ເປັນກຽດເຂົ້າຮ່ວມໃນພິທີ ມີ ທ່ານ ນາງສຸກັນດາ ສາລິນທະວົງ ຮອງອໍານວຍການໂຮງຮຽນ ມສ ວຽງຈັນ, ທ່ານ ແສງເພັດ ບຸດສະບາປະເສີດ ອະດີດຮອງອໍານວຍການ ທັງເປັນທີ່ປຶກສາ ໂຮງຮຽນ ມສ ວຽງຈັນ, ແຂກຖືກເຊີນ, ຄູ-ອາຈານ ພ້ອມດ້ວນນັກຮຽນເຂົ້າຮ່ວມ.
ໃນພິທີ, ທ່ານ ຄໍາພັນ ວັນທະນາ ຫົວໜ້າໂຄງການຂົນສົ່ງແບບຍືນຍົງ ໃນຕົວເມືອງ ນວ, ໄດ້ເຜີຍແຜ່ເອກະສານ ເປັນຕົ້ນ ສະພາບການຈະລາຈອນຢູ່ໃນ ນວ, ລະບົບລົດເມດ່ວນ BRT, ຄວາມເປັນມາ, ຈຸດປະສົງ, ແຫຼ່ງທຶນ, ອົງປະກອບ, ຜົນປະໂຫຍດທີ່ໄດ້ຮັບຈາກໂຄງການ, ການບໍລິການດ້ວຍລົດເມທີ່ມີຄຸນນະພາບສູງ(ລະບົບລົດເມ BRT) ແລະ ການຄຸ້ມຄອງບໍລິຫານບ່ອນຈອດລົດເກັບເງິນ ຊຶ່ງໄດ້ອະທິບາຍວ່າ ການຈະລາຈອນ ໃນ ນວ ແອອັດ ສາເຫດຕົ້ນຕໍ ຍ້ອນຈໍານວນຍານພາຫະນະເພີ່ມຂຶ້ນສະເລ່ຍ 7 -10%/ປີ, ການຈອດລົດແຄມທາງ ຍ້ອນບໍ່ມີສະຖານທີ່ຈອດລົດ, ການບໍລິການຂົນສົ່ງສາທະລະນະບໍ່ສະດວກ ແລະ ພຽງພໍ, ລະບົບການຄຸ້ມຄອງການສັນຈອນບໍ່ເປັນລະບົບຄົບຊຸດ ແລະ ອື່ນໆ. ພ້ອມດຽວກັນ ຍັງໄດ້ອະທິບາຍຕື່ມວ່າ: ລົດເມດ່ວນແມ່ນລະບົບລົດເມ ທີ່ສາມາດບໍລິການຢ່າງມີປະສິດທິພາບດ້ວຍຄວາມວ່ອງໄວທີ່ມີຄຸນນະພາບດີ ພ້ອມທັງມີລາຄາຄ່າໂດຍສານຕໍ່າ ຊຶ່ງປະກອບດ້ວຍ ມີຊ່ອງຈະລາຈອນສະເພາະ ສໍາລັບລົດເມດ່ວນ, ມີດອນກາງລະຫວ່າງຊ່ອງຈະລາຈອນ, ບໍ່ມີຄົນເກັບຄ່າໂດຍສານ, ມີບ່ອນ ຂຶ້ນ-ລົງລົດເມ ຢູ່ກັບຊ່ອງຈະລາຈອນ, ເປັນລົດເມທີ່ມີສິດທິພິເສດໃນທາງສີ່ແຍກ.
(ຂ່າວ: ແສງຈັນ)
ຄໍາເຫັນ