ເພີ່ມທະວີການປົກປ້ອງ ແລະ ພັດທະນາເດັກ ໃນໂອກາດສະເຫຼີມສະຫຼອງວັນເດັກສາກົນ

ໃນພິທີ, ຜູ້ເຂົ້າຮ່ວມໄດ້ຮັບຊົມສານອວຍພອນເດັກລາວບັນດາເຜົ່າ ຂອງທ່ານນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດວັນເດັກນ້ອຍສາກົນ 1 ມິຖຸນາ ປີ 2026. ຈາກນັ້ນ, ທ່ານ ນາງ ອາລີ ວົງໜໍ່ບຸນທໍາ ໄດ້ຍົກໃຫ້ເຫັນປະຫວັດຄວາມເປັນມາຂອງວັນເດັກນ້ອຍສາກົນ ທີ່ເລີ່ມຕົ້ນມາຈາກການຮັບຮອງຖະແຫຼງ ການເຊີແນວ ວ່າດ້ວຍສິດທິເດັກໃນປີ 1924 ແລະ ການກຳນົດເອົາວັນທີ 1 ມິຖຸນາ ເປັນວັນເດັກນ້ອຍສາກົນຢ່າງເປັນທາງການນັບແຕ່ປີ 1925. ສໍາລັບຢູ່ ສປປ ລາວ, ວັນສໍາຄັນນີ້ໄດ້ຮັບການຈັດຕັ້ງສະເຫຼີມສະຫຼອງມາຕັ້ງແຕ່ສະໄໝຕໍ່ສູ້ກູ້ຊາດ ແລະ ເດັກລາວບັນດາເຜົ່າໄດ້ຮັບການເອົາໃຈໃສ່ ໂດຍລັດຖະບານໄດ້ສຸມໃສ່ ໃນການສົ່ງເສີມການມີຊີວິດລອດ, ໄດ້ຮັບການປົກປ້ອງ, ພັດທະນາເພື່ອໃຫ້ເດັກມີສ່ວນຮ່ວມໃນການປະກອບຄຳຄິດເຫັນຢ່າງຕໍ່ເນື່ອງມາເຖິງປັດຈຸບັນ. ຊຶ່ງການສະເຫຼີມສະຫຼອງວັນເດັກນ້ອຍສາກົນໃນແຕ່ລະປີ ແມ່ນຕິດພັນກັບວັນປູກຕົ້ນໄມ້ແຫ່ງຊາດ ເພື່ອເປັນສັນຍາລັກແຫ່ງ "ການປູກຝັງຊັບພະຍາກອນມະນຸດ ແລະ ການປູກຝັງທຳມະຊາດ" ໄປ ພ້ອມໆກັນ ໂດຍປຽບທຽບເດັກນ້ອຍເປັນດັ່ງໜໍ່ແໜງຂອງຊາດ ທີ່ຕ້ອງການການບົວລະບັດຮັກສາ ແລະ ພັດທະນາໃຫ້ເຕີບໃຫຍ່ຢ່າງມີຄຸນນະພາບເຊັ່ນດຽວກັນກັບຕົ້ນໄມ້ທີ່ຕ້ອງການການດູແລ ເພື່ອເປັນຮົ່ມເງົາໃນອະນາຄົດ, ທັງນີ້, ເພື່ອປູກຈິດສຳນຶກໃຫ້ຮັກສິ່ງແວດລ້ອມແຕ່ຫົວທີ ແລະ ສ້າງຂະບວນການຮ່ວມແຮງຮ່ວມໃຈຂອງທຸກພາກສ່ວນໃນສັງຄົມ ເພື່ອນຳພາປະເທດຊາດໄປສູ່ການພັດທະນາແບບຍືນຍົງ.

"ເດັກກໍປຽບເໝືອນ ເມັດພັນພືດ ຫຼື ທຶນມະນຸດທີ່ກ້າວ່ານ ແລະ ປູກຝັງລົງໄປ, ພືດເຫຼົ່ານັ້ນຈະເຕີບໃຫຍ່ ແມ່ນຕ້ອງການດິນດີ, ຝຸ່ນດີ, ປຸຍດີ ໄດ້ຮັບການບົວລະບັດເອົາໃຈໃສ່ເບິ່ງແຍງດູແລ ເພື່ອໃຫ້ເຕີບໃຫຍ່ຂະຫຍາຍ ຕົວເປັນຊັບພະຍາກອນທີ່ສົມບູນມີຄຸນນະພາບ ເຊັ່ນດຽວກັນກັບເດັກ ກໍຕ້ອງການຄວາມຮັກ, ຄວາມອົບອຸ່ນ, ການດູແລເບິ່ງແຍງລ້ຽງດູໃຫ້ມີສຸຂະພາບ, ມີໂພຊະນາການ, ມີການສຶກສາ ແລະ ການປົກປ້ອງຮອບດ້ານ ເພື່ອເປັນຊັບພະຍາກອນມະນຸດທີ່ມີຄຸນນະພາບ, ເປັນຜູ້ສືບທອດ ແລະ ເປັນກໍາລັງຫຼັກໃນການພັດທະນາ ແລະ ຕັດສິນຊາຕາກຳຂອງປະເທດຊາດໃນອະນາຄົດ." ທ່ານຍັງໄດ້ສະແດງຄວາມຊົມເຊີຍຕໍ່ທຸກພາກສ່ວນໃນສັງຄົມ ທີ່ໄດ້ຮ່ວມກັນຈັດກິດຈະກຳຕ່າງໆ ເພື່ອສົ່ງເສີມທັກສະຄວາມຮູ້, ການກວດສຸຂະພາບ ແລະ ການຊ່ວຍເຫຼືອເດັກນ້ອຍຜູ້ດ້ອຍໂອກາດ, ເດັກພິການ ແລະ ເດັກໃນເຂດຫ່າງໄກສອກຫຼີກ ຕະຫຼອດຮອດການສ້າງສະພາບແວດລ້ອມທີ່ປອດໄພໃຫ້ເຂົາເຈົ້າ. ພ້ອມທັງຮຽກຮ້ອງໃຫ້ທຸກພາກສ່ວນຍົກສູງຄວາມຮັບຜິດຊອບໃນການຊຸກຍູ້, ສະໜັບສະໜູນ ແລະ ເພີ່ມທະວີການດູແລ, ປົກປ້ອງ ພ້ອມທັງພັດທະນາເດັກລາວບັນດາເຜົ່າຢ່າງຮອບດ້ານ ເພື່ອສ້າງໃຫ້ເຂົາເຈົ້າມີໄວເດັກທີ່ສົດໃສ, ເຕີບໃຫຍ່ຢ່າງເຂັ້ມແຂງ ເປັນກຳລັງຫຼັກຂອງຊາດ ແລະ ນຳພາປະເທດໃຫ້ໄດ້ຮັບການພັດທະນາຢ່າງບໍ່ຢຸດຢັ້ງ.

ໃນພິທີ, ທ່ານປະທານ ຄຊກມດ ຍັງໄດ້ໃຫ້ກຽດຮ່ວມກັບການນຳແຕ່ລະພາກສ່ວນຢອດຢາວິຕາມິນ A ໃຫ້ກັບເດັກນ້ອຍ ແລະ ຢ້ຽມຊົມການວາງສະແດງຜົນງານ ກ່ຽວກັບການສົ່ງເສີມສິດທິເດັກຂອງແຕ່ລະພາກສ່ວນ. ຊົມການນຳສະເໜີຜົນການຄົ້ນຄວ້າຂອງເດັກ ກ່ຽວກັບການຮັບມື ແລະ ການປັບຕົວຕໍ່ການປ່ຽນແປງດິນຟ້າອາກາດ, ການນຳໃຊ້ເຕັກໂນໂລຊີດີຈີຕອນທີ່ປອດໄພ ແລະ ການມີສ່ວນຮ່ວມໃນການສ້າງນະໂຍບາຍ, ຊົມວີດີໂອສັ້ນ, ການສະແດງສິລະປະຈາກຕົວແທນເດັກ, ການມອບຂອງຂວັນ ແລະ ກິດຈະກຳປິ່ນອ້ອມ ຊຶ່ງໄດ້ກາຍເປັນເວທີສຳລັບຫຼານນ້ອຍນັກຮຽນໄດ້ສະແດງຄວາມສາມາດຂອງຕົນ ພ້ອມທັງສ້າງບັນຍາກາດເບີກບານມ່ວນຊື່ນຮ່ວມກັນ.

ຂ່າວ: ສສຍລ