ເຂົ້າຮ່ວມພິທີໄວ້ອາໄລ ທ່ານ ເຈິ່ນດຶກເລືອງ ອະດີດປະທານປະເທດ ຢູ່ຫໍຈັດງານສົບແຫ່ງຊາດ ຮ່າໂນ້ຍ ມີທ່ານ ໂຕເລິມ ເລຂາທິການໃຫຍ່; ທ່ານ ເລືອງເກື່ອງ ປະທານປະເທດ, ທ່ານ ເຈິ່ນແທັງ ເໝິນ ປະທານສະພາແຫ່ງຊາດ, ບັນດາການນຳພັກ - ລັດ, ອະດີດການນຳພັກ - ລັດ, ຜູ້ຕາງໜ້າບັນດາກະຊວງ, ຄະນະຂະແໜງການ, ທ້ອງຖິ່ນ, ຜູ້ແທນສາກົນ ແລະ ປະຊາຊົນ.
ທ່ານ ເລືອງເກື່ອງ ປະທານປະເທດ ຫົວໜ້າຄະນະຈັດງານສົບ ກ່າວບົດໄວ້ອາໄລວ່າ: ທ່ານ ເຈິ່ນດຶກເລືອງ ແມ່ນແບບຢ່າງອັນໃສແຈ້ງກ່ຽວກັບການຮ່ຳຮຽນ, ປະຕິບັດຕາມແນວຄິດ, ຄຸນສົມບັດ ໂຮ່ຈິມິນ, ເປັນສະມາຊິກພັກກອມມູນິດທີ່ມີຄວາມຈົງຮັກພັກດີ, ບັນທັດຖານ. ການຈາກໄປຂອງທ່ານແມ່ນການສູນເສຍຢ່າງໃຫຍ່ຫຼວງສຳລັບພັກ - ລັດ, ປະຊາຊົນ ຫວຽດນາມ ແລະ ຄອບຄົວ. ທ່ານດຳລົງຊີວິດລວມອາຍຸ 88 ປີ, ອາຍຸພັກ 65 ປີ ແລະ 50 ປີແຫ່ງການເຄື່ອນໄຫວປະຕິວັດ, ທ່ານ ເຈິ່ນດຶກເລືອງ ໄດ້ມີການຝຶກຝົນຫຼໍ່ຫຼອມຢ່າງບໍ່ຢຸດຢັ້ງ, ອຸທິດຈົນສຸດຄວາມສາມາດຂອງຕົນໃຫ້ແກ່ພາລະກິດປະຕິວັດອັນສະຫງ່າລາສີຂອງພັກ, ຂອງຊາດ ແລະ ເພື່ອຄວາມຜາສຸກຂອງປະຊາຊົນ. ເຖິງວ່າຢູ່ໃນຖານະຕຳແໜ່ງໃດກໍຕາມ, ທ່ານ ເຈິ່ນດຶກເລືອງ ກໍລ້ວນແຕ່ປະຕິບັດໜ້າທີ່ຂອງຕົນໄດ້ເປັນຢ່າງດີ ແລະ ດີເລີດ, ແມ່ນແບບຢ່າງອັນໃສແຈ້ງກ່ຽວກັບຄຸນສົມບັດປະຕິວັດ, ເຫັນຜົນປະໂຫຍດສ່ວນ ລວມເໜືອກວ່າຜົນປະໂຫຍດສ່ວນຕົວ, ທັງຊີວິດສຸດຈິດສຸດໃຈເພື່ອປະຊາຊົນ”
ຫຼັງຈາກນັ້ນ, ຫີບສົບຂອງທ່ານ ເຈິ່ນດຶກເລືອງ ໄດ້ເຄື່ອນຍ້າຍໄປຍັງບ້ານເກີດຂອງທ່ານ ໂດຍທາງເຮືອບິນ ເພື່ອຈັດພິທີປົງສົບໃນເວລາ 15:00 ໂມງຂອງວັນດຽວກັນ ຢູ່ສຸສານຕາແສງ ໂຝແຄັງ ເທດສະບານ ດຶກໂຝ ແຂວງກວາງງາຍ.
ພິທີໄວ້ອາໄລ ແລະ ປົງສົບທ່ານ ເຈິ່ນດຶກເລືອງ ອະດີດປະທານປະເທດ ຫວຽດນາມ ໄດ້ຮັບການຖ່າຍທອດສົດຜ່ານຊ່ອງໂທລະພາບແຫ່ງຊາດ ຫວຽດນາມ ແລະ ວິທະຍຸກະຈາຍສຽງ ຫວຽດນາມ.
ທ່ານ ເຈິ່ນດຶກເລືອງ ອະດີດປະທານປະເທດ, ເກີດເມື່ອວັນທີ 5 ພຶດສະພາ 1937 ຢູ່ຕາແສັງ ໂຝແຄັງ ເມືອງດຶກໂຝ (ເທດສະບານດຶກໂຝ ປັດຈຸບັນ) ແຂວງກວາງງາຍ. ທ່ານເຂົ້າຮ່ວມການປະຕິວັດໃນເດືອນ ກຸມພາ 1955; ເຂົ້າເປັນສະມາຊິກພັກກອມມູນິດ ຫວຽດນາມ ໃນວັນທີ 19 ທັນວາ 1959.
ທ່ານເປັນກຳມະການຄະນະບໍລິຫານງານສູນກາງພັກຊຸດທີ V, VI, VII, VIII, IX; ກຳມະການກົມການເມືອງຊຸດທີ VIII, IX; ກຳມະການຜູ້ປະຈຳການກົມການເມືອງຊຸດທີ VIII; ຮອງປະທານສະພາລັດຖະມົນຕີ ແຕ່ເດືອນກຸມພາ 1987 ຮອດເດືອນກັນຍາ 1992; ຮອງນາຍົກລັດຖະມົນຕີ ແຕ່ເດືອນ ຕຸລາ 1992 ຮອດເດືອນສິງຫາ 1997; ນັບແຕ່ເດືອນກັນຍາ 1997 ຫາ ເດືອນມິຖຸນາ 2006 ເປັນປະທານປະທານປະເທດ ແຫ່ງ ສສ ຫວຽດນາມ ປະທານສະພາປ້ອງກັນຊາດ ແລະ ປ້ອງກັນຄວາມສະຫງົບ ຊຸດທີ X, ຊຸດທີ XI; ສະມາຊິກສະພາແຫ່ງຊາດບັນດາຊຸດທີ VII, VIII, X, XI.
ພາຍຫຼັງເຈັບເປັນມາໄລຍະໜຶ່ງ, ເຖິງວ່າໄດ້ຮັບການປິ່ນປົວຢ່າງສຸດຈິດສຸດໃຈຈາກພັກ, ລັດ, ແພດໝໍ ແລະ ການເບິ່ງແຍງດູແລຂອງຄອບຄົວແລ້ວກໍຕາມ, ແຕ່ຍ້ອນອາຍຸສູງ, ອາການເຈັບໜັກ, ທ່ານ ເຈິ່ນດຶກເລືອງ ອະດີດປະທານປະເທດ ໄດ້ເຖິງແກ່ມໍລະນະກຳໃນເວລາ 22 ໂມງ 51 ນາທີ ຂອງວັນທີ 20 ພຶດສະພາ 2025 (ກົງກັບວັນທີ 23 ເມສາ ປີມະເສັງ) ຢູ່ເຮືອນສ່ວນຕົວ.
ຄໍາເຫັນ