ນາຍົກລັດຖະມົນຕີລາວ ຢ້ຽມຂໍ່ານັບ ປະທານາທິບໍດີ ຣັດເຊຍ

ໃນໂອກາດນີ້, ທ່ານນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງຄວາມຂອບໃຈຢ່າງຈິງໃຈຈາກ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ມາຍັງ ທ່ານ ວະລາດີເມຍ ປູຕິນ ຕໍ່ການຕ້ອນຮັບຢ່າງອົບອຸ່ນ ແລະ ສົມກຽດ ໃນໂອກາດຢ້ຽມຢາມ ຢູ່ ສ ຣັດເຊຍ ໃນວັນທີ 31 ກໍລະກົດ ຜ່ານມາ. ທ່ານນາຍົກລັດຖະມົນຕີ ແຫ່ງ ສປປ ລາວ ໄດ້ສະແດງຄວາມຊົມເຊີຍ ຜົນສໍາເລັດການຢ້ຽມຢາມທາງການ ທີ່ມີຄວາມໝາຍຄວາມສໍາຄັນຊຶ່ງປີ2025 ເປັນປີແຫ່ງການສ້າງຕັ້ງສາຍພົວພັນການທູດ ລະຫວ່າງ ລາວ-ຣັດເຊຍ ຄົບຮອບ 65 ປີ. ພ້ອມດຽວກັນນີ້, ກໍໄດ້ແຈ້ງໃຫ້ຊາບຕື່ມອີກວ່າ ຈະນໍາເອົາເນື້ອໃນຈິດໃຈ ກໍຄືຜົນຂອງການພົບປະສອງຝ່າຍ, ລວມທັງບັນດາເອກະສານທີ່ໄດ້ລົງນາມຮ່ວມກັນໄປຈັດຕັ້ງປະຕິບັດໃຫ້ສໍາເລັດຕາມຄາດໝາຍທີ່ວາງໄວ້ ເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນສອງປະເທດ. ໃນໂອກາດດຽວກັນນີ້, ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍຢ່າງຈິງໃຈ ແລະ ຕີລາຄາສູງຕໍ່ບົດບາດຂອງ ຣັດເຊຍ ທີ່ສ້າງຕັ້ງເວທີປຶກສາຫາລືເສດຖະກິດຕາເວັນອອກນີ້ຂຶ້ນ ແລະ ຈັດຂຶ້ນໃນທຸກໆປີ ເລີ່ມແຕ່ປີ 2015 ເປັນຕົ້ນມາ ຊຶ່ງຖືວ່າເປັນກົນໄກໜຶ່ງທີ່ມີປະສິດທິຜົນສູງໃນການສົ່ງເສີມການພົວພັນຮ່ວມມືດ້ານເສດຖະກິດຂອງພາກພື້ນ ກໍຄືຂອງໂລກ ແລະ ໄດ້ສະແດງຄວາມຂອບໃຈ ຝ່າຍຣັດເຊຍ ທີ່ໄດ້ເຊື້ອເຊີນການນຳຂັ້ນສູງຂອງລາວ ເຂົ້າຮ່ວມເປັນແຂກສຳຄັນໃນກອງປະຊຸມ ຄົບຮອບ 10 ປີ ທີ່ຈັດຂຶ້ນໃນປີ 2025 ນີ້.

ນອກຈາກນີ້, ທ່ານນາຍົກລັດຖະມົນຕີ ແຫ່ງ ສປປ ລາວ ກໍໄດ້ມີໂອກາດໄປຢ້ຽມຢາມ ນັກຮຽນ-ນັກສຶກສາລາວ ທີ່ກໍາລັງສຶກສາຢູ່ ໂຮງຮຽນນ້ອງນ້ອຍ ຊູວໍຣົບ ເມືອງ ອູຊູຣິ ເພື່ອພົບປະໂອ້ລົມ, ໃຫ້ທິດຊີ້ນໍາ ແລະ ກໍາລັງໃຈຕໍ່ບັນດານັກຮຽນ-ນັກສຶກສາ ໃຫ້ມີຄວາມຕັ້ງໃຈຮໍ່າຮຽນໃຫ້ສໍາເລັດ ເພື່ອນໍາເອົາຄວາມຮູ້-ຄວາມສາມາດ ກັບຄືນມາຮັບໃຊ້ ແລະ ປະກອບສ່ວນເຂົ້າໃນການສ້າງສາພັດທະນາປະເທດຊາດໃນອະນາຄົດ.