ການປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V ນີ້ ແມ່ນເຫດການປະຫວັດສາດ ທີ່ມີຄວາມໝາຍສໍາຄັນທີ່ສຸດ ໃນຊີວິດການເມືອງຂອງປະຊາຊົນລາວບັນດາເຜົ່າ ທົ່ວທັງຊາດ ລວມທັງພົນລະເມືອງລາວທີ່ດຳລົງຊີວິດ ແລະປະຕິບັດໜ້າທີ່ວຽກງານຢູ່ຕ່າງປະເທດ, ເປັນຂີດໝາຍສໍາຄັນຍິ່ງອີກຄັ້ງໜຶ່ງ ໃນການເສີມຂະຫຍາຍ ແລະ ປະຕິບັດສິດປະຊາທິປະໄຕ ຂອງປະຊາຊົນລາວບັນດາເຜົ່າ ໃນຖານະຜູ້ເປັນເຈົ້າຂອງອໍານາດລັດ ຂອງສາທາລະນະລັດ ປະຊາທິປະໄຕ ປະຊາຊົນລາວ.
ການເລືອກຕັ້ງ ສສຊ ແລະ ສສຂ ແມ່ນຂະບວນການປະຕິບັດໜ້າທີ່ການເມືອງ ແລະ ສິດປະຊາທິປະໄຕ ຂອງພົນລະເມືອງລາວ ໃນການເລືອກເອົາບຸກຄົນທີ່ມີມາດຕະຖານຄົບຖ້ວນ ເຂົ້າໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອເປັນຕົວແທນປະຕິບັດສິດອຳນາດ ຂອງປະຊາຊົນລາວບັນດາເຜົ່າ. ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຄັ້ງນີ້, ຍິ່ງມີຄວາມໝາຍສໍາຄັນ ເພາະວ່າເປັນການສືບຕໍ່ສ້າງ ແລະ ບູລະນະລັດປະຊາທິປະໄຕ ປະຊາຊົນ ໃຫ້ໜັກແໜ້ນ, ເຂັ້ມແຂງ ໂດຍສະເພາະແມ່ນການປັບປຸງບູລະນະສະພາແຫ່ງຊາດ ແລະ ສະພາປະຊາຊົນຂັ້ນແຂວງໃຫ້ສົມບູນ, ໃນຖານະເປັນອົງກອນໜຶ່ງໃນລະບົບອຳນາດລັດ ແລະ ລະບົບການເມືອງຂອງ ສປປ ລາວ ໃຫ້ນັບມື້ເຂັ້ມແຂງ. ສະນັ້ນ, ການຄັດເລືອກເອົາຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າເຂົ້າໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແມ່ນໜ້າທີ່ ແລະ ຄວາມຮັບຜິດ ຊອບໂດຍກົງຂອງທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດ.
ການເລືອກຕັ້ງສະມາຊິກ ສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ແມ່ນມີຂຶ້ນໃນເວລາທີ່ພັກປະຊາຊົນ ປະຕິວັດລາວ ກຳອຳນາດມາໄດ້ 50 ປີ ແລະ ກໍແມ່ນ 50 ປີ ແຫ່ງການເຕີບໃຫຍ່ຂະຫຍາຍຕົວ ຂອງລັດ ສາທາລະນະລັດ ປະຊາທິປະໄຕ ປະຊາຊົນລາວ ກໍຄືສະພາແຫ່ງຊາດ ແລະ ສະພາປະຊາຊົນຂັ້ນແຂວງຢູ່ໃນທ່າມກາງບັນຍາກາດ ທີ່ສະພາບການຂອງໂລກ, ພາກພື້ນພວມມີການຜັນແປຢ່າງສັບສົນ, ຄາດຄະເນໄດ້ຍາກ ທີ່ສົ່ງຜົນກະທົບທາງດ້ານຕັ້ງໜ້າ ແລະ ຫຍໍ້ທໍ້ຕໍ່ ພາລະກິດປົກປັກຮັກສາ ແລະ ສ້າງສາປະເທດຊາດ ຂອງພວກເຮົາ. ຢູ່ພາຍໃນປະເທດ, ພວກເຮົາຍັງສືບຕໍ່ປະສົບກັບຄວາມຫຍຸ້ງຍາກທາງດ້ານເສດຖະກິດ-ການເງິນ. ສະນັ້ນ, ການເລືອກຕັ້ງຄັ້ງນີ້ ຈຶ່ງມີຄວາມໝາຍສໍາຄັນເປັນພິເສດ ຊຶ່ງຮຽກຮ້ອງໃຫ້ພົນລະເມືອງລາວ ຜູ້ມີສິດເລືອກຕັ້ງທຸກຄົນຍິ່ງຕ້ອງເພີ່ມທະວີຄວາມສາມັກຄີເປັນປຶກແຜ່ນພາຍໃນຊາດ ແລະ ລະຫວ່າງເຜົ່າຕ່າງໆ, ເພື່ອເຮັດໃຫ້ການເລືອກຕັ້ງໃນຄັ້ງນີ້ ດໍາເນີນໄປດ້ວຍຜົນສໍາເລັດຕາມລະດັບຄາດໝາຍທີ່ວາງໄວ້. ໃນມະຕິຂອງກົມການເມືອງສູນກາງພັກ ສະບັບ ເລກທີ 26/ກມສພ, ລົງວັນທີ 12 ກັນຍາ 2025 ວ່າດ້ວຍການເພີ່ມທະວີການນໍາພາ-ຊີ້ນໍາ ຂອງ ອົງຄະນະພັກທຸກຂັ້ນ ຕໍ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ທີ່ໄດ້ວາງຈຸດປະສົງ ແລະ ລະດັບຄາດໝາຍ 400% ຄື: ໜຶ່ງ; ຮັບປະກັນໃຫ້ຜູ້ມີສິດປ່ອນບັດ ຕື່ນຕົວໄປໃຊ້ສິດເລືອກຕັ້ງໃຫ້ໄດ້ 100%. ສອງ; ຜູ້ມີສິດເລືອກຕັ້ງຮູ້ນໍາໃຊ້ສິດຕາມກົດໝາຍ ວ່າດ້ວຍ ການເລືອກຕັ້ງ ແລະ ລະບຽບການປ່ອນບັດ ໃຫ້ໄດ້ 100%. ສາມ; ຮັບປະກັນຄວາມສະຫງົບປອດໄພໃຫ້ການເລືອກຕັ້ງ 100%. ສີ່; ການເລືອກຕັ້ງມີຄວາມໂປ່ງໃສ ແລະ ທັນເວລາ 100%.
ໃນນາມສື່ມວນຊົນລາວ ທີ່ເປັນສຽງຂອງສູນກາງພັກ ປະຊາຊົນ ປະຕິວັດລາວ, ໜັງສືພິມປະຊາຊົນ ຂໍຖືເອົາໂອກາດນີ້ຮຽກຮ້ອງໄປຍັງພົນລະເມືອງລາວບັນດາເຜົ່າ ຜູ້ມີສິດເລືອກຕັ້ງທຸກຄົນ ແຕ່ອາຍຸ 18 ປີຂຶ້ນໄປ ຈົ່ງພ້ອມກັນໄປໃຊ້ສິດໃນວັນເລືອກຕັ້ງໃຫ້ຄົບຖ້ວນ ເຮັດໃຫ້ການເລືອກຕັ້ງຄັ້ງນີ້ບັນລຸຈຸດປະສົງ ແລະ ລະດັບຄາດໝາຍທີ່ວາງໄວ້, ແນໃສ່ປັບປຸງ ແລະ ຍົກສູງບົດບາດຂອງສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ສູ່ບາດລ້ຽວໃໝ່, ປະກອບສ່ວນທີ່ສໍາຄັນໃນການສ້າງລັດ ປະຊາທິປະໄຕ ປະຊາຊົນຂອງພວກເຮົາ ໃຫ້ເປັນລັດທີ່ປົກຄອງດ້ວຍກົດໝາຍ ຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ເພື່ອສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດ ກ້າວໄປສູ່ໄລຍະການພັດທະນາດ້ວຍຄຸນນະພາບໃໝ່ ຕາມມະຕິຂອງກອງປະຊຸມໃຫຍ່ຄັ້ງທີ XII ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງລັດ 5 ປີ ຄັ້ງທີ X (2026-2030) ໃຫ້ປະກົດຜົນເປັນຈິງ ເພື່ອກ້າວຂຶ້ນສູ່ສັງຄົມນິຍົມເທື່ອລະກ້າວຢ່າງໜັກແໜ້ນ.
ຄໍາເຫັນ