ໂຄງການຝຶກອົບຮົມນີ້ ໄດ້ເລີ່ມຕົ້ນຈັດຂຶ້ນນັບແຕ່ປີ 2017 ຊຶ່ງເປັນການເປີດໂອກາດໃຫ້ພະນັກງານການນຳລາວໃນອະນາຄົດໄດ້ເພີ່ມພູນຄວາມຮູ້ກ່ຽວກັບການບໍລິຫານການປົກຄອງ ແລະ ພັດທະນາເສດຖະກິດ - ສັງຄົມ ຂອງຍີ່ປຸ່ນ ຊຶ່ງຈະເປັນປະໂຫຍດຕໍ່ການພັດທະນາ ຂອງ ສປປ ລາວ.
ທ່ານ ໂຄອິຊຶມິ ຊຶໂຕມຸ ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງຍີ່ປຸ່ນປະຈຳ ສປປ ລາວ ໄດ້ສະແດງຄວາມຂອບໃຈຕໍ່ຄວາມພະຍາຍາມຂອງພາກສ່ວນທີ່ກ່ຽວຂ້ອງ. ທ່ານທູດໄດ້ກ່າວວ່າ: ໂຄງການຝຶກອົບຮົມໃນຄັ້ງນີ້ ມີຈຸດປະສົງເພື່ອເຊື້ອເຊີນບັນດາທ່ານ ຊຶ່ງຄາດວ່າຈະກາຍມາເປັນຜູ້ນຳລະດັບສູງຂອງ ສປປ ລາວ ໃນອະນາຄົດ ໄປຢ້ຽມຢາມປະເທດຍີ່ປຸ່ນ ເພື່ອແລກປ່ຽນບົດຮຽນ ແລະ ປະສົບການຂອງຍີ່ປຸ່ນ, ແລ້ວນຳໄປຜັນຂະຫຍາຍໃຫ້ເກີດປະໂຫຍດ ແກ່ການພັດທະນາປະເທດລາວ ຢ່າງມີປະສິດທິພາບ ໃນຕໍ່ໜ້າ.
ທ່ານ ສຸກພະຈັນ ສີລາເພັດ ຮອງເລຂາພັກແຂວງ ປະທານຄະນະກຳມະການປົກຄອງແຂວງບໍ່ແກ້ວ ໃນນາມຜູ້ຕາງໜ້າຜູ້ເຂົ້າຮ່ວມຝຶກອົບຮົມ ໄດ້ສະແດງຄວາມມຸ່ງໝັ້ນຕໍ່ໂອກາດການຝຶກອົບຮົມໃນຄັ້ງນີ້ວ່າຈະຕັ້ງໜ້າຄົ້ນຄວ້າ, ເກັບກ່ຽວເອົາຄວາມຮູ້, ປະສົບການ ແລະ ບົດຮຽນຕ່າງໆ ຢ່າງເຕັມເມັດເຕັມໜ່ວຍ ແລະ ນຳໃຊ້ຄວາມຮູ້ທີ່ໄດ້ຮັບມາເພື່ອສົ່ງເສີມຄວາມຈະເລີນກ້າວໜ້າຂອງປະເທດຊາດໃນອະນາຄົດ.
ໂຄງການຝຶກອົບຮົມນີ້ ຈະເນັ້ນໃສ່ຂະແໜງການ "ທ່ອງທ່ຽວ" ເປັນຫຼັກ ຊຶ່ງລວມມີການໄປທັດສະນະສຶກສາ ຢູ່ເມືອງຄາວາໂກເອະ (Kawagoe) ແຂວງໄຊຕາມະ (Saitama) ເປັນແຫຼ່ງທ່ອງທ່ຽວທີ່ມີຊື່ສຽງໂດ່ງດັງ. ນອກຈາກນີ້, ຍັງຈະມີການຈັດບັນຍາຍກ່ຽວກັບລະບົບລັດຖະກອນ ແລະ ລະບົບການປົກຄອງທ້ອງຖິ່ນຂອງຍີ່ປຸ່ນ ອີກດ້ວຍ.
ທ່ານ ໂຄອິຊຶມິ ໄດ້ສະແດງຄວາມຄາດຫວັງຕໍ່ຜົນສຳເລັດຂອງໂຄງການ ພ້ອມທັງ ຕັ້ງໜ້າລໍຖ້າທີ່ຈະຮັບຟັງຄວາມຄິດເຫັນຂອງບັນດານັກສຳມະນາກອນພາຍຫຼັງກັບມາ.
(ແຫຼ່ງຂ່າວ: ສະຖານທູດຍີ່່ປຸ່ນ)
ຄໍາເຫັນ