ສະຫາຍ ທະນູໄຊ ບັນຊາລິດ ຄະນະປະຈໍາພັກແຂວງ ຮອງເຈົ້າແຂວງອັດຕະປື ໄດ້ລາຍງານຕໍ່ກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 13 ສະໄໜທີ Xl ໃນວັນທີ 5 ພຶດສະພາຜ່ານມາວ່າ: ໃນໄລຍະ 3 ເດືອນຜ່ານມາ ພາຍໃຕ້ການນໍາພາ-ຊີ້ນໍາ ຂອງຄະນະບໍລິຫານງານພັກ ແຂວງອັດຕະປື ເຮັດໃຫ້ເສດຖະກິດ ມີການຂະຫຍາຍຕົວຕໍ່ເນື່ອງ. ໃນນີ້, ຂະແໜງກະສິກໍາ ແລະ ປ່າໄມ້ ໄດ້ສຸມໃສ່ປັບປຸງພື້ນຖານວັດຖຸເຕັກນິກຮັບໃຊ້ໃຫ້ແກ່ການຜະລິດກະສິກຳ ແລະ ປ່າໄມ້ ເພື່ອຮອງຮັບໃຫ້ແກ່ການຜະລິດ ເຮັດໃຫ້ຂະແໜງດັ່ງກ່າວ ຂະຫຍາຍຕົວສະເລ່ຍ 3.64% ກວມເອົາ 49.47% ຂອງ ຈີດີພີ; ຂະແໜງອຸດສາຫະກຳ ໄດ້ເອົາໃຈໃສ່ການຈັດຕັ້ງການຜະລິດຕາມທິດຫັນເປັນອຸດສາຫະກຳທັນສະໄໝ ເຮັດໃຫ້ຂະແໜງ ການນີ້ຂະຫຍາຍຕົວ ສະເລ່ຍ 1.85% ກວມເອົາ 22.32% ຂອງ ຈີດີພີ; ຂະແໜງບໍລິການ ໄດ້ພັດທະນາຢ່າງມີຈຸດສຸມ ແລະ ມີສ່ວນຮ່ວມຂອງທຸກພາກສ່ວນເສດຖະກິດ - ສັງຄົມ ເຮັດໃຫ້ຂະແໜງ ການນີ້ຂະຫຍາຍຕົວ ສະເລ່ຍ 1.33% ກວມເອົາ 28.2% ຂອງຈີດີພີ. ນອກນັ້ນ, ຍັງໄດ້ສຸມໃສ່ການຈັດເກັບລາຍຮັບງົບປະມານແຫ່ງລັດ ດ້ວຍມາດຕະການຕ່າງໆ ໂດຍສະເພາະ ມາດຕະການ ແລະ ນິຕິກຳ ທີ່ຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ເພື່ອເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼ ຂອງລາຍຮັບງົບປະມານແຫ່ງລັດ ຈາກຖານທີ່ມີແລ້ວ ແລະ ການຄຸ້ມຄອງການເກັບລາຍຮັບ ດ້ວຍລະບົບທັນສະໄໝ, ຊຶ່ງປະຕິບັດໄດ້ 329 ຕື້ກວ່າກີບ ເທົ່າກັບ 31% ຂອງແຜນການ, ອັດຕາເງິນເຟີ້ ສະເລ່ຍຢູ່ໃນລະດັບ 19.41%, ທຽບໃສ່ໄລຍະດຽວກັນຂອງປີຜ່ານມາ ຫຼຸດລົງ 0.7%, ມູນຄ່າການສົ່ງອອກ ແລະ ນໍາເຂົ້າ ປະຕິບັດໄດ້ 52 ລ້ານກວ່າໂດລາ ເທົ່າກັບ 19.75% ຂອງແຜນການ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 18.32% ແລະ ການລົງທຶນລວມ ປະຕິບັດໄດ້ 1,925 ຕື້ກວ່າກີບ ເທົ່າກັບ 62% ຂອງແຜນການ.
(ແຫຼ່ງຂ່າວ: ແຂວງອັດຕະປື)
ຄໍາເຫັນ