ໂດຍ: ພູວັນ
ໄອປາ (AIPA) ໃນຖານະທີ່ເປັນອົງການນິຕິບັນຍັດ ທັງເປັນຕົວແທນແຫ່ງສິດ ແລະ ຜົນປະໂຫຍດຂອງບັນດາປະເທດສະມາຊິກອາຊຽນ ໃນການຊຸກຍູ້ສົ່ງເສີມການຮ່ວມມືພາຍໃນອາຊຽນ ແລະ ອາຊຽນກັບພາຍນອກ ໂດຍສະເພາະການສ້າງກົດໝາຍ, ການສະໜອງຂໍ້ມູນດ້ານນິຕິກຳ, ການໃຫ້ສັດຕະຍາບັນແກ່ສົນທິສັນຍາ ແລະ ຊຸກຍູ້ການຈັດຕັ້ງປະຕິບັດແຜນດໍາເນີນງານຕ່າງໆໃນຂອບການຮ່ວມມືອາຊຽນຢ່າງຕັ້ງໜ້າ ປະກອບສ່ວນເຂົ້າໃນຂະບວນການສ້າງປະຊາຄົມອາຊຽນໃຫ້ນັບມື້ນັບມີຄວາມເຂັ້ມແຂງ, ມີຄວາມສາມັກຄີ ແລະ ເປີດກວ້າງຮັດແຄບຄວາມແຕກໂຕນທາງດ້ານການພັດທະນາ ແລະ ຍົກລະດັບຊີວິດການເປັນຢູ່ຂອງປະຊາຊົນອາຊຽນໃຫ້ດີຂຶ້ນເປັນກ້າວໆ.
ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ໄດ້ກ່າວປາໄສຕໍ່ພິທີເປີດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ໃນວັນທີ 19 ຕຸລານີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນວ່າ: ກອງປະຊຸມສະມັດຊາໃຫຍ່ໄອປາ ແມ່ນເວທີໜຶ່ງທີ່ມີຄວາມໝາຍຄວາມສຳຄັນຍິ່ງ, ຊຶ່ງສະມາຊິກລັດຖະສະພາຈາກບັນດາປະເທດອາຊຽນຈະໄດ້ຮ່ວມກັນຄົ້ນຄວ້າປຶກສາຫາລື ແລະ ກຳນົດທິດທາງການດຳເນີນງານເພື່ອບັນລຸຈຸດປະສົງ ແລະ ຄາດໝາຍລວມຂອງໄອປາ ກໍຄືອາຊຽນ ຄືດັ່ງທີ່ພວກເຮົາຮູ້ນຳກັນແລ້ວວ່າ ໄອປາໃນນາມທີ່ເປັນອົງການນິຕິບັນຍັດ ແລະ ເປັນຕົວແທນແຫ່ງລັດຂອງປະຊາຊົນປະເທດສະມາຊິກອາຊຽນ ໂດຍມີຈຸດປະສົງຕົ້ນຕໍ ເພື່ອຊຸກຍູ້ພາລະກິດລວມຂອງອາຊຽນໃຫ້ບັນລຸຜົນປະໂຫຍດຕາມເປົ້າໝາຍທີ່ວາງໄວ້ ຊຶ່ງກອງປະຊຸມຄັ້ງນີ້ໄດ້ກໍານົດຄຳຂວັນ: “ ບົດບາດຂອງລັດຖະສະພາໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ” ສອດຄ່ອງກັບຄຳຂວັນປະທານອາຊຽນຂອງ ສປປລາວ ຄື: “ເພີ່ມການເຊື່ອມຈອດ ແລະ ຄວາມເຂັ້ມແຂງອາຊຽນ” ໂດຍສຸມໃສ່ການຈັດຕັ້ງປະຕິບັດວິໄສທັດປະຊາຄົມອາຊຽນໃນປີ 2025 ເພື່ອເຮັດໃຫ້ພາກພື້ນມີິການເຊື່ອມຈອດ ແລະ ເຂັ້ມແຂງ ທັງເປັນການຊຸກຍູ້ສົ່ງເສີມຄວາມພະຍາຍາມຂອງບັນດາປະເທດສະມາຊິກອາຊຽນໃນການບັນລຸເປົ້າໝາຍດ້ານການພັດທະນາພື້ນຖານໂຄງລ່າງ ແລະ ລະບຽບການຕ່າງໆທີ່ມີການເຊື່ອມຈອດທາງດ້ານການຂົນສົ່ງ, ໂທລະຄົມມະນາຄົມ, ພະລັງງານ ແລະ ອື່ນໆ ເພື່ອອໍານວຍຄວາມສະດວກໃຫ້ແກ່ການຄ້າ, ການລົງທຶນ, ການຜະລິດ, ການບໍລິການ, ການທ່ອງທ່ຽວ ແລະ ການໄປມາຫາສູ່ກັນຂອງປະຊາຊົນອາຊຽນໃຫ້ຫຼາຍຂຶ້ນ, ການເຊື່ອມໂຍງທາງດ້ານເສດຖະກິດ ການຮັດແຄບຄວາມແຕກໂຕນທາງດ້ານການພັດທະນາ, ສ້າງເສດຖະກິດອາຊຽນມີຄວາມເຂັ້ມແຂງ, ເປີດກວ້າງ, ປະຊາຄົມມີຄວາມສາມັກຄີປອງດອງ, ມີການພັດທະນາທີ່ເທົ່າທຽມກັນ ແລະ ການເສີມຂະຫຍາຍການພົວພັນຮ່ວມມືອາຊຽນ ກັບຄູ່ຮ່ວມມືພາຍນອກ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ແລະ ພ້ອມກັນກ້າວໄປຂ້າງໜ້າ.
ທ່ານ ທອງລຸນ ສີສຸລິດ ກ່າວໃຫ້ຮູ້ອີກວ່າ: ກອງປະຊຸມຄັ້ງນີ້ເຫັນວ່າມີຄວາມສຳຄັນ ແລະ ສອດຄ່ອງກັບຄວາມພະຍາຍາມລວມຂອງອາຊຽນ ໃນການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ຄວາມພະຍາຍາມຂອງ ສປປ ລາວ ທີ່ຈະຫັນຈາກປະເທດທີ່ບໍ່ມີຊາຍເເດນຕິດກັບທະເລ ເປັນປະເທດເຊື່ອມໂຍງ-ເຊື່ອມຈອດໃນພາກພື້ນ ພ້ອມທັງສອດຄ່ອງກັບເປົ້າໝາຍການພັດທະນາແບບຍືນຍົງໃນປີ 2030 ຂອງບັນດາປະຊາຊາດ ແນໃສ່ໃຫ້ພວກເຮົາທຸກຄົນກ້າວໄປພ້ອມກັນ ຊຶ່ງຈະເປັນໂອກາດດີໃຫ້ພວກເຮົາສະແດງຄວາມຄິດເຫັນ, ວິໄສທັດ ແລະ ແລກປ່ຽນທັດສະນະຂອງຕົນຢ່າງກົງໄປກົງມາ ແລະ ສ້າງສັນ ເພື່ອແນໃສ່ຮັດແໜ້ນການຮ່ວມມື ແລະ ກຳນົດທິດທາງໃນຕໍ່ໜ້າສຳລັບວຽກງານ AIPA ເພື່ອສືບຕໍ່ປະກອບສ່ວນເຂົ້າໃນການສ້າງປະຊາຄົມອາຊຽນໃຫ້ມີການເຊື່ອມຈອດ ແລະ ເຂັ້ມແຂງກວ່າເກົ່າ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນຂອງບັນດາປະເທດສະມາຊິກອາຊຽນຢ່າງທົ່ວເຖິງ.
ຄໍາເຫັນ