ເຜີຍແຜ່ດໍາລັດ ວ່າດ້ວຍປ່າສະຫງວນເຂດພາກເໜືອ

ແຂວງ ອຸດົມໄຊ, ມີແຂກຖືກເຊີນ ແລະ ພາກສ່ວນທີ່ກ່ຽວຂ້ອງຈາກສູນກາງ ແລະ 8 ແຂວງ ພາກເໜືອ ເຂົ້າຮ່ວມ.
ໃນກອງປະຊຸມ ທ່ານ ສົມບູນ ວົງພະຈັນ ຮອງຫົວໜ້າກົມກົດໝາຍ ກະຊວງຍຸຕິທຳ ໄດ້ກ່າວວ່າ: ດໍາລັດປ່າສະຫງວນ ສະບັບໃໝ່ນີ້ ໄດ້ຍົກສູງມາດຕະຖານ, ບຸລິມະສິດ ແລະ ກົງຈັກການຈັດຕັ້ງຂອງປ່າສະຫງວນໃຫ້ສອດຄ່ອງກັບບັນດາເປົ້າໝາຍແຫ່ງຊາດ ແລະ ມາດຕະຖານສາກົນ. ປະຊາຊົນທີ່ອາໄສຢູ່ບັນດາບ້ານອ້ອມຂ້າງປ່າສະຫງວນ ຈະມີສ່ວນຮ່ວມໃນການຄຸ້ມຄອງປ່າສະຫງວນໂດຍຜ່ານຮູບແບບການສົ່ງເສີມ “ບ້ານພັດທະນາທາງດ້ານປ່າໄມ້” ເພື່ອແນໃສ່ດຸ່ນດ່ຽງຜົນປະໂຫຍດລະຫວ່າງຄົນ ແລະ ທຳມະຊາດ. ນອກຈາກນັ້ນ, ດໍາລັດດັ່ງກ່າວ ຍັງໄດ້ອະທິບາຍແຈ່ມແຈ້ງເຖິງປະເພດການນໍາໃຊ້ປ່າສະຫງວນກໍຄື: ການນໍາໃຊ້ເພື່ອສາທາລະນະປະໂຫຍດ, ຄອບຄົວ, ປະເພນີ ແລະ ທຸລະກິດ ລວມເຖິງການກໍານົດສິດ ແລະ ຄວາມຮັບຜິດຊອບຂອງຜູ້ນຳໃຊ້. ດຳລັດສະບັບນີ້, ຍັງໄດ້ພິຈາລະນາຢ່າງຖີ່ຖ້ວນໃນການດຸ່ນດ່ຽງການອະນຸລັກກັບການພັດທະນາ ເພື່ອແນໃສ່ນຳໃຊ້ ລຳດັບມາດຕະການ ການຫຼຸດຜ່ອນຜົນກະທົບຕໍ່ຊີວະນານາພັນ ໃນການດໍາເນີນທຸລະກິດ ເພື່ອຫຼີກລ່ຽງ ຫຼື ຫຼຸດຜ່ອນຜົນກະທົບທາງລົບຂອງການລົງທຶນຕໍ່ກັບຊີວະນານາພັນ ແລະ ການບໍລິການລະບົບນິເວດ ແນໃສ່ການທົດແທນຊີວະນານາພັນເທົ່າເດີມ ຫຼື ການເພີ່ມຊີວະນານາພັນ. ຄຽງຄູ່ກັນນີ້ ກະຊວງກະສິກຳ ແລະ ປ່າໄມ້ ຍັງໄດ້ສ້າງ‘ແຜນຄຸ້ມຄອງ ແລະ ສະໜອງທຶນແບບຍືນຍົງໃຫ້ແກ່ ລະບົບປ່າສະຫງວນແຫ່ງຊາດ ຢູ່ໃນ ສປປ ລາວ (NPA Roadmap)’ເພື່ອຮັບປະກັນການຈັດຕັ້ງປະຕິບັດນະໂຍບາຍປ່າສະຫງວນສະບັບໃໝ່ໃຫ້ປະສົບຜົນສຳເລັດ.
ທ່ານ ນາງ ມະໂນລີ ສີສະຫວັນ ຮອງຜູ້ອຳນວຍການອົງການອະນຸລັກສັດປ່າປະຈຳ ສປປ ລາວກ່າວວ່າ: “ພວກເຮົາພູມໃຈຫຼາຍທີ່ສາມາດປະກອບສ່ວນເຂົ້າໃນໂຄງການ ‘‘ການອະນຸລັກລະບົບນິເວດໂດຍຜ່ານການຄຸ້ມຄອງພູມີທັດແບບປະສົມປະສານຢູ່ ສປປ ລາວ (ECILL)’’ ທີ່ໄດ້ຮັບທຶນຈາກ ອົງການຝຣັ່ງເພື່ອການພັດທະນາ (AFD) ແລະ ສະຫະພາບເອີຣົບປະຈຳ ສປປ ລາວ (EU). ພວກເຮົາຫວັງສືບຕໍ່ເຮັດວຽກຢ່າງໃກ້ຊິດກັບລັດຖະບານລາວແລະ ບັນດາພາກສ່ວນກ່ຽວຂ້ອງໃນວຽກງານປ່າສະຫງວນເພື່ອຮັບປະກັນການຈັດຕັ້ງປະຕິບັດ ແລະ ບັງຄັບໃຊ້ນິຕິກໍາໃຫ້ປະສົບຜົນສຳເລັດ ຕາມລັດທີ່ປົກຄອງດ້ວຍກົດໝາຍ ເພື່ອຜົນປະໂຫຍດຂອງທໍາມະຊາດ ແລະ ປະຊາຊົນ.
(ຂ່າວ: ອົງການອະນຸລັກສັດປ່າປະຈຳ ສປປ ລາວ)