 |
ກອງປະຊຸມຄັ້ງນີ້, ເປັນການປະຕິບັດຕາມບົດບັນທຶກການຮ່ວມມື ລະຫວ່າງ ສູນກາງແນວລາວສ້າງຊາດ ແລະ ກຸ່ມບໍລິສັດ ພົງສະຫວັນ ຈໍາກັດ ໃນໄລຍະ 5 ປີ ແຕ່ປີ 2025 ຫາ ປີ 2029 ເພື່ອສືບຕໍ່ເພີ່ມທະວີການຮ່ວມມືທັງສອງຝ່າຍ ໃນຂອບເຂດວຽກງານ ຊຸກຍູ້, ສົ່ງເສີມ ການສ້າງຕັ້ງກອງທຶນ, ການສ້າງສູນຕົວແບບກະສິກຳ, ການສະໜອງແນວພັນພືດ, ແນວພັນສັດ, ອຸປະກອນການຜະລິດ, ການປູກ-ການລ້ຽງ, ການເກັບຊື້, ຈັດຫາຕະຫຼາດຈຳໜ່າຍ ແລະ ອື່ນໆ ທີ່ສູນກາງແນວລາວສ້າງຊາດ ແລະ ກຸ່ມບໍລິສັດພົງສະຫວັນຈຳກັດ ໄດ້ລົງນາມໃນປີ 2017 ແລະ ສືບຕໍ່ປະຕິບັດມາຈົນເຖິງປັດຈຸບັນໄດ້ 25 ກອງທຶນ ໃຫ້ມີໝາກຜົນ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຂະບວນການສ້າງຄອບຄົວ ແລະ ບ້ານສາມັກຄີປອງດອງ, ລຶບລ້າງຄວາມທຸກຍາກໃຫ້ແກ່ປະຊາຊົນບັນດາເຜົ່າຕາມແນວທາງນະໂຍບາຍຂອງພັກ-ລັດ.
ໂອກາດນີ້, ທ່ານ ຄໍາໄຫຼ ສີປະເສີດ ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບ ທີ່ໄດ້ເອົາໃຈໃສ່ໃນການຫ້າງຫາກະກຽມກອງປະຊຸມ ແລະ ດ້ວຍຄວາມຮັບຜິດຊອບສູງ ຂອງບັນດາທ່ານທີ່ເຂົ້າຮ່ວມກອງປະຊຸມເຜີຍແຜ່ນິຕິກໍາໂຄງການກອງທຶນສາມັກຄີ ແລະ ພັດທະນາແນວລາວສ້າງຊາດ ໄດ້ດໍາເນີນໄປດ້ວຍບັນຍາກາດຟົດຟື້ນ, ສ້າງສັນ; ທ່ານໄດ້ສະແດງຄວາມຂອບໃຈຕໍ່ບັນດາທ່ານທີ່ໄດ້ປະກອບຄໍາເຫັນຕໍ່ກອງປະຊຸມ, ທ່ານເຊື່ອໝັ້ນວ່າ ນັບແຕ່ນີ້ຕໍ່ໄປຄະນະຮັບຜິດຊອບໂຄງການທຸກຂັ້ນຈະເປັນເຈົ້າການໝູນໃຊ້ເຂົ້າສູ່ພາກຕົວຈິງ; ພ້ອມກັນນີ້ໄດ້ຮຽກຮ້ອງໃຫ້ຄະນະຊີ້ນໍາແຕ່ລະຂັ້ນເປັນເຈົ້າການ, ກ້າຫານປະດິດສ້າງໃນການສ້າງການຫັນປ່ຽນໃໝ່ ທາງດ້ານຮູບການ ແລະ ວິທີການນຳພາ-ຊີ້ນຳ ການຈັດຕັ້ງປະຕິບັດຕົວຈິງ ໃນວຽກງານກອງທຶນ ກໍຄືການແກ້ໄຂຄວາມທຸກຍາກໃຫ້ມີປະສິດທິຜົນສູງກວ່າເກົ່າ, ປຸກລະດົມຂະບວນການແຂ່ງຂັນຮັກຊາດ ແລະ ພັດທະນາໃຫ້ກວ້າງຂວາງທົ່ວເຖິງທຸກຊັ້ນຄົນໃນສັງຄົມ ແລະ ປະຊາຊົນບັນດາເຜົ່າ, ສ້າງ ແລະ ຍົກສູງສະຕິຕື່ນຕົວ ເປັນເຈົ້າການພັດທະນາຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໃຫ້ຫຼຸດພົ້ນຈາກຄວາມທຸກຍາກເທື່ອລະກ້າວ ເພື່ອເລັ່ງໃສ່ການພັດທະນາປະເທດຊາດ ໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາ ຕາມເປົ້າໝາຍທີ່ພັກ-ລັດວາງໄວ້.
(ຂ່າວ-ພາບ: ລີ)
ຄໍາເຫັນ