ໃນວັນທີ 8 ພຶດສະພາ 2024 ນີ້ ຢູ່ທີ່ຫ້ອງປະຊຸມຊັ້ນ 2 ຂອງຫ້ອງວ່າການແຂວງວຽງຈັນ ໄດ້ຈັດໃຫ້ມີກອງປະຊຸມເຜີຍແຜ່ເຊື່ອມຊຶມ ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ) ແລະ ບັນດານິຕິກຳທີ່ກ່ຽວຂ້ອງ ໃຫ້ກັບບັນດາພະແນກ ການອ້ອມຂ້າງແຂວງວຽງຈັນ ໂດຍການເປັນປະທານຂອງ ທ່ານ ສີວຽງໄຊ ອໍລະບູນ ກຳມະການພັກແຂວງ, ຫົວໜ້າຫ້ອງວ່າການແຂວງວຽງຈັນ, ມີທ່ານ ສຸກັນ ຈັນທະວົງ ຫົວໜ້າສາຂາທະນາຄານແຫ່ງ ສປປ ລາວ ພາກເໜືອ ແຂວງຫຼວງພະບາງ ພ້ອມດ້ວຍທີມງານ ແລະ ບັນດາພະແນກການທີ່ກ່ຽວຂ້ອງອ້ອມຂ້າງແຂວງວຽງຈັນເຂົ້າຮ່ວມ.
ທ່ານ ສີວຽງໄຊ ອໍລະບູນ ໄດ້ມີຄຳເຫັນກ່າວເປີດກອງປະຊຸມວ່າ: ຕົ້ນປີ 2022 ເຫັນວ່າອັດຕາແລກປ່ຽນມີການເໜັງຕີງເພີ່ມຂື້ນຢ່າງຕໍ່ເນື່ອງ ເຮັດໃຫ້ເງິນກີບອ່ອນຄ່າ ເມື່ອທຽບກັບສະກຸນເງິນໂດລາ ແລະ ເງິນບາດ, ຍ້ອນສະພາບປັດໄຈພາຍນອກທີ່ຍັງຜັນປວນ ແລະ ມີຄວາມບໍ່ແນ່ນອນສູງ ເປັນຕົ້ນການແຂງຄ່າຂອງເງິນໂດລາຢູ່ຕະຫຼາດສາກົນຢ່າງຕໍ່ເນື່ອງ, ການເພີ່ມຂຶ້ນຂອງລາຄານໍ້າມັນເຊື້ອໄຟໃນຕະຫຼາດໂລກ, ການເພີ່ມຂຶ້ນຂອງລາຄາຄໍາ ສົມທົບກັບປັດໄຈພາຍໃນປະເທດ ທີ່ຕິດພັນກັບພື້ນຖານໂຄງສ້າງເສດຖະກິດ, ພຶດຕິກໍາຄວາມຊິນເຄີຍຂອງຄົນໃນສັງຄົມລາວໃນການນໍາໃຊ້ສິນຄ້ານໍາເຂົ້າ,ການນໍາໃຊ້ເງິນຕາຕ່າງປະເທດຢູ່ພາຍໃນ ໄດ້ສົ່ງຜົນກະທົບຢ່າງຕໍ່ເນື່ອງຕໍ່ຄ່າເງິນກີບ, ມາຮອດທ້າຍປີ 2022 ສະພາແຫ່ງຊາດຈຶ່ງໄດ້ມີມະຕິຕົກລົງຮັບຮອງເອົາ ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ) ເລກທີ່ 15/ສພຊ, ລົງວັນທີ 07 ກໍລະກົດ 2022 ທັງນີ້ກໍ່ເພື່ອເຮັດໃຫ້ກົດໝາຍມີຄວາມສັກສິດ ແລະ ຮັດກຸມຂຶ້ນ ໃນຫຼາຍໆມາດຕາແມ່ນໄດ້ມີການປັບປຸງເພື່ອໃຫ້ສອດຄ່ອງ ແລະ ແທດເໝາະກັບສະພາບເສດຖະກິດໃນປັດຈຸບັນ.
ເພື່ອເຮັດໃຫ້ເນື້ອໃນຂອງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ) ເລກທີ 15/ສພຊ, ລົງວັນທີ 07 ກໍລະກົດ 2022 ໄດ້ຮັບການຈັດຕັ້ງປະຕິບັດຢ່າງເຂັ້ມງວດ ໂດຍສະເພາະການຄອບຄອງ ແລະ ການນໍາໃຊ້ ເງິນຕາຕ່າງປະເທດ, ການຕິດຕາມກະແສເງິນ ຕິດພັນກັບການນຳເຂົ້າ-ສົ່ງອອກ ສິນຄ້າ ແລະ ຫຼື ການບໍລິການ, ລາຍຮັບຂອງຜູ້ອອກແຮງງານ, ການລົງທຶນໂດຍກົງຂອງຕ່າງປະເທດ ຢູ່ ສປປ ລາວ, ການລາຍງານກ່ຽວກັບເງິນຝາກຢູ່ຕ່າງປະເທດ ແລະການບໍລິການແລກປ່ຽນເງິນຕາ. ນາຍົກລັດຖະມົນຕີ ອອກຄຳສັ່ງ ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ສະບັບເລກທີ 10/ນຍ, ລົງວັນທີ 14 ກໍລະກົດ 2023 ທີ່ໄດ້ເນັ້ນໃຫ້ແຕ່ລະພາກສ່ວນພະແນກການຕ້ອງໄດ້ເອົາໃຈໃສ່ຕໍ່ກັບພາລະບົດບາດຂອງຕົນ ທີ່ຕິດພັນກັບວຽກງານຄຸ້ມຄອງເງິນຕາຕ່າງປະເທດ ຢ່າງເຂັ້ມງວດຂຶ້ນກວ່າເກົ່າ.
ໃນກອງປະຊຸມຄັ້ງນີ້ ຍັງໄດ້ຜ່ານຂໍ້ຕົກລົງຂອງທ່ານເຈົ້າແຂວງວຽງຈັນ ວ່າດ້ວຍການແຕ່ງຕັ້ງ ຄະນະຊີ້ນຳ ແລະ ອານຸກຳມະການ ຕິດຕາມກວດກາ ການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດຢູ່ແຂວງວຽງຈັນ. ຫຼັງຈາກນັ້ນ, ບັນດາຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄຳຄິດຄຳເຫັນ ເພຶ່ອເປັນການປຶກສາຫາລືແລກປ່ຽນ ແລະ ຖອດຖອນບົດຮຽນຮ່ວມກັນ ເພຶ່ອເຮັດໃຫ້ການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດຢູ່ແຂວງວຽງຈັນ ໄດ້ຮັບໝາກຜົນສູງຂຶ້ນເລື້ອຍໆ.
(ພາບ-ຂ່າວ : ບຸນມາ ແກ້ວບຸດດາ.)
ຄໍາເຫັນ