 |
ທ່ານ ສັນທະລັກ ຈ່າສານ ນາຍບ້ານໆວັດຈັນ ເມືອງຈັນທະບູລີ ນວ ໄດ້ໃຫ້ສຳພາດ ຕໍ່ນັກຂ່າວໜັງສືພິມປະຊາຊົນ ໃນວັນທີ 7 ຕຸລານີ້ ທີ່ງານບຸນຊ່ວງເຮືອທ່າວັດຈັນວ່າ: ການມີສ່ວນຮ່ວມຮັກສາຄວາມສະອາດໃນງານບຸນອອກພັນສາປະວໍລະນາ ແລະ ຊ່ວງເຮືອປະເພນີທີ່ທ່າວັດຈັນ ຈັດຂຶ້ນໃນລະຫວ່າງວັນທີ 4-8 ຕຸລານີ້ ອຳນາດການປົກຄອງໄດ້ມີການໂຄສະນາປຸກລະດົມໃຫ້ປະຊາຊົນພາຍໃນບ້ານວັດຈັນມີຄວາມສາມັກຄີເປັນຈິດໜຶ່ງໃຈດຽວ ກໍຄືປະຊາ ຊົນທີ່ເຂົ້າມາທ່ຽວພາຍໃນງານບຸນໃຫ້ພ້ອມກັນຮັກສາຄວາມສະອາດຈົບງາມ ເພື່ອຮັກສາສິ່ງ ແວດລ້ອມໃຫ້ຍືນຍົງ ແມ່ນປັດໄຈສຳຄັນໃນການຊຸກຍູ້ສົ່ງເສີມງານບຸນປະເພນີຂອງຊາດໃຫ້ຄົງຢູ່ຕະຫຼອດໄປ.
 |
ທ່ານ ສັນທະລັກ ຈ່າສານ ກ່າວໃຫ້ຮູ້ອີກວ່າ: ບ້ານວັດຈັນ ເປັນບ້ານໜຶ່ງໃນ 30 ບ້ານທີ່ມີສ່ວນຮ່ວມໃນການຈັດງານບຸນຊ່ວງເຮືອປະຈຳປີ 2025 ທີ່ທ່າວັດຈັນ ເມືອງຈັນທະບູລີ ນວ ໂດຍທ່ານໄດ້ປຸກລະດົມໃຫ້ປະຊາຊົນພາຍໃນບ້ານມີຄວາມສາມັກຄີເປັນຈິດໜຶ່ງໃຈດຽວກັນໃນການຮັກສາຄວາມສະອາດ. ປີນີ້ເປັນປີພິເສດທີ່ມີການຈັດປະກວດເຮືອໄຟສາມລໍາໃນ 30 ບ້ານ, ໃນນັ້ນ 10 ບ້ານຈະໄດ້ຮ່ວມກັນປະດິດເຮືອໄຟຕໍ່ໜຶ່ງລໍາ; ນີ້ເປັນການສະແດງເຖິງຄວາມສາມັກຄີຂອງປະຊາຊົນລາວບັນດາເຜົ່າ ສ່ອງແສງໃຫ້ເຫັນວັດທະນະທຳອັນຈົບງາມຜ່ານເຮືອໄຟ, ພ້ອມດຽວກັນນັ້ນ, ທ່ານຍັງໄດ້ຮຽກຮ້ອງໃຫ້ທຸກຄົນ ທຸກພາກສ່ວນທີ່ມາຮ່ວມພາຍໃນງານບຸນໃຫ້ພ້ອມໃຈກັນປັກຮັກຮັກສາຮີດຄອງປະເພນີອັນດີງາມຂອງຊາດ ແລະ ທ່ຽວງານບຸນໃຫ້ມ່ວນຊື່ນ ຮັກສາໄດ້ຄວາມສະຫງົບປອດໄພ ແລະ ມີສ່ວນຮ່ວມໃນການຮັກສາຄວາມສະອາດຊ່ວຍກັນ ກໍຄືຖິ້ມສິ່ງເສດເຫຼືອໃຫ້ຖືກບ່ອນທີ່ທາງຄະນະກຳມະການຈັດງານບຸນໄດ້ວາງໄວ້ແຕ່ລະຈຸດ.
 |
ຄໍາເຫັນ