ພິທີປະດັບຫຼຽນໄຊ ຫຼຽນກາ ແລະ ໃບຍ້ອງຍໍ ໃຫ້ຜູ້ທີ່ມີຜົນງານ

 ໃນວັນທີ 25 ກັນຍານີ້ ທີ່ໂຮງແຮມເມືອງແທ໋ງ ນະຄອນຫຼວງວຽງຈັນ.
ເປັນກຽດໃນພິທີ, ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ເລຂາຄະນະພັກ ຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ລາຍ ຊວັນ ໂມນ ກຳມະການສູນກາງພັກ ຄະນະປະຈຳພັກ ຮອງຫົວໜ້າ ຄະນະໂຄສະນາສຶກສາສູນກາງພັກກອມມູນິດຫວຽດນາມ, ແຂກຖືກເຊີນ ພ້ອມດ້ວຍພະນັກງານທັງສອງຝ່າຍເຂົ້າຮ່ວມຢ່າງພ້ອມພຽງ.
ເນື່ອງໃນໂອກາດທີ່ຄະນະຜູ້ແທນຄະນະໂຄສະນາສຶກສາສູນງກາງພັກກອມມູນິດຫວຽດນາມ ໄດ້ມາເຮັດວຽກ ແລະ ຢ້ຽມຍາມ ສາທາລະນະລັດປະຊາທິປະໄຕປະຊາຊົນລາວ ຖືເອົາໂອກາດທີ່ມີຄວາມໝາຍຄວາມສໍາຄັນນີ້ຄະນະໂຄສະນາອົບຮົມສູນກາງ ພັກປະຊາຊົນ ປະຕິວັດລາວ ຈຶ່ງໄດ້ຈັດຕັ້ງພິທີປະດັບຫຼຽນໄຊ, ຫຼຽນກາ ແລະ ມອບໃບຍ້ອງຍໍ ໃຫ້ບັນດາສະຫາຍທີ່ມີຜົນງານ, ຄຸນງາມຄວາມດີ ໃນການເສີມສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ ແລະ ປະຊາຊົນສອງຊາດລາວ-ຫວຽດນາມ ກໍຄື ຄະນະໂຄສະນາອົບຮົມສູນກາງພັກ ປະຊາຊົນ ປະ ຕິວັດລາວ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ ໂອກາດສະເຫຼີມສະຫຼອງ ສອງວັນປະຫວັດສາດ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ການຮ່ວມມື ລາວ-ຫວຽດນາມ ຄົບຮອບ 45 ປີ (18/7/1977-18/7/2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5/9/1962-5/9/2022) ກໍຄື‘‘ ບັ້ນສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ປີ 2022’’
ໃນພິທີອັນມີຄວາມໝາຍຄວາມສໍາຄັນ ສະຫາຍ ນາງພວງມະລີ ອັກຄະມຸນຕີ ກໍາມະການຄະນະພັກ, ຫົວໜ້າກົມຈັດຕັ້ງ-ພະນັກງານ ໄດ້ຂຶ້ນອ່ານ ຜ່ານເອກະສານ ຄື: ລັດຖະດໍາລັດຂອງປະທານປະເທດ ສາທາລະນະລັດ ປະຊາທິປະໄຕ ປະຊາຊົນລາວ ວ່າດ້ວການປະດັບຫຼຽນໄຊອິດສະຫຼະ ຊັ້ນ III ສະບັບເລກທີ 232/ປປທ, ລົງວັນທີ 22 ທັນວາ 2023, ໃບມອບສິດນາຍົກລັດຖະມົນຕີ ສະບັບເລກທີ 279/ນ.ຍ, ລົງວັນທີ 22/12/2023, ຂໍ້ຕົກລົງ ວ່າດ້ວຍການຍ້ອງຍໍກົມກອງ ແລະ ບຸກຄົນ ໃຫ້ຄະນະໂຄສະນາສຶກສາສູນກາງພັກກອມມູນິດຫວຽດນາມ ໃນບັ້ນສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ.
ໃຫ້ກຽດປະດັບຫຼຽນ ໂດຍ ສະຫາຍ ຄໍາພັນ ເຜີຍຍະວົງ ປະດັບຫຼຽນອິດສະຫຼະ ຊັ້ນ III ໃຫ້ ສະຫາຍ ລ້າຍ ຊວັນ ໂມນ ແລະ ທັງເປັນຜູ້ ຕາງໜ້າຮັບຫຼຽນໄຊອິດສະຫຼະ ຊັ້ນ III ໃຫ້ການນໍາ 3 ສະຫາຍ ຂອງຄະນະໂຄສະນາສຶກສາສູນກາງພັກກອມມູນິດຫວຽດນາມ ທີ່ບໍ່ໄດ້ມາຮ່ວມ,
ສະຫາຍ ຫງວຽນ ເຄ່ວ ເລິມ ຫົວໜ້າກົມຂໍ້ມູນຂ່າວສານ ແລະ ຮ່ວມມືສາກົນ ຄະນະໂຄສະນາສຶກສາສູນກາງພັກກອມມູນິດຫວຽດນາມ ຕາງໜ້າຮັບໃບຍ້ອງຍໍ ຂອງກົມກອງ ແລະ ບຸກຄົນ ໃຫ້ຄະນະໂຄສະນາສຶກສາສູນກາງພັກກອມມູນິດຫວຽດນາມ. ຈາກນັ້ນ, ສະຫາຍ ຫງວຽນ ເຄ່ວ ເລິມ ຂຶ້ນຜ່ານເອກະສານດໍາລັດວ່າດ້ວຍການປະດັບຫຼຽນໄຊເອກະລາດ ຊັ້ນ II, ຊັ້ນ III, ຫຼຽນໄຊມິດຕະພາບ ແລະ ຫຼຽນກາມິດຕະພາບ, ສະຫາຍ ລາວປາວຊົງ ນະວົງໄຊ, ກໍາມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ປະຊາຊົນປະຕິວັດລາວ ຮັບການປະດັບຫຼຽນໄຊເອກະລາດ ຊັ້ນ II ໃຫ້ກຽດປະດັບຫຼຽນ ໂດຍ ສະຫາຍ ລ້າຍ ຊວັນ ໂມນ, ການປະດັບຫຼຽນໄຊເອກະລາດ ຊັ້ນ III ຈໍານວນ 3 ສະຫາຍ, ສະຫາຍ ຄໍາວິສັນ ແກ້ວສຸວັນ ອະດີດຫົວໜ້າກົມ (ຜູ້ຊ່ວຍວຽກຄະນະ ຄອສພ) ພະນັກງານບໍານານ, ຮັບການປະດັບຫຼຽນໄຊເອກະລາດ ຊັ້ນ III, ປະດັບຫຼຽນໄຊມິດຕະພາບ ຈໍານວນ 12 ສະຫາຍ, ປະດັບຫຼຽນກາມິດຕະພາບ ຈໍານວນ 11 ສະຫາຍ.
(ຂ່າວ: ແສງຈັນ)