ຜົນສໍາເລັດການສໍາຫຼວດ ແລະປະເມີນຊັບພະຍາກອນປ່າໄມ້ໃນປີ2023ຜ່ານມາ

ໂດຍ:ຕະວິນຍານ
ສປປລາວເປັນປະເທດທີ່ມີຄວາມອຸດົມສົມບູນໄປດ້ວຍຊັບພະຍາກອນປ່າໄມ້ເຄື່ອງປ່າຂອງດົງຫຼາຍຊະນິດ ຈໍານວນໜຶ່ງເປັນສິນຄ້າສະໜອງຢູ່ພາຍໃນແລະຈໍານວນໜຶ່ງສົ່ງອອກໄປຕ່າງປະເທດ.ສະນັ້ນ,ເພື່ອເຮັດໃຫ້ຊັບພະຍາກອນມີຊົມໃຊ້ຢ່າງຍືນຍົງ,ການຂຸດຄົ້ນຖືກຕ້ອງຕາມກົດໝາຍ ໂດຍສະເພາະບໍ່ໃຫ້ດັບສູນ; ໃນແຕ່ລະປີກົມປ່າໄມ້ກະຊວງກະສິກໍາ-ປ່າໄມ້ຈຶ່ງໄດ້ລົງສໍາຫຼວດ ເກັບກໍາຂໍ້ມູນໄມ້, ທີ່ດິນປ່າໄມ້ ແລະ ເຄື່ອງປ່າຂອງດົງທີ່ລັດຄຸ້ມຄອງ ແລະ ຂອງບໍລິສັດສໍາປະທານ.
ທ່ານສົມຫວັງພິມມະວົງຫົວໜ້າກົມປ່າໄມ້ກະຊວງກະສິກໍາ-ປ່າໄມ້ກ່າວວ່າ:ໃນປີ 2023 ຜ່ານມາ,ກົມປ່າໄມ້ ໄດ້ລົງສໍາຫຼວດປະເມີນ ຊັບພະຍາກອນປ່າໄມ້ ທີ່ໂຄງການສະເໜີປູກໄມ້ອຸດສະຫະກຳ ຕິດພັນກັບການທ່ອງທ່ຽວເຂດບ້ານໜອງຫີນ,ບ້ານໜອງມ່ວງ ແລະ ບ້ານມັດກາ ເມືອງສະໜາມໄຊ ແຂວງອັດຕະປື ຂອງກຸ່ມບໍລິສັດ ຮົງກົງທຽນຊື ຈຳກັດ;ໃນເນື້ອທີ່ທັງໝົດ 4.699 ເຮັກຕາ,ລົງສຳຫຼວດທີ່ດິນປ່າໄມ້ ແລະ ເຄື່ອງປ່າຂອງດົງ, ເນື້ອທີ່ 1.270,4 ເຮັກຕາ,ຢູ່ເມືອງພູວົງ ແຂວງອັດຕະປື, 1.802 ເຮັກຕາ ຢູ່ເມືອງກະລຶມ ແຂວງເຊກອງໃນໂຄງການປູກພືດເປັນຢາ ແລະ ສວນຢາພື້ນເມືອງຂອງກອງທັບປະຊາຊົນລາວ ຂອງບໍລິສັດອູ່ຄໍາ ທີ່ປຶກສາຈຳກັດຜູ້ດຽວ; ສໍາຫຼວດຊັບພະຍາກອນປ່າໄມ້ ຢູ່ເຂດນໍ້າຈະຖ້ວມ ແລະ ເຂດກໍ່ສ້າງຕ່າງໆ411 ເຮັກຕາຂອງໂຄງການເຂື່ອນໄຟຟ້ານໍ້າບາກ 2 ຢູ່ເມືອງອະນຸວົງ ແລະ ເມືອງລ້ອງຊານ ແຂວງໄຊສົມບູນ ຂອງບໍລິສັດນ້ຳທາກໍ່ສ້າງ ຈຳກັດຜູ້ດຽວ;ສຳຫຼວດຊັບພະຍາກອນປ່າໄມ້ຢູ່ເຂດນໍ້າຈະຖ້ວມແລະເຂດກໍ່ສ້າງຕ່າງໆຂອງໂຄງການເຂື່ອນໄຟຟ້າເຊກອງ5 ຢູ່ເມືອງກະລຶມ ແຂວງເຊກອງ ແລະ ເມືອງຕະໂອ້ຍ ແຂວງສາລະວັນ ຂອງບໍລິສັດພົງຊັບທະວີ ຈຳກັດ ຜູ້ດຽວ;ລົງເກັບກຳຂໍ້ມູນການນຳໃຊ້ທີ່ດິນ ແລະ ປ່າໄມ້ຕົວຈິງໃນພາກສະໜາມ ເພື່ອສົມທຽບກັບພາບຖ່າຍດາວທຽມ ແລະ ພາບຖ່າຍທາງອາກາດ ເພື່ອປະເມີນການປົກຫຸ້ມປ່າໄມ້ ປີ 2023 ທີ່ແຂວງຫົວພັນ, ຊຽງຂວາງ, ໄຊສົມບູນ, ບໍລິຄຳໄຊ, ສາລະວັນ ແລະ ແຂວງເຊກອງ; ສໍາຫຼວດເນື້ອທີ່ດິນປອກໂລ້ນ ຈໍານວນ 750 ເຮັກຕາ ທີ່ນອນໃນເຂດປ່າຜະລິດແຫ່ງຊາດ ເຊຄຳພໍ-ແບ່ງວິໄລ ເຂດບ້ານພອນມະນີ ເມືອງສະໜາມໄຊ ແຂວງອັດຕະປື ຂອງບໍລິສັດຄຳແສງ ພັດທະນາກະ ສິກຳຄົບວົງຈອນ ຈຳກັດຜູ້ດຽວ; ສຳຫຼວດເນື້ອທີ່ປູກໄມ້ ໃນເຂດປ່າຜະລິດແຫ່ງຊາດພູເຍີຍ ທີ່ເມືອງເຟືອງ ແລະ ເມືອງໝື່ນ ແຂວງວຽງຈັນ ຂອງບໍລິສັດບົວລະພາກະສິກຳ-ປ່າໄມ້ຈຳກັດ ເນື້ອທີ່ 6.200,17 ເຮັກຕາ;ສຳຫຼວດ ເກັບກຳຂໍ້ມູນສະພາບປ່າຊຸດໂຊມ ແລະ ປ່າເຫຼົ່າທີ່ໄດ້ກຳນົດເປັນເຂດກະສິກຳ-ປ່າໄມ້ ແລະ ປູກຕົ້ນໄມ້ ໃນເນື້ອທີ່ປ່າຜະລິດປ່າຜະລິດແຫ່ງຊາດ ດົງກະເພາະ ເຂດເມືອງພີນ, ເມືອງພະລານໄຊ ແລະ ເມືອງຊົນບູລີ ແຂວງສະຫວັນນະເຂດ ຂອງໂຮງງານປຸງແຕ່ງໄມ້ສຳເລັດຮູບ ລາວ-ຫວຽດສ່ວນບຸກຄົນ;ສຳຫຼວດເກັບກຳຂໍ້ມູນດ້ານຊັບພະຍາກອນປ່າໄມ້ ພື້ນທີ່ໂຄງການກໍ່ສ້າງເຂື່ອນໄຟຟ້າ ດາກກາ 35 ເມກາວັດ ເຂດບ້ານດາກປາ ເມືອງດາກຈຶງ ແຂວງເຊກອງ ຂອງບໍລິສັດຮຸ້ນສ່ວນສາງຕາວຈຳກັດ; ລົງສໍາຫຼວດເກັບກຳຂໍ້ມູນເບື້ອງຕົ້ນໃນການສຶກສາຄວາມເປັນໄປໄດ້ ເພື່ອພັດທະນາເປັນໂຄງການ ລົງສຳຫຼວດເກັບກຳຂໍ້ມູນເບື້ອງຕົ້ນໃນການສຶກສາຄວາມເປັນໄປໄດ້ ເພື່ອພັດທະນາເປັນໂຄງການສ້າງສິນເຊື່ອກາກບ່ອນປ່າໄມ້ (REDD+) ໃນເຂດປ່າປ້ອງກັນແຫ່ງຊາດ ພູຫຼວງພູນົກ, ປ່າປ້ອງກັນແຫ່ງຊາດເຊຕະນວນ-ພູນາກ, ປ່າປ້ອງກັນແຫ່ງຊາດເຊລະນອງ-ພູໂອ່ງ ແລະ ປ່າສະຫງວນພູເກົ້າ-ພູມະໂລງ ແຂວງຄຳມ່ວນ, ແຂວງສະຫວັນນະເຂດ, ແຂວງສາລະວັນ ແລະ ແຂວງຈຳປາສັກ.
ທ່ານ  ສົມຫວັງ ພິມມະວົງ ກ່າວຕື່ມວ່າ:ພາຍຫຼັງສໍາເລັດການສໍາຫຼວດ ອ້າຍນ້ອງວິຊາການປ່າໄມ້ ຈະນໍາເອົາຂໍ້ມູນການສໍາຫຼວດທັງໝົດມາຂຽນບົດລາຍງານໃຫ້ແຕ່ລະໂຄງການນໍາໄປເປັນແຜນການຈັດຕັ້ງປະຕິບັດຕາມຂັ້ນຕອນ ເພື່ອໃຫ້ເກີດຄວາມສົມດຸນຂອງຊັບພະຍາກອນປ່າໄມ້.