ພາຍຫຼັງສໍາເລັດກອງປະຊຸມ, ທ່ານ ມະໄລທອງ ກົມມະສິດ ລັດຖະມົນຕີ (ລມຕ) ກະຊວງອຸດສາຫະກໍາ ແລະ ການຄ້າ, ທັງເປັນລມຕ ເສດຖະກິດອາຊຽນ ຂອງ ສປປ ລາວ ແລະ ທ່ານ ກາວ ກິມ ຮຸນ (Kao Kim Hourn) ເລຂາທິການໃຫຍ່ອາຊຽນໄດ້ຮ່ວມຖະແຫຼງຂ່າວກ່ຽວກັບຜົນສຳເລັດຂອງກອງປະຊຸມດັ່ງກ່າວ ໃນວັນທີ 22 ກັນຍາ ຜ່ານມາ.
ທ່ານ ມະໄລທອງ ກົມມະສິດ ໄດ້ໃຫ້ຮູ້ວ່າ: ກອງປະຊຸມລັດຖະມົນຕີອາຊຽນ ແມ່ນກອງປະຊຸມປະຈຳປີຂອງບັນດາລັດຖະມົນຕີເສດຖະກິດຂອງອາຊຽນເພື່ອປຶກສາຫາລືແຜນວຽກເສດຖະກິດທີ່ເປັນບຸລິມະສິດຂອງປີນີ້, ກວດກາຄວາມຄືບໜ້າຂອງບັນດາຂໍ້ລິເລີ່ມດ້ານເສດຖະກິດພ້ອມທັງວາງທິດທາງຍຸດທະສາດສຳລັບການເຊື່ອມໂຍງເສດຖະ
ກິດໃນພາກພື້ນ, ລັດຖະມົນຕີເສດຖະກິດອາຊຽນໄດ້ພົບປະກັບບັນດາຄູ່ຮ່ວມພັດທະນາເພື່ອທົບທວນຄືນແຜນວຽກການຮ່ວມມືທາງດ້ານເສດຖະກິດໃນປັດຈຸບັນ ແລະ ຈັດວາງບຸລິມະສິດໃຫ້ກັບຊຸມປີຕໍ່ຫນ້າ.
ຄວາມຄືບໜ້າຕໍ່ການຈັດຕັ້ງປະຕິບັດບັນດາແຜນວຽກເສດຖະກິດທີ່ເປັນບຸລິມະສິດນັ້ນຊຶ່ງເປັນຂໍ້ລິເລີ່ມຕົ້ນຕໍທາງດ້ານເສດຖະກິດອາຊຽນໂດຍການປະສົມປະສານເອົາຄຳຂັວນຂອງການເປັນປະທານອາຊຽນຂອງ ສປປ ລາວ ໃນປີ 2024 ນີ້: “ອາຊຽນເພີ່ມທະວີການເຊື່ອມຈອດ ແລະ ຄວາມເຂັ້ມແຂງ”. ໂດຍສະເພາະລັດຖະມົນຕີເສດຖະກິດອາຊຽນໄດ້ຮັບຮອງຖະແຫຼງການອາຊຽນ ວ່າດ້ວຍ ການເຊື່ອມຈອດຕ່ອງໂສ້ການສະໜອງ (ASEAN Declaration on Supply Chain Connectivity) ຊຶ່ງນີ້ເປັນສິ່ງສຳຄັນໃນທາງດ້ານສະພາບອາກາດໃນປັດຈຸບັນ. ພ້ອມທັງເປັນການກ້າວອອກມາຈາກການແຜ່ລະບາດຂອງພະຍາດໂຄວິດ-19 ຊຶ່ງມັນໄດ້ສະແດງໃຫ້ເຫັນຄວາມສຳຄັນຂອງ ການເຊື່ອມຈອດຕ່ອງໂສ້ການສະໜອງ ແລະ ຄວາມເຂັ້ມແຂງຂອງຕ່ອງໂສ້ການສະໜອງ. ຖະແຫຼງການນີ້ ຈະເປັນການຢືນຢັນຄືນຄຳໝັ້ນສັນຍາຂອງອາຊຽນຄືນໃໝ່ເພື່ອສົ່ງເສີມນະວັດຕະກຳ, ການແຂ່ງຂັນ, ແລະ ຄວາມເຂັ້ມແຂງຂອງຕ່ອງໂສ້ການສະໜອງໃນພາກພື້ນ.
ບັນດາລັດຖະມົນຕີເສດຖະກິດ ໄດ້ຮັບຮອງເອົາຄຳແນະນຳໃນການປັບປຸງ ສັນຍາແຜນວຽກຂອງອາຊຽນ ວ່າດ້ວຍ ການຮ່ວມມືທາງດ້ານຊັບສິນທາງປັນຍາ (ASEAN Framework Agreement on Intellectual Property Cooperation - AFAIPC) ໂດຍຄາດຫວັງວ່າການເຈລະຈາປັບປຸງສັນຍາດັ່ງກ່າວຈະສາມາດເລິ່ມຕົ້ນໄດ້ໃນປີ 2025. ກອງປະຊຸມຍັງຮູ້ສຶກຍິນດີຕໍ່ກັບຄວາມຄືບໜ້າອັນສຳຄັນທີ່ຈະນຳໄປສູ່ການສະຫຼຸບການເຈລະຈາປັບປຸງສັນຍາເຂດການຄ້າເສລີອາຊຽນ-ສປ ຈີນ (ASEAN-China FTA 3.0) ແລະ ເປັນການຢັ້ງຢືນຄືນໃໝ່ຕໍ່ກັບຄຳໝັ້ນສັນຍາຮ່ວມກັນກັບ ສປ ຈີນ ເພື່ອໃຫ້ສາມາດບັນລຸການສະຫຼຸບທີ່ມີເນື້ອໃນສຳຄັນຂອງການເຈລະຈາພາຍໃນປີນີ້ຊຶ່ງຈະເປັນການຍົກລະດັບການພົວພັນທາງດ້ານເສດຖະກິດ ແລະ ການຄ້າ ລະຫວ່າງອາຊຽນ ແລະ ສປ ຈີນ ໄປສູ່ລະດັບທີ່ສູງຂຶ້ນ.
ທ່ານຍັງໄດ້ລາຍງານໃຫ້ຮູ້ຕື່ມວ່າ: ແຜນວຽກເສດຖະກິດທີ່ເປັນບຸລິມະສິດຂອງ ສປປ ລາວ ໃນນາມເປັນປະທານລັດຖະມົນຕີເສດ ຖະກິດອາຊຽນໃນປີ 2024 ນີ້ ແມ່ນຍັງສືບຕໍ່ດຳເນີນການເພື່ອໃຫ້ສຳເລັດພາຍໃນທ້າຍປີ.
ກອງປະຊຸມຄັ້ງນີ້ຍັງໄດ້ປຶກສາຫາລືກັນເຖິງວິທີການທີ່ຈະປັບປຸງການຄ້າພາຍໃນອາຊຽນ, ໂດຍສະເພາະຜ່ານມາດຕະການອຳນວຍຄວາມສະດວກທາງດ້ານການຄ້າ ແລະ ການຈັດຕັ້ງປະຕິບັດສັນຍາການຄ້າດ້ານສິນຄ້າຂອງອາຊຽນ (ASEAN Trade in Goods Agreement - ATIGA). ຍິນດີຕໍ່ຄວາມຄືບໜ້າໃນການປັບປຸງສັນຍາດັ່ງກ່າວ ຊຶ່ງເປັນການຮັບຊາບຕໍ່ກັບບົດບາດທີ່ສຳຄັນຂອງສັນຍານີ້ໃນພາກພື້ນ, ກອງປະຊຸມຮັບປະກັນວ່າການປັບປຸງສັນຍາດັ່ງກ່າວຈະເປັນການປັບປຸງທີ່ມີລັກສະນະທັນສະໄໝ, ກວ້າງຂວາງ, ເປັນສັນຍາທີ່ກວມເອົາອົງປະກອບດັ່ງເດີມ ແລະອົງປະກອບທີ່ເກີດຂຶ້ນມາໃໝ່ ຊຶ່ງຈະເປັນການຕອບສະໜອງຕໍ່ກັບການພັດທະນາໃນພາກພື້ນ ແລະ ສາກົນ. ພ້ອມທັງຄາດຫວັງວ່າການເຈລະຈາປັບປຸງສັນຍາດັ່ງກ່ວນີ້ຈະສາມາດສຳເລັດພາຍໃນປີ 2025.
(ຂ່າວ: ຍຸພິນທອງ-ພາບ:ແສງຈັນ)
ຄໍາເຫັນ