ທ່ານ ດາວວີ ສວຍທະລັງສີ ຫົວໜ້າພະແນກອຸດສາຫະກຳ ແລະ ການຄ້າແຂວງ ໃຫ້ສຳພາດວ່າ: ການຈັດງານຄັ້ງນີ້, ຈະມີ 4 ແຂວງພາກໃຕ້ຂອງລາວ, ຣາຊະອານາຈັກໄທ ແລະ ສສ ຫວຽດນາມ ເຂົ້າຮ່ວມ ແລະ ຈະຈັດຂຶ້ນໃນ ລະຫວ່າງວັນທີ 21-25 ພຶດສະພາ 2025 ໂດຍມີ 4 ກິດຈະກໍາສໍາຄັນ ຄື: ສຳມະນາດ້ານການຄ້າ, ການລົງທຶນ, ການທ່ອງທ່ຽວ ເພື່ອພັດທະນາເສດຖະກິດຕາມແລວຕາເວັນອອກ-ຕາເວັນຕົກ 3 ປະເທດ. ງານວາງສະແດງສິນຄ້າ ແລະ ງານຕະຫຼາດນັດ ຈະມີການແລກປ່ຽນສິລະປະ-ວັດທະນະທໍາ ບັນດາເຜົ່າ 4 ແຂວງພາກໃຕ້ຂອງລາວ ແລະ ເທສະການຕະຫຼາດນັດແຮງງານ ຊຶ່ງທາງຄະນະກຳມະການຈັດງານ ໄດ້ເປັນເຈົ້າການປະສານສົມທົບ ກັບທຸກພາກສ່ວນກ່ຽວຂ້ອງ ພ້ອມກັນຈັດຕັ້ງປະຕິບັດໃຫ້ສຳເລັດຕາມຄາດໝາຍ.
ທ່ານ ດາວວິ ສວຍທະລັງສີ ກ່າວຕື່ມວ່າ: ສຳລັບບ່ອນວາງສະແດງສິນຄ້າ ທີ່ກະກຽມໄວ້ ມີທັງໝົດ 47 ບຸດ ເພື່ອຮອງຮັບ ສິນຄ້າຈາກ ລາວ 34 ບຸດ, ຈາກຫວຽດນາມ 12 ບຸດ ແລະ ຈາກປະເທດໄທ 1 ບຸດ. ໃນນັ້ນ, ຈະມີສິນຄ້າໂອດອບ, ອຸປະໂພກ-ບໍລິໂພກ, ເຄື່ອງໃຊ້ສອຍທົ່ວໄປ, ເຄື່ອງນຸ່ງຫົ່ມ ແລະ ພິເສດ ຈະມີສິນຄ້ານະວັດຕະກຳໃໝ່ ຄື: ລົດໄຟຟ້າ ໂດຍແມ່ນບໍລິສັດ ຂາເຂົ້າ-ຂາອອກ ເມືອງລະມາມ ເປັນຜູ້ນຳມາຈຳໜ່າຍ ພ້ອມເປີດໂຕຢູ່ແຂວງເຊກອງ. ນອກນັ້ນ, ກໍຍັງມີສິນຄ້າອື່ນໆ ໃຫ້ເລືອກຊື້ ເລືອກຈ່າຍ ອີກຢ່າງຫຼວງຫຼາຍ.
(ຂ່າວ: ອັດສະວິນ)
ຄໍາເຫັນ