 |
ໃນກອງປະຊຸມຄັ້ງນີ້, ທ່ານນາຍົກລັດຖະມົນຕີ ແຫ່ງ ສປປ ລາວ ໄດ້ຮັບການເຊື້ອເຊີນເຂົ້າຮ່ວມໃນນາມເປັນແຂກກິດຕິມະສັກຂອງ ທ່ານ ວະລາດີເມຍ ປູຕິນ ປະທານາທິບໍດີ ສ ຣັດເຊຍ ແລະ ໄດ້ຂຶ້ນກ່າວປາໄສ ພ້ອມທັງ ຕອບຄໍາຖາມໃນກອງປະຊຸມພາກຄົບຄະນະຮ່ວມກັບ ປະທານາທິບໍດີ ວາລາດີເມຍ ປູຕິນ ແລະ ແຂກການນຳຂັ້ນສູງຈາກມົງໂກລີ ແລະ ສປ ຈີນ.
ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ຍົກໃຫ້ເຫັນເຖິງ ສະພາບການຂອງພາກພື້ນ ແລະ ສາກົນ ທີ່ສົ່ງຜົນກະທົບຕໍ່ລະບົບໂຄງສ້າງເສດຖະກິດຂອງໂລກ ຊຶ່ງໄດ້ຮຽກຮ້ອງໃຫ້ປະເທດຕ່າງໆ ຍົກສູງການຮ່ວມມື ແລະ ແກ້ໄຂບັນຫາຮ່ວມກັນ ຜ່ານກົນໄກການປຶກສາຫາລື ແລະ ກົນໄກຫຼາຍຝ່າຍ ບົນພື້ນຖານການເຄົາລົບ ຊຶ່ງກັນ ແລະ ກັນ, ແລະ ສອດຄ່ອງກັບກົດໝາຍສາກົນ. ພ້ອມດຽວກັນນັ້ນ, ທ່ານ ນາຍົກລັດຖະມົນຕີ ຍັງໄດ້ຍົກໃຫ້ເຫັນເຖິງບົດບາດຄວາມສໍາຄັນຂອງ ສ ຣັດເຊຍ ໃນເວທີສາກົນ ແລະ ຄວາມສໍາຄັນຂອງການຮ່ວມມືຫຼາຍຝ່າຍ ໃນການປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ກ້າວໄປສູ່ການສ້າງຄວາມສົມບູນພູນສຸກຂອງພາກພື້ນໃນຕໍ່ໜ້າ. ນອກຈາກນັ້ນ, ທ່ານ ຍັງໄດ້ຍົກໃຫ້ເຫັນ ການຮ່ວມມື ລະຫວ່າງ ສປປ ລາວ ແລະ ສ ຣັດເຊຍ ໃນໄລຍະຜ່ານມາ ກໍຄືປັດຈຸບັນ ໃນຖານະເປັນຄູ່ຮ່ວມຍຸດທະສາດ ແລະ ຄົບຮອບ 65 ປີ ແຫ່ງການສ້າງສາຍພົວພັນການທູດ ລາວ-ຣັດຊຍ ໃນປີ 2025 ນີ້. ຄຽງຄູ່ກັນນັ້ນ, ໄດ້ຍົກໃຫ້ເຫັນການປະຕິບັດນະໂຍບາຍການເຊື່ອມຈອດພາກພື້ນຂອງ ສປປ ລາວ ໃນການຫັນປະເທດທີ່ບໍ່ມີຊາຍແດນຕິດກັບທະເລ ໄປສູ່ການເປັນປະເທດເຊື່ອມໂຍງ-ເຊື່ອມຈອດໃນພາກພື້ນ ທີ່ມີຄວາມຄືບໜ້າເປັນກ້າວໆມາ.
 |
ເວທີປຶກສາຫາລືເສດຖະກິດຕາເວັນອອກ ແມ່ນລິເລີ່ມໂດຍ ສ ຣັດເຊຍ ໄດ້ຮັບການສ້າງຕັ້ງຂຶ້ນແຕ່ປີ 2015 ເປັນຕົ້ນມາ ແລະ ໄດ້ຈັດຂຶ້ນທຸກໆປີ ຢູ່ເມືອງວະລາດີວັດສະຕົກ ຊຶ່ງຖືວ່າເປັນເວທີທີ່ສໍາຄັນ ແລະ ເປັນກົນໄກໜຶ່ງທີ່ມີປະສິດທິຜົນສູງ ໃນການສົ່ງເສີມວຽກງານການຮ່ວມມືດ້ານເສດຖະກິດຂອງພາກພື້ນກໍຄືຂອງໂລກ ໂດຍສະເພາະແມ່ນການສົ່ງເສີມດ້ານການຄ້າ, ການລົງທຶນ ແລະ ການປະກອບສ່ວນຊຸກຍູ້ດ້ານການພັດທະນາໃນຂົງເຂດຕ່າງໆ. ເວທີການປຶກສາຫາລືດັ່ງກ່າວ ແມ່ນໄດ້ເປີດໂອກາດໃຫ້ແກ່ຜູ້ວາງນະໂຍບາຍທັງພາກລັດ ແລະ ເອກະຊົນ ເຂົ້າຮ່ວມເປັນຈໍານວນຫຼວງາຍໃນແຕ່ລະປີ ເພື່ອແລກປ່ຽນວິໄສທັດດ້ານການພັດທະນາ ແລະ ປຶກສາຫາລື ກ່ຽວກັບ ບັນຫາຕ່າງໆ ທີ່ເປັນສິ່ງທ້າທາຍດ້ານເສດຖະກິດຂອງພາກພື້ນ ແລະ ສາກົນ.
ໃນໂອກາດເຂົ້າຮ່ວມກອງປະຊຸມເສດຖະກິດຕາເວັນອອກຄັ້ງນີ້, ທ່ານ ສອນໄຊ ສີພັນດອນ ຍັງໄດ້ເຂົ້າຢ້ຽມຂໍ່ານັບ ທ່ານ ວະລາດີເມຍ ປູຕິນ ປະທານາທິບໍດີ ແຫ່ງ ສ ຣັດເຊຍ ເພື່ອສືບຕໍ່ຊຸກຍູ້ການພົວພັນຮ່ວມມືສອງຝ່າຍ; ໄດ້ເຂົ້າຮ່ວມ ແລະ ເປັນປະທານກອງປະຊຸມເວທີປຶກສາຫາລືພາກທຸລະກິດ ສປປ ລາວ - ສ ຣັດເຊຍ ເພື່ອສົ່ງເສີມການພົວພັນຮ່ວມມືດ້ານເສດຖະກິດ ລະຫວ່າງ ສອງປະເທດ ໃຫ້ນັບມື້ຂະຫຍາຍຕົວຫຼາຍຂຶ້ນ; ໄດ້ໃຫ້ສຳພາດ ຕໍ່ສື່ມວນຊົນຂອງຣັດເຊຍ ເພື່ອໂຄສະນານະໂຍບາຍ ສົ່ງເສີມການພົວພັນຮ່ວມມືຂອງ ສປປ ລາວ ກັບປະເທດຕ່າງໆ ໂດຍສະເພາະແມ່ນນະໂຍບາຍສົ່ງເສີມການຄ້າ ແລະ ການລົງທຶນຂອງ ສປປ ລາວ; ແລະ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ໄອວານ ໂປລຢາຄົບ (Ivan Polyakov) ປະທານສະພາທຸລະກິດຣັດເຊຍ - ອາຊຽນ ແລະ ນັກສຶກສາລາວ ທີ່ກຳລັງສຶກສາຢູ່ມະຫາວິທະຍາໄລຂອງເມືອງດັ່ງກ່າວ.
 |
ການເຂົ້າຮ່ວມກອງປະຊຸມເວທີປຶກສາຫາລືເສດຖະກິດຕາເວັນອອກ ຄັ້ງທີ 10 ນີ້ ແມ່ນໄດ້ຮັບການຕ້ອນຮັບຢ່າງອົບອຸ່ນ ແລະ ປະສົບຜົນສໍາເລັດຕາມຄາດໝາຍ ທັງເປັນການປະກອບສ່ວນຢ່າງຫ້າວຫັນ ໃນການສົ່ງເສີມການພົວພັນຮ່ວມມືອັນດີໃນຂອບສອງຝ່າຍ ແລະ ຫຼາຍຝ່າຍ ກັບບັນດາປະເທດທີ່ເຂົ້າຮ່ວມກອງປະຊຸມດັ່ງກ່າວ ໃຫ້ແໜ້ນແຟ້ນຍິ່ງຂຶ້ນ.
ຂ່າວ: ກະຊວງການຕ່າງປະເທດ
ຄໍາເຫັນ