ຜົນສຳເລັດການຈັດຕັ້ງປະຕິບັດໃນ 2 ປີເຄິ່ງ ຂອງ ພຜທ ແຂວງສະຫວັນນະເຂດ

ໂດຍ: ພັດ ລໍວັນໄຊ      ທ່ານ ຄຳຜຸຍ ສີບຸນເຮືອງ ຫົວໜ້າພະແນກແຜນການ ແລະ ການລົງທຶນ(ພຜທ) ໄດ້ໃຫ້ສຳພາດຕໍ່ນັກຂ່າວວ່າ: ຜ່ານການຈັດຕັັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະກາງສະໄໝ (2 ປີເຄິງ) ແມ່ນສືບຕໍ່ຂະຫຍາຍຕົວສະເລ່ຍ 7,33%, ມູນຄ່າ 25.910,19 ຕື້ກີບ; ສະເລ່ຍລາຍຮັບຕໍ່ຫົວຄົນ 23,52 ລ້ານກີບ/ຄົນ, ການຂະຫຍາຍຕົວຂອງເສດຖະກິດ ຂອງແຂວງເຫັນໄດ້ຊັດເຈນພາຍຫຼັງການແຜ່ລະບາດພະຍາດໂຄວິດ-19 ເສດຖະກິດຂະຫຍາຍຕົວສ່ວນໃຫຍ່ນອນໃນຂະແໜງການຊັບພະຍາກອນທໍາມະຊາດໂດຍສະເພາະການຂຸດຄົ້ນແຮ່ຄຳ, ອຸດສາຫະກຳຜະລິດເຫຍື້ອເຈ້ຍ ແລະ ການຜະລິດກະສິກຳ, ເປັນຂະແໜງທີິ່ປະກອບສ່ວນສຳຄັນເຮັດໃຫ້ເສດຖະກິດເຕີບໂຕ. ດ້ານງົບປະມານ: ສາມາດຈັດເກັບລາຍຮັບ 57,13% ແລະ ລາຍຈ່າຍງົບປະມານປະຕິບັດໄດ້ເທົ່າກັບ 40,62% ຂອງແຜນການ 5 ປີ, ສຳລັບດຸນດ່ຽງງົບປະມານ: ເລີ່ມແຕ່ປີ 2021-2022 ແຂວງສະຫວັນນະເຂດສູນກາງໄດ້ດຸນດ່ຽງມາໃຫ້ແຂວງຈຳນວນ 172,80 ຕື້ກີບ, ດ້ານແຫຼ່ງທຶນເພື່ອການພັດທະນາ: ແຫຼ່ງທຶນພັດທະນາແຂວງມີທັງໝົດ 5 ແຫຼ່ງທຶນ ຜ່ານການຈັດຕັ້ງປະຕິບັດໃນໄລຍະກາງສະໄໝ (2 ປີເຄິ່ງ) ໄດ້ທັງໝົດ: 11.866,69 ຕື້ກີບ, ກວມເອົາ 15,56% ຂອງມູນຄ່າລວມສະເລ່ຍ (GDP) ຊຶ່ງໃນນີ້ການລົງທຶນເອກະຊົນພາຍໃນ-ຕ່າງປະເທດ: ສາມາດດຶງດູດການລົງທຶນໄດ້ທັງໝົດ 607 ວິສາຫະກິດ, ມີມູນຄ່າ 3.130,32 ຕື້ກີບ, ພິເສດແມ່ນການປະກອບສ່ວນທຶນຂອງປະຊາຊົນເຂົ້າໃນການກໍ່ສ້າງພື້ນຖານໂຄງລ່າງເປັນຕົ້ນ:ກໍ່ສ້າງເສັ້ນທາງເບຕົງຂອງປະຊາ ຊົນແຕ່ລະບ້ານເປັນຂະບວນຟົດຟື້ນເຊັ່ນ: ຂົວ, ໂຮງຮຽນ,ໂຮງໝໍ ແລະ ອື່ນໆປະຕິບັດໄດ້ 26,25 ຕື້ກີບ.     ສຳລັບການຊຸກຍູ້ສົ່ງເສີມການຜະລິດຂອງປະຊາຊົນແມ່ນ ປະຊາຊົນສຸມໃສ່ການຜະລິດເຂົ້າ, ແຂວງເຮົາມີເຂົ້າເຫຼືອກິນ, ສາມາດສົ່ງອອກເຂົ້າສານໄປຕ່າງປະເທດໄດ້ 30 ພັນກວ່າໂຕນມູນຄ່າ 10 ລ້ານກວ່າໂດລາ, ພືດສະບຽງອາຫານ ແລະ ສະໜອງທາດຊີ້ນ, ປາ ພຽງພໍຕາມຄວາມຕ້ອງການບໍລິໂພກຂອງປະຊາຊົນພາຍໃນແຂວງ(ຊີ້ນໝູເຫຼືອກິນ). ຂາດພຽງແຕ່ໄຂ່ທີ່ຍັງບໍທັນກຸ້ມກິນ ຊຶ່ງຄວາມຕ້ອງການບໍລິໂພກໄຂ່ 473,58 ໂຕນ/ເດືອນ. ດ້ານອຸດສາຫະກຳ ແລະ ການຄ້າມູນຄ່າຈໍລະຈອນສິນຄ້າພາຍໃນແຂວງໄລຍະກາງສະໄໝປະຕິບັດໄດ້ 12.485,5 ຕື້ກີບ, ເທົ່າກັບ 41,23% ຂອງແຜນການ 5 ປີ ແລະ ສາມາດສົ່ງອອກສິນຄ້າໄດ້ 4.394,46 ລ້ານໂດລາ, ເທົ່າກັບ 43,52%ຂອງແຜນການ 5 ປີມູນຄ່າສົ່ງອອກສ່ວນໃຫຍ່ແມ່ນຊິ້ນສ່ວນອີເລັກໂຕຣນິກ;ດ້ານພັດທະນາຊົນນະບົດແລະແກ້ໄຂຄວາມທຸກຍາກໃນທົ່ວແຂວງສະຫວັນນະເຂດມີ 14 ເມືອງ,1 ນະຄອນ,ມີ 1.033 ບ້ານ,174.110 ຄອບຄົວ,183.073 ຄົວເຮືອນ,ພົນລະເມືອງ 1.101.336 ຄົນ,ຜ່ານການສູ້ຊົນ 2,5 ປີຜ່ານມາສ້າງຄອບຄົວພົ້ນທຸກທັງໝົດ 140.480 ຄອບຄົວ, ເທົ່າກັບ 83% ຂອງຄອບຄົວທັງໝົດໃນແຂວງໃນນັ້ນ: ມີຄອບຄົວພັດທະນາ 105.540 ຄອບຄົວ, ເທົ່າກັບ 62%, ຂອງຄອບຄົວທັງໝົດໃນແຂວງ, ບ້ານພົ້ນທຸກ 726 ບ້ານ,ເທົ່າກັບ 70,34% ຂອງຈໍານວນບ້ານທັງໝົດທົ່ວແຂວງ, ໃນນັ້ນ: ມີບ້ານພັດທະນາ 147 ບ້ານ, ເທົ່າກັບ 62% ຂອງຈໍານວນບ້ານທັງໝົດທົ່ວແຂວງ, ເມືອງພົ້ນທຸກ 6 ເມືອງຄື: ນະຄອນໄກສອນພົມວິຫານ, ເມືອງໄຊບູລີ, ສອງຄອນ, ຈໍາພອນ, ໄຊພູທອງ ແລະ ອຸທຸມພອນ. ໂດຍອີງໃສ່ມາດຕະຖານພົ້ນທຸກ ແລະ ມາດຕະຖານການພັດທະນາຕາມດໍາລັດ 348/ລບ, ລົງວັນທີ 16 ພະຈິກ 2017, ໃນທົ່ວແຂວງສະຫວັນນະເຂດຍັງອີກ 9 ເມືອງທີ່ບໍ່ທັນພົ້ນທຸກປະກອບມີ: 1) ເມືອງອາດສະພັງທອງ; 2) ເມືອງອາດສະພອນ 3) ເມືອງວິລະບູລີ;  4) ເມືອງຊົນນະບູລີ; 5) ເມືອງທ່າປາງທອງ; 6) ເມືອງພະລານໄຊ 7) ເມືອງພີນ; 8) ເມືອງເຊໂປນ ແລະ 9) ເມືອງນອງ. ແລະ ການສ້າງເງື່ອນໄຂໃຫ້ເມືອງນອງກາຍເປັນເມືອງພົ້ນທຸກ, ມາຮອດໄລຍະກາງສະໄໝມີບ້ານພົ້ນທຸກ 1 ບ້ານ (ຍັງບໍ່ທັນພົ້ນທຸກ 67 ບ້ານ), ດ້ານສຶກສາທິການ ແລະ ກິລາ: ໃນໄລຍະ 2 ປີເຄິ່ງຜ່ານມາຕໍ່ກັບຂໍ້ສະດວກ, ຫຍຸ້ງຍາກ ແລະ ສິ່ງທ້າທາຍເຫັນວ່າການຈັດຕັ້ງປະຕິບັດໃນ 15 ຄາດໝາຍເຫັນວ່າສາມາດບັນລຸໄດ້ 6 ຄາດໝາຍ ແລະ ຍັງອີກ 9 ຄາດໝາຍມີຄວາມຄືບໜ້າຊ້າ., ດ້ານສາທາລະນະສຸກ:ມີ 11 ຄາດໝາຍ ຊຶ່ງມີຄວາມຄືບໜ້າດີ 8 ຄາດໝາຍ, ຄວາມຄືບໜ້າຫຼ້າຊ້າ 3 ຄາດໝາຍເປັນຕົ້ນແມ່ນ: ອັດຕາການສັກຢາກັນພະຍາດໃນເດັກອາຍຸຕໍ່າກວ່າ 1 ປີ ອັດຕາການຊົມໃຊ້ວິດຖ່າຍ, ອັດຕາການສ້າງບ້ານສາທາລະນະສຸກແບບຢ່າງ, ດ້ານວັດທະນະທໍາ ແລະ ທ່ອງທ່ຽວ:ໄດ້ເອົາໃສ່ບູລະນະສ້ອມແປງເສັ້ນທາງວົງຈອນທ່ອງທ່ຽວຕ່າງໆເພື່ອອຳນວຍຄວາມສະດວກໃຫ້ແກ່ນັກທ່ອງທ່ຽວພ້ອມທັງໄດ້ຊຸກຍູ້ຂະແໜງການກ່ຽວຂ້ອງ ແລະ ຜູ້ປະກອບການສ້າງເງື່ອນໄຂດຶງດູດນັກທ່ອງທ່ຽວເຂົ້າມາທ່ຽວພາຍໃນແຂວງມີທັງໝົດ 541.806 ເທື່ອຄົນ, ເທົ່າກັບ 35,86% ໂດຍສະເລ່ຍການສ້າງກິດຈະກຳດຶງດູດນັກທ່ອງທ່ຽວໄດ້ 41 ກິດຈະກຳ/ປີ. ທິດທາງ, ວຽກຈຸດສຸມໃນໄລຍະທ້າຍສະໄໝ (2 ປີເຄິ່ງ) ແມ່ນ:ຮັບປະກັນໃຫ້ແຂວງສະຫວັນນະເຂດມີສະຖຽນລະພາບທາງດ້ານການເມືອງ,ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມຢ່າງໜັກແໜ້ນ, ສ້າງສັງຄົມສາມັກຄີປອງດອງ, ສີວິໄລ ແລະ ຍຸຕິທຳ; ຊຸກຍູ້ການພັດທະນາເສດຖະກິດໃຫ້ຂະຫຍາຍຕົວຢ່າງຕໍ່ເນື່ອງຕາມທິດທີ່ແຜນ 5 ປີຄັ້ງທີ IX (2021-2025) ກໍານົດໄວ້ ໂດຍຊຸກຍູ້ແລະສົ່ງເສີມໃນ 3 ຂະແໜງການ (ກະສິກຳ-ປ່າໄມ້, ອຸດສາຫະກຳແລະບໍລິການ) ໃຫ້ມີຄວາມເຂັ້ມແຂງສາມາດສືບຕໍ່ດຳເນີນໄດ້ຢ່າງປົກກະຕິອີງໃສ່ກາລະໂອກາດ, ທ່າແຮງບົ່ມຊ້ອນ ແລະ ເງື່ອນໄຂທີ່ເອື້ອອຳນວຍເພື່ອເຮັດໃຫ້ເສດຖະກິດຂອງແຂວງສືບຕໍ່ຂະຫຍາຍຕົວຢ່າງໝັ້ນທ່ຽງ; ສືບຕໍ່ສູ້ຊົນເຮັດໃຫ້ເສດຖະກິດ (GDP) ຂະຫຍາຍຕົວຢູ່ໃນລະດັບສະເລ່ຍ 7,72% ຕໍ່ປີ ແລະ ຮອດປີ 2025 ສະເລ່ຍລາຍໄດ້ຕໍ່ຫົວຄົນ 28,05 ລ້ານກີບ, ໂດຍການຫັນປ່ຽນໂຄງປະກອບເສດຖະກິດໄປຕາມທິດທີ່ມີຄຸນນະພາບ, ຍືນຍົງ ແລະ ສີຂຽວ, ສູ້ຊົນເກັບລາຍຮັບໃນທ້າຍສະໄໝທັງໝົດໃຫ້ໄດ້: 6.236,36 ຕື້ກີບ; ລື່ນແຜນ 22,71% ຫຼືເພີ່ມຂຶ້ນເທົ່າກັບ 2.159,86 ຕື້ກີບ ເນື່ອງຈາກສູນກາງໄດ້ມອບຫົວໜ່ວຍທຸລະກິດໃຫ້ແຂວງຄຸ້ມຄອງເພື່ອໃຫ້ແຂວງເປັນແຂວງເກີນດຸນທາງດ້ານງົບປະມານຕາມຂໍ້ຕົກລົງສະບັບເລກທີ 0698/ກງ, ລົງວັນທີ 10 ມີນາ 2023, ສະນັ້ນ, ຈຶ່ງເຮັດໃຫ້ໂຕເລກໄລຍະທ້າຍສະໄໝມີການປ່ຽນແປງຄາດຄະເນຈະເກີນແຜນຕາມຈຳນວນດັ່ງກ່າວ, ສືບຕໍ່ເອົາໃຈໃສ່ຊຸກຍູ້-ສົ່ງເສີມພັດທະນາຊັບພະຍາກອນມະນຸດໂດຍຂະຫຍາຍການສຶກສາກ່ອນໄວຮຽນໃຫ້ທົ່ວເຖິງ; ຊຸກຍູ້ການເຂົ້າຮຽນໃນທຸກຊັ້ນຮຽນ; ຍົກສູງຄຸນນະພາບການຮຽນ-ການສອນຊັ້ນມັດທະຍົມສຶກສາແລະຫຼັງສຶກສາໃຫ້ດີຂຶ້ນພ້ອມທັງສົ່ງເສີມການຄົ້ນຄ້ວາວິທະຍາສາດແລະນະວະຕະກຳໃໝ່ໆ, ສືບຕໍ່ສ້າງເງື່ອນໄຂເພື່ອບັນລຸຄາດໝາຍ ດ້ານສາທາລະນະສຸກທີ່ຍັງບໍ່ທັນສາມາດບັນລຸໃນປີຜ່ານມາໂດຍສະເພາະອັດຕາການຊັກວັກຊິນຂອງເດັກ, ອັດຕາການຊົມໃຊ້ວິດຖ່າຍຄົວເຮືອນ ແລະ ບ້ານສາທາລະນະສຸກແບບຢ່າງ, ສືບຕໍ່ຊຸກຍູ້ພັດທະນາພື້ນຖານໂຄງລ່າງທີ່ເປັນເງື່ອນໄຂໃຫ້ແກ່ການແກ້ໄຂຄວາມທຸກຍາກໃນເຂດຈຸດສຸມບູລີມະສິດຂອງແຂວງ ແລະ ເມືອງເພື່ອຊຸກຍູ້ບັນລຸມາດຕະຖານຕາມດຳລັດ 348/ລບ ໂດຍສະເພາະການພັດທະນາ ອາຊີບສ້າງລາຍຮັບຄົງທີ່ ແລະ ຍາວນານຕາມຄວາມອາດສາມາດເພື່ອຮັບປະກັນຫຼຸດຜ່ອນອັດຕາຄວາມທຸກຍາກຂອງແຂວງຫຼຸດລົງໄດ້ຢ່າງຊິ້ນເຊີງ, ສົ່ງເສີມສ້າງວຽກເຮັດງານທຳສູ່ຕະຫຼາດພາຍໃນ ແລະ ຕ່າງປະເທດ ຄຽງຄູ່ກັບການພັດທະນາສາຂາວິຊາຊີບທີ່ຖືກຕ້ອງສອດຄ່ອງກັບຄວາມຕ້ອງການຂອງຕະຫຼາດແຮງງານ, ສຸມໃສ່ສ້າງເງື່ອນໄຂເພື່ອລຶບລ້າງຄວາມທຸກຍາກໃນ 4 ຈຸດສຸມບູລິມະສິດຂອງແຂວງຄື:1. ສືບຕໍ່ແກ້ໄຂຄວາມທຸກຍາກຈຸດສຸມຄຳປະແໜເມືອງຊົນນະບູລີ. ຈຸດສຸມຕັງອາໄລ-ລະແບງໃຫ້ເປັນຕົວເມືອງນ້ອຍໃນຊົນນະບົດ. ຈຸດສຸມແກ້ງລີ້ນເມືອງນອງ. ຈຸດສຸມຈຽງຕູບເມືອງເຊໂປນ. ນອກຈາກນັ້ນ ທ່ານຍັງໃຫ້ຮູ້ຕື່ມອີກວ່າ: ສຳລັບການຈັດຕັ້ງປະຕິບັດ 9 ເດືອນປີ 2023 ແມ່ນຂະຫຍາຍຕົວຢູ່ໃນລະດັບ 6,40%, ມູນຄ່າ 17.385,75 ຕື້ກີບ, ເທົ່າກັບ 65,26% ຂອງແຜນການປີ, ສະເລ່ຍໃສ່ພົນລະເມືອງໄດ້ 15.790.890 ກີບ/ຄົນຫຼືເທົ່າກັບ 877 ໂດລາ/ຄົນ, (ແຜນການຕາມມະຕິ 24.197.124ກີບ) ໃນນັ້ນ: ກະສິກຳ:  ຂະຫຍາຍຕົວ 2,22%, ຫຼຸດແຜນການປີຢູ່ 1,78% (ແຜນການປີ 4,00%), ກວມເອົາ21,23%,ມູນຄ່າລວມທັງໝົດ 3.690,17 ຕື້ກີບ, ເທົ່າກັບ54,16% ຂອງແຜນການປີ (ແຜນການປີ 6.813,94 ຕື້ກີບ); ອຸດສາຫະກຳ: ຂະຫຍາຍຕົວ 8,05%, ຫຼຸດແຜນການປີ 1,55%, (ແຜນການປີ 9,60%), ກວມເອົາ 45,55%, ມູນຄ່າລວມທັງໝົດ 7.919,41ຕື້ກີບ, ເທົ່າກັບ 75,08% ຂອງແຜນການ (ແຜນການປີ 10.548,12 ຕື້ກີບ); ບໍລິການ: ຂະຫຍາຍຕົວ 6,4% ຫຼຸດແຜນການປີ 1,86%, (ແຜນການປີ 8,26%), ກວມເອົາ 33,22%, ມູນຄ່າລວມທັງໝົດ 5.776,17 ຕື້ກີບ, ເທົ່າກັບ 62,25% ຂອງແຜນການ (ແຜນການປີ 9.278,93 ຕື້ກີບ). ໂດຍລວມແລ້ວສັງເກດເຫັນວ່າໃນໄລຍະ 1 ປີມານີ້ພາຍຫຼັງທີ່ມີການຜ່ອນຄາຍການແຜ່ລະບາດຂອງພະຍາດໂຄວິດ-19  ສະພາບການລົງທຶນເອກະຊົນທັງພາຍໃນ ແລະ ຕ່າງປະເທດຢູ່ແຂວງພວກເຮົາໄດ້ເລີ່ມກັບມາມີບັນຍາກາດທີ່ດີຂຶ້ນຫຼາຍ, ເຖິງວ່າສະພາບຄວາມບໍ່ແນ່ນອນຂອງສົງຄາມການຄ້າ-ການລົງທຶນຂອງໂລກ, ບັນຫາລາຄານໍ້າມັນແພງແລະອັດຕາເງິນເຟີ້ທີ່ສູງຊຶ່ງເປັນປັດໄຈໜຶ່ງທີ່ບໍ່ສາມາດປະຕິເສດໄດ້ແຕ່ກໍ່ເຫັນວ່າການລົງທຶນພາກເອກະຊົນຢູ່ແຂວງສະຫວັນນະເຂດກໍມີທ່າອ່ຽງທີ່ດີໃນປີ 2023 ນີ້.