 |
ໃນໂອກາດກ່າວເປີດພິທີ, ທ່ານ ບຸນປັນ ສຸມຸນທອງ ໄດ້ສະແດງຄວາມພາກພູມໃຈ ແລະ ໃຫ້ກຽດຕາງໜ້າຄະນະພັກ, ຄະນະນຳ ສມປຊ ຊຶ່ງທ່ານໄດ້ກ່າວເນັ້ນໜັກເຖິງຄວາມສໍາຄັນຂອງການຝຶກອົບຮົມໃນຄັ້ງນີ້ ພ້ອມຮຽກຮ້ອງໃຫ້ບັນດາທ່ານຈົ່ງຍາດແຍ່ງ, ເອົາບົດຮຽນ, ປະສົບການນຳວິທະຍາກອນໃຫ້ໄດ້ຢ່າງເລິກເຊິ່ງ ຕະຫຼອດໄລຍະ ຂອງການຝຶກອົບຮົມ ຊຶ່ງການຝຶກອົບຮົມ ດຳເນີນເປັນເວລາ 2 ວັນ (ວັນທີ 21-22 ຕຸລາ 2025) ເພື່ອນໍາໄປໝູນໃຊ້ເຂົ້າສູ່ວຽກງານຂ່າວສານໃນກົມກອງຂອງຕົນ. ຈຸດປະສົງຕົ້ນຕໍ ແມ່ນເພື່ອໃຫ້ພະນັກງານທຸກພາກສ່ວນສາມາດສະໜອງຂ່າວສານໃຫ້ແກ່ໜ່ວຍງານຂ່າວສານຂອງ ສມປຊ ແລະນຳມາເຜີຍແຜ່ໂຄສະນາລົງໃນເວັບໄຊ ສມປຊ ຢ່າງວ່ອງໄວທັນການ.
 |
ການຝຶກອົບຮົມຄັ້ງນີ້, ທ່ານ ວັນໄຊ ຕະວິນຍານ ອະດີດຮອງຫົວໜ້າຄະນະໂຄສະນາອົບຮົມສູນກາງພັກ ແລະ ອະດີດຫົວໜ້າບັນນາທິການໃຫຍ່ໜັງສືພິມປະຊາຊົນ ຊຶ່ງເປັນຜູ້ຊ່ຽວຊານດ້ານວຽກງານຂ່າວສານ ຂອງໜັງສືພິມປະຊາຊົນ ໄດ້ຮັບກຽດເປັນວິທະຍາກອນເພື່ອມາຖ່າຍທອດບົດຮຽນ ແລະ ປະສົບການວຽກງານຂໍ້ມູນຂ່າວສານ; ພ້ອມນັ້ນ, ສໍາມະນາກອນ ກໍຈະໄດ້ມີໂອກາດແລກປ່ຽນຄໍາຄິດຄໍາເຫັນກັບວິທະຍາກອນ ຢ່າງລະອຽດຈະແຈ້ງ. ເນື້ອໃນຕົ້ນຕໍ ຂອງການຝຶກອົບຮົມແບ່ງອອກເປັນ 4 ຫົວຂໍ້ໃຫຍ່ຄື:ຄວາມຮູ້ພື້ນຖານວຽກງານຂ່າວສານ, ເຕັກນິກການເກັບກຳຂໍ້ມູນ, ການຂຽນຂ່າວ, ເຕັກນິກການຖ່າຍພາບປະກອບຂ່າວ, ຂັ້ນຕອນ ແລະ ວິທີການບັນນາທິການຂ່າວ.
ການຝຶກອົບຮົມຈະດຳເນີນໄປຕາມຫຼັກການທາງດ້ານທິດສະດີ ແລະ ພຶດຕິກຳຕົວຈິງຢ່າງຈະແຈ້ງ, ພ້ອມທັງຈະໄດ້ຍົກພຶດຕິກຳປະກອບຈຳນວນໜຶ່ງ ເພື່ອສົມທຽບໃສ່ທິດສະດີ. ນອກຈາກນັ້ນ, ຍັງມີການຈັດຕັ້ງເປັນກຸ່ມເພື່ອຝຶກຂຽນຂ່າວຕົວຈິງພາຍໃຕ້ຫົວຂໍ້ທີ່ກຳນົດ, ເພື່ອຮັບປະກັນໃຫ້ຜູ້ເຂົ້າຮ່ວມສາມາດຖອດຖອນບົດຮຽນ ແລະ ນຳໄປນຳໃຊ້ເຂົ້າສູ່ການປະຕິບັດຕົວຈິງຕາມຄວາມຮັບຜິດຊອບຂອງຕົນໃຫ້ມີປະສິດທິພາບ ແລະ ປະສິດທິຜົນສູງຂຶ້ນ.
(ຂ່າວ-ພາບ: ຕາອັອດ ແສນທະວີສຸກ)
ຄໍາເຫັນ