ກົດໝາຍຂອງອົສຕຣາລີ, ບໍລິສັດເຕັກໂນໂລຊີທີ່ສຳຄັນເຊັ່ນ: Apple, Google, Meta ແລະ Microsoft ຕ້ອງລາຍງານຕໍ່ຄະນະກຳມະການທຸກໆ 6 ເດືອນກ່ຽວກັບວິທີການຈັດການເນື້ອໃນ ແລະ ແກ້ໄຂບັນຫາການລ່ວງລະເມີດທາງເພດເດັກໃນແພລັດຟອມຂອງພວກເຂົາ. ຢ່າງໃດກໍຕາມ, ຄະນະກຳມະການໄດ້ພົບເຫັນຊ່ອງຫວ່າງໃນການແກ້ໄຂບັນຫາການຂູດຮີດທາງເພດໃນຫຼາຍແພລັດຟອມ, ໂດຍສະເພາະແມ່ນການນຳໃຊ້ເຕັກໂນໂລຊີທີ່ຍັງບໍ່ທົ່ວເຖິງເຊັ່ນ: ເຄື່ອງມືວິເຄາະພາສາທີ່ສາມາດກວດພົບຂໍ້ຄວາມຂົ່ມຂູ່ທີ່ໃຊ້ໃນການຂູດຮີດທາງເພດ. ໃນຂະນະທີ່ບາງ ແພລັດຟອມຍັງຂາດຊ່ອງທາງທີ່ຊັດເຈນ ແລະ ເຂົ້າເຖິງໄດ້ງ່າຍສຳລັບຜູ້ໃຊ້ໃນການລາຍງານເຫດການດັ່ງກ່າວ.
ທ່ານ ຈູລີ ອິນແມນ ແກຣນ ກຳມະການຄວາມປອດໄພທາງເອເລັກໂຕຣນິກ ກ່າວວ່າ: ການຂູດຮີດທາງເພດມັກຈະແນໃສ່ຊາຍໜຸ່ມ, ໂດຍຜູ້ກະທຳຜິດຈະລໍ້ລວງຜູ້ເຄາະຮ້າຍໃຫ້ສົ່ງຮູບພາບສ່ວນຕົວກ່ອນທີ່ຈະຮຽກຮ້ອງເງິນ ຊຶ່ງການຂູດຮີດປະເພດນີ້ບໍ່ພຽງແຕ່ແນໃສ່ກຸ່ມທີ່ມີຄວາມສ່ຽງເທົ່ານັ້ນ ແຕ່ຍັງສົ່ງຜົນກະທົບຕໍ່ສະຫວັດດີພາບທາງຈິດໃຈ ແລະ ອາລົມຂອງຜູ້ເຄາະຮ້າຍ, ເຊັ່ນດຽວກັນກັບຄອບຄົວຂອງເຂົາເຈົ້າ.
ໃນປີ 2025, ຄະນະກຳມະການ ແລະ ສະຖາບັນອາຊະຍາກຳອົສຕຣາລີ ໄດ້ເຜີຍແຜ່ບົດລາຍງານທີ່ລະບຸວ່າ 11.3% ຂອງໄວໜຸ່ມອົສຕຣາລີອາຍຸລະຫວ່າງ 16-18 ປີໄດ້ປະສົບກັບການຂົ່ມຂູ່ທາງເພດ.
ຄໍາເຫັນ