ທ່ານ ນາງ ສອນທິດາ ອຸນາພົມ ປະທານບໍລິສັດພັດທະນາແຫຼ່ງທ່ອງທ່ຽວນໍ້າຕົກຕາດເຍືອງ ບ້ານຫຼັກ 40 ເມືອງປາກຊ່ອງ ແຂວງຈໍາປາສັກ ຈຳກັດຜູ້ດຽວ ໄດ້ປະກອບຄໍາເຫັນຕໍ່ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX ໃນວັນທີ 9 ກັນຍາຜ່ານມາ ໂດຍຍົກໃຫ້ເຫັນວຽກງານຊຸກຍູ້ສົ່ງເສີມ, ການສ້າງຄວາມເຂັ້ມແຂງທາງດ້ານເສດຖະກິດ ຕິດພັນກັບການທ່ອງທ່ຽວທາງດ້ານວັດທະນະທຳ ແລະ ທຳມະຊາດ ຕິດພັນກັບການພັດທະນາຮູບແບບປະຊາຊົນມີສ່ວນຮ່ວມ ສີຂຽວ ແລະ ຍືນຍົງ ໂດຍປະຕິບັດຕາມແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ ໂດຍສະເພາະນະໂຍບາຍເປີດກວ້າງປີທ່ອງທ່ຽວລາວ 2024 ທີ່ ສປປ ລາວ ໄດ້ເປັນເຈົ້າພາບທ່ອງທ່ຽວອາຊຽນ ກໍຄືແຜນຍຸດທະສາດການພັດທະນາວຽກງານການ ທ່ອງທ່ຽວຕິດພັນກັບກະສິກຳສະອາດ, ປະຊາຊົນມີສ່ວນຮ່ວມສີຂຽວ ແລະ ຍືນຍົງຂອງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ກະຊວງວັດທະນະທໍາ ແລະ ການທ່ອງທ່ຽວ ວທ), ແຂວງໄດ້ປະກອບສ່ວນສຳຄັນເຂົ້າໃນການຈັດຕັ້ງປະຕິບັດຍົກລະດັບຄຸນນະພາບດ້ານການບໍລິການ, ຍົກສູງກຳລັງແຮງຢ່າງຕັ້ງໜ້າດ້ານບຸກຄະລາກອນທີ່ຕິດພັນກັບປະຊາຊົນ; ໃນທຸກກິດຈະກຳພັດທະນາຕະຫຼາດກັບທີ່ ໂດຍປະຕິບັດຕາມທິດ 3 ອ ຄື: “ ສ້າງໂອກາດ, ມີໂອກາດ ແລະ ໃຫ້ໂອກາດ” ໃຫ້ປະຊາຊົນພາຍໃນບ້ານ, ເມືອງ ກໍຄືແຂວງຈຳປາສັກ ແລະ ແຂວງໃກ້ຄຽງ ມີສ່ວນຮ່ວມໃນການຊື້-ຂາຍ, ແລກປ່ຽນສິນຄ້າກະສິກຳ, ຫັດຖະກຳ, ແກະສະຫຼັກ, ຈັກ ສານ, ການປູກຝັງ-ລ້ຽງສັດເພື່ອສ້າງລາຍຮັບໃຫ້ຄອບຄົວແກ້ໄຂຄວາມທຸກຍາກ ເຮັດໃຫ້ປະຊາຊົນມີຄວາມເຂັ້ມແຂງ ແລະ ຍືນຍົງ ໂດຍໄດ້ເອົາໃຈໃສ່ໃນການເຕົ້າໂຮມຄວາມສາມັກຄີ ປຸກລະດົມຂົນຂວາຍປະຊາຊົນໃນເຂດພັດທະນາ, ຊຸກຍູ້ໃຫ້ເຂົາເຈົ້າມີສ່ວນຮ່ວມພັດທະນາຢ່າງຕໍ່ເນື່ອງ; ເປັນເຈົ້າການຮ່ວມກັນສ້າງວຽກເຮັດງານທຳ, ຊຸກຍູ້ນໍາພາ-ຊີ້ນຳເຂົາເຈົ້າ, ເສີມຂະຫຍາຍຫົວຄິດປະດິດສ້າງອັນໃໝ່ໆ ຈາກນ້ອຍໄປຫາໃຫຍ່ຕາມກຳລັງແຮງຂອງແຕ່ລະຄອບຄົວໄປພ້ອມກັບການບໍລິການ ແລະ ພັດທະນາແຫຼ່ງທ່ອງທ່ຽວຕາມວິຖີຂອງປະຊາຊົນ ແລະ ຊຸມຊົນໃນຂົງເຂດກະສິກຳສະອາດ, ສີຂຽວ ແລະ ຍືນຍົງ. ນັບແຕ່ປີ 2012 ບໍລິສັດໄດ້ເຂົ້າໄປລົງທຶນ ພັດທະນາເລີ່ມມີການປັບປຸງສະຖານທີ່, ຍົກລະດັບຄຸນນະພາບພື້ນຖານໂຄງລ່າງຕ່າງໆເຊັ່ນ: ເສັ້ນທາງ, ໄຟຟ້າ ແລະ ຍົກລະດັບອາຫານ, ການປຸງແຕ່ງຕາມລະດູການມີເອກະລັກທ້ອງຖິ່ນ, ພື້ນບ້ານ, ພື້ນເມືອງທີ່ໂດດເດັ່ນເພື່ອຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດໃຫ້ເຂົາເຈົ້າໄດ້ສຳຜັດກັບກິ່ນອາຍວັດທະນະທຳການກິນອາຫານ ແລະ ສຳຜັດກັບທຳມະຊາດ, ປ່າໄມ້ສີຂຽວ, ນ້ຳຕົກຕາດທີ່ສວຍສົດງົດງາມ, ບັນຍາກາດທີ່ສົດຊື່ນ ແລະ ມີກິດຈະກຳຫຼາກຫຼາຍສ້າງຄວາມສົນໃຈໃຫ້ຜູ້ມາທ່ຽວຊົມໄດ້ຮຽນຮູ້ທາງດ້ານວັດທະນະທໍາລາວທີ່ມີເອກະ ລັກສະເພາະ ເຮັດໃຫ້ສະຖານທີ່ກາຍເປັນຈຸດໝາຍປາຍທາງຂອງນັກທ່ອງທ່ຽວທັງພາຍໃນ ແລະ ຕ່າງປະເທດອະນຸພາກພື້ນສາກົນ ເປັນສະຖານທີ່ທ່ອງທ່ຽວອັນໂດດເດັ່ນແຫ່ງໜຶ່ງຂອງສປປ ລາວ, ພ້ອມນັ້ນ. ບໍລິສັດຍັງໄດ້ສົ່ງເສີມໃຫ້ປະຊາຊົນລ້ຽງໄກ່ລາດພື້ນເມືອງ, ຄັດເລືອກແມ່ພັນໄກ່ ແລະ ຜະລິດຫົວອາຫານໄກ່ທີ່ເມືອງຄົງເຊໂດນ, ແປຮູບປີ້ງໄກ່ເປັນລະບົບຢູ່ເມືອງລະຄອນເພັງ, ເມືອງຕຸ້ມລານ, ເມືອງເລົ່າງາມ ແຂວງສາລະວັນ ສ້າງມູນຄ່າເພີ່ມ ແລະ ຄຸນນະພາບໃໝ່ ເຮັດໃຫ້ປະຊາຊົນຫຼາຍບ້ານທີ່ໄດ້ເຂົ້າຮ່ວມໄດ້ຮັບການພັດທະນາເປັນຢ່າງດີ ແລະ ຍັງໄດ້ຂະຫຍາຍຕື່ມໄປເມືອງວາປີ ເພື່ອສົ່ງເສີມການຟື້ນຟູການລ້ຽງໄກ່ລາດພື້ນເມືອງເປັນລະບົບ; ເມືອງຄົງເຊໂດນດຳເນີນການສ້າງຕັ້ງກຸ່ມລ້ຽງໄກ່ລາດພື້ນເມືອງສະໝອງໃຫ້ບ້ານນາປົ່ງ ເມືອງຄົງເຊໂດນ. ປັດຈຸບັນ, ການລ້ຽງໄກ່ແບບເປັນຟາມ, ການຄ້າຂາຍມີບັນຍາກາດຟົດຟື້ນ ແລະ ມີຕະຫຼາດກວ້າງຂວາງ ສາມາດຂາຍໄດ້ປະມານ 2-3 ພັນໂຕຕໍ່ມື້. ນອກຈາກນັ້ນ, ຍັງໄດ້ຈັດຕັ້ງກອງທຶນໃຫ້ກັບກຸ່ມບ້ານນາປົ່ງ, ສົ່ງເສີມໃຫ້ສະມາຊິກ ສ້າງຄວາມເຂັ້ມແຂງດ້ານເຕັກນິກວິຊາການ, ທັດສະນະສຶກສາ, ຝຶກອົບຮົມການປຸງແຕ່ງອາຫານທີ່ເປັນເອກະ ລັກທ້ອງຖິ່ນ ໂດຍການຊຸກຍູ້ສົ່ງເສີມການມີສ່ວນຮ່ວມຂອງສູນກາງສະຫະພັນແມ່ຍິງລາວ. ໃນນັ້ນ, ບໍລິສັດຍັງສະໝອງຕູ້ຟັກໄຂ່ໃຫ້ 5 ເມືອງ ພ້ອມອຸປະກອນຈຳນວນໜຶ່ງ, ເຄື່ອງຫຸ້ມຫໍ່ທີ່ທັນສະໄໝ-ມີມາດຕະຖານ, ອຸ ປະກອນເຄື່ອງຈັກປຸງແຕ່ງອາຫານຂະໜາດນ້ອຍ ພາຍໃຕ້ໂຄງການຮ່ວມມືລະຫວ່າງບໍລິສັດ ແລະ ຄູ່ຮ່ວມພັດທະນາບ້ານໃກ້ເຮືອນຄຽງ.
ທ່ານ ນາງ ສອນທິດາ ອຸນາພົມ ໃຫ້ຮູ້ວ່າ: ໃນປີ 2019 ແຫຼ່ງທ່ອງທ່ຽວໄດ້ຖືກອຸທົກກະໄພ ໄພພິບັດທຳມະຊາດ "ພາຍຸໂພດຸນ" ແລະ ການລະບາດຂອງພະຍາດຈຶ່ງເຮັດໃຫ້ປິດບໍລິການຮອບດ້ານ ເຮັດໃຫ້ພວກເຮົາໄດ້ຮັບຜົນກະທົບຢ່າງໜັກໜ່ວງ, ມາຮອດຕົ້ນປີ 2023. ໃນທ່າມກາງວິກິດການດັ່ງກ່າວ, ຄອບຄົວໄດ້ມີແນວຄວາມຄິດລິເລີ່ມເຕົ້າໂຮມສ້າງຂະບວນການຜະລິດສະບຽງອາຫານກັບທີ່ ເພື່ອມາສະໜອງໃຫ້ພຽງພໍກັບການກິນຢູ່ປະຈຳວັນຂອງພະນັກງານ ກໍຄືຄອບຄົວປະຊາຊົນເກືອບ 70 ຄົນ, ສ້າງເປັນກຳລັງການຜະລິດ ແລະ ກ້າວໄປເຖິງການສ້າງຕັ້ງກຸ່ມປູກພືດຜັກປອດສານພິດບ້ານຫຼັກ 40 ເມືອງປາກຊ່ອງ. ມາຮອດປັດຈຸບັນມີ 60 ກວ່າຄອບຄົວ, ບໍລິສັດໄດ້ເປັນຜູ້ຄໍ້າປະກັນລາຄາ ແລະ ເປັນຕະຫຼາດກັບທີ່ໃຫ້ຊຸມຊົນໃກ້ຄຽງມາຈໍາໜ່າຍຜະລິດ ຕະພັນ, ສະໝອງໃຫ້ຮ້ານອາຫານປຸງແຕ່ງເປັນອາຫານລາວທີ່ມີເອກະລັກໃຫ້ນັກທ່ອງທ່ຽວ. ຈາກຜົນສໍາເລັດດັ່ງກ່າວ, ພວກເຮົາໄດ້ຮັບຄວາມເຊື່ອໝັ້ນໄວ້ວາງໃຈຈາກຂັ້ນເທິງ, ໄດ້ຮັບການສະໜັບສະໜູນສົ່ງເສີມຮອບດ້ານຈາກສູນກາງ ກໍຄືທ້ອງຖິ່ນ, ຄະນະພັກອຳນາດການປົກຄອງບ້ານ ແລະ ອື່ນໆ, ພິເສດຄະນະພັກ, ຄະນະນຳ ແຂວງຈຳປາສັກ ກໍຄືພະແນກ ວທ ແຂວງ ເຮັດໃຫ້ພວກເຮົາໄດ້ຮັບຫຼຽນໄຊ, ໃບຍ້ອງຍໍ ແລະ ການຢັ້ງຢືນມາດຖານຄຸນນະພາບ, ລາງວັນຈາກພາກພື້ນ ແລະ ສາກົນຫຼາຍລາງວັນເຊັ່ນ: ລາງວັນມາດຕະຖານຫ້ອງນໍ້າສາທາລະນະສະອາດອາຊຽນ ປະຈຳປີ 2019-2021 ທີ່ຮ່າລອງເບ ສສ ຫວຽດນາມ; ລາງວັນພັດທະນາແຫຼ່ງທ່ອງທ່ຽວດີເດັ່ນ ແລະ ຍືນຍົງຂອງ ສປປ ລາວ ປະຈໍາປີ 2019 ທີ່ ສປປ ລາວ; ລາງວັນນັກທຸລະກິດດີເດັ່ນຂະແໜງການຈ້າງງານອາຊຽນດີເດັ່ນແຫ່ງ ສປປ ລາວ ປະຈໍາປີ 2021; ລາງວັນການທ່ອງທ່ຽວແບບປະຊາຊົນມີສ່ວນຮ່ວມຍືນຍົງອາຊຽນ ປະຈຳປີ 2022 ທີ່ປະເທດກຳປູເຈຍ; ລາງວັນມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມອາຊຽນ ປະຈຳປີ 2023 ທີ່ ສປປ ລາວ; ລາງວັນການທ່ອງທ່ຽວແບບປະຊາຊົນມີສ່ວນຮ່ວມຍືນຍົງອາຊຽນປີ 2024 ແລະ ລາງວັນຫ້ອງນໍ້າສາທາລະນະສະອາດອາຊຽນ ປະຈຳປີ 2025 ທີ່ປະເທດອິນໂດເນເຊຍ.
ຄໍາເຫັນ