 |
ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ VI ຂອງອົງຄະນະພັກ ຄອສພ ດໍາເນີນພາຍໃຕ້ຄໍາຂວັນ “ເພີ່ມທະວີບົດບາດການນໍາພາ ຂອງອົງຄະນະພັກ, ຍົກສູງຈິດໃຈເອກະລາດເປັນເຈົ້າຕົນເອງ, ຕັ້ງ ໜ້າສ້າງການຫັນປ່ຽນໃນວຽກງານໂຄສະນາອົບຮົມ ໄປສູ່ຄຸນນະພາບໃໝ່ຢ່າງແຂງແຮງ". ກອງປະຊຸມໃຫຍ່ ໄດ້ຄົ້ນຄວ້າປຶກສາຫາລື ແລະ ຮັບຮອງເອົາບົດລາຍງານການເມືອງ ຂອງຄະນະພັກ ສະໄໝທີ V ຕໍ່ກອງປະຊຸມໃຫຍ່ ຄັ້ງທີ VI ຊຶ່ງໄດ້ຕີລາຄາຢ່າງພາວະວິໄສ ຕໍ່ຜົນງານການເຄື່ອນໄຫວວຽກງານ ໂຄສະນາອົບຮົມ ໄລຍະ 5 ປີ ຜ່ານມາ; ໄດ້ຄົ້ນຄວ້າປຶກສາຫາລື ແລະ ເປັນເອກະສັນຮັບຮອງເອົາບັນດາທິດທາງ, ໜ້າທີ່ຈຸດສຸມວຽກງານໂຄສະນາອົບຮົມ ໃນໄລຍະ 5 ປີຕໍ່ໜ້າ; ແຜນພັດທະນາວຽກງານໂຄສະນາອົບຮົມ (2026-2030) ຂອງອົງຄະນະພັກ ຄອສພ ໃນ 9 ແຜນງານ, 42 ໂຄງການ; ໄດ້ຮັບຮອງເອົາບົດສໍາຫຼວດການນໍາພາຂອງຄະນະພັກ ຄອສພ ຊຸດທີ V ໂດຍໄດ້ຕີລາຄາສູງຕໍ່ຄວາມພະຍາຍາມ ໃນການນໍາພາ-ຊີ້ນໍາຈັດຕັ້ງປະຕິບັດໜ້າທີ່ການເມືອງ ຂອງຄະນະພັກຊຸດເກົ່າ ຊຶ່ງມີຜົນສໍາເລັດທີ່ຕັ້ງໜ້າຫຼາຍປະການ; ກອງປະຊຸມໄດ້ຮັບຟັງການປະກອບຄວາມເຫັນກ່ຽວກັບການປັບປຸງກົງຈັກການຈັດຕັ້ງຢູ່ພາຍໃນ ຄອສພ; ບົດບາດການຄົ້ນຄວ້າທິດສະດີ ແລະ ພຶດຕິກຳ ຮັບໃຊ້ວຽກງານໂຄສະນາອົບຮົມ; ພັກນໍາພາວຽກງານອົງການຈັດຕັ້ງມະຫາຊົນ ແລະ ບົດບາດຂອງວຽກງານສື່ມວນຊົນ, ຊຶ່ງບົດປະກອບຄຳເຫັນຂອງແຕ່ລະພາກສ່ວນ ລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ບົດລາຍງານການເມືອງ, ທິດທາງ, ຄາດໝາຍສູ້ຊົນ ແລະ ວຽກງານຮອບດ້ານຕໍ່ກອງປະຊຸມ ພ້ອມທັງໄດ້ໃຫ້ຄວາມຕັດສິນໃຈສູງຕໍ່ການປະຕິບັດໜ້າທີ່ການເມືອງຂອງຕົນໃນຊຸມປີຕໍ່ໜ້າ.
 |
ກອງປະຊຸມໃຫຍ່ ຜູ້ແທນໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ, ກົດລະບຽບຂອງພັກ, ທັງຖືກຕ້ອງ ສອດຄ່ອງຕາມມາດຖານເງື່ອນໄຂທີ່ກຳນົດໄວ້ ຊຶ່ງມີຜູ້ຮັບສະໝັກເລືອກຕັ້ງ ຈຳນວນ 20 ສະຫາຍ, ຍິງ 4 ສະຫາຍ. ໃນນັ້ນ, ເລືອກຕັ້ງເອົາ 17 ສະຫາຍ, ຍິງ 1 ສະຫາຍ ເປັນຄະນະບໍລິຫານງານພັກ ຄະນະໂຄສະນາອົບຮົມສູນກາງພັກຊຸດໃໝ່ ເພື່ອສືບຕໍ່ນໍາພາ-ຊີ້ນໍາວຽກງານສໍາຄັນໃນຕໍ່ໜ້າ. ກອງປະຊຸມຄັ້ງປະ ຖົມມະລືກໄດ້ເປັນເອກະສັນເລືອກຕັ້ງເອົາ ສະຫາຍ ຄໍາພັນ ເຜີຍຍະວົງ ເປັນເລຂາຄະນະບໍລິຫານງານພັກ ຄອສພ ສະໄໝທີ VI, ສະຫາຍ ວັນສີ ກົວມົວ ເປັນຮອງເລຂາ, ເລືອກເອົາຄະນະປະຈໍາພັກ 5 ສະຫາຍ, ປະທານກວດກາພັກ 1 ສະຫາຍ, ຮອງປະທານກວດກາ 4 ສະຫາຍ.
 |
ໂອກາດນີ້, ສະຫາຍ ພົນເອກ ວິໄລ ຫຼ້າຄໍາຟອງ ໄດ້ໃຫ້ກຽດໂອ້ລົມ, ກ່ອນອື່ນໄດ້ສະແດງຄວາມຍ້ອງຍໍຊົມເຊີຍຜົນງານ ແລະ ຜົນສໍາເລັດ ທີ່ຍາດມາໄດ້ໃນໄລຍະຜ່ານມາ ແລະ ເນັ້ນຫຼາຍບັນຫາຕໍ່ກອງປະຊຸມໃຫຍ່ຄື: ຕ້ອງສ້າງການຫັນປ່ຽນຢ່າງແຂງແຮງທາງດ້ານເນື້ອໃນ ແລະ ຮູບການ ໃນການເຄື່ອນໄຫວວຽກງານໂຄສະນາອົບຮົມ ເພື່ອສາມາດຕອບສະໜອງຄວາມຮຽກຮ້ອງຕ້ອງການ ຂອງໜ້າທີ່ການເມືອງ ໃນໄລຍະໃໝ່; ຢາກເຮັດວຽກງານສຶກສາອົບຮົມໃຫ້ມີຄຸນນະພາບສູງ, ບັນດາສະຫາຍຕ້ອງກຳໄດ້ແນວຄິດຈິດໃຈ, ຈິດຕະສາດ, ຄວາມຂັດຂ້ອງໝອງໃຈ, ຄວາມມຸ່ງມາດປາດຖະໜາ ຂອງປະຊາຊົນ ແລະ ຊັ້ນຄົນຕ່າງໆໃນສັງຄົມໃຫ້ເລິກເຊິ່ງ. ຈາກນັ້ນ, ຮີບຮ້ອນຈັດສັນເນື້ອໃນແນວທາງ ແລະ ແບບແຜນສຶກສາອົບຮົມ ແຕ່ລະເປົ້າໝາຍຕ່າງໆ ໃຫ້ຖືກຕ້ອງສອດຄ່ອງກັບຈຸດພິເສດນັ້ນໆ; ເພື່ອຕອບຕ້ານບັນດາກົນອຸບາຍ, ເລ່ລ່ຽມ ຂອງກຸ່ມຄົນທີ່ບໍ່ຫວັງດີ, ຜູ້ເຮັດວຽກໃນຂົງເຂດແນວຄິດ ຕ້ອງກຳໄດ້ຈຸດພິເສດ, ຈຸດອ່ອນ, ຈຸດແຂງ ຂອງພວກເຂົາເຫຼົ່ານັ້ນ ເພື່ອມີແຜນຮັບມືຢ່າງເດັດດ່ຽວ, ຖືກຕ້ອງ, ເໝາະສົມຕາມສະຖານະການ.
 |
ໃນນັ້ນ, ຕ້ອງທັນການ, ແຕ່ຕ້ອງເຕັມໄປດ້ວຍຄວາມຮອບຄອບ, ແນບນຽນ, ແຫຼມຄົມ, ຖືກເປົ້າໝາຍ ແລະ ກ້າວໄປເຖິງ ໃຫ້ຮັກສາໄດ້ສະຖຽນລະພາບທາງດ້ານການເມືອງ, ຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ; ຕໍ່ວຽກງານໂຄສະນາ ການອອກແບບໂຄສະນາດ້ວຍຫຼາຍຮູບ, ຫຼາຍສີ, ແຕ່ໃຫ້ຮັບປະກັນຄວາມເລິກເຊິ່ງ, ກວ້າງຂວາງ ແມ່ນມີຄວາມຈຳເປັນໃນສັງຄົມປັດຈຸບັນ. ສາມາດນຳໃຊ້ສື່ມວນຊົນ ຢ່າງກວ້າງ ຂວາງ ແລະ ຫຼາກຫຼາຍ ທີ່ເປັນພາຫະນະສຳຄັນ ທີ່ສັງຄົມຕ້ອງການ ທີ່ເປັນຊີວິດປະຈຳວັນຂອງເຂົາເຈົ້າຢູ່ນັ້ນ ໃຫ້ມີຫຼາຍຮູບຫຼາຍສີກວ່າເກົ່າ. ນອກນັ້ນ, ກໍມີການຈັດປາຖະກະຖາ, ສຳມະນາຜ່ານອົງການຈັດຕັ້ງຕ່າງໆ, ສ້າງເປັນເອກະສານໂຄສະນາ, ອົບຮົມ ທີ່ມີເນື້ອໃນເລິກເຊິ່ງ ແຕ່ໃຫ້ມີຊີວິດຊີວາ ທີ່ດຶງດູດຄວາມສົນໃຈ ຂອງແຕ່ລະເປົ້າໝາຍ ແລະ ສະເໜີໃຫ້ຄະນະໂຄສະນາອົບຮົມ ມີພາຫະນະເປັນສື່ ທີ່ຂຶ້ນກັບຕົນເອງເຊັ່ນ: ໜັງສືພິມ, ວິທະຍຸກະຈາຍສຽງ, ໂທລະພາບ, ວາລະສານຕ່າງໆ ລວມທັງສ້າງເງື່ອນໄຂໃຫ້ສາມາດນຳໃຊ້ສື່ອອນລາຍ ໃຫ້ເປັນຂອງຕົນເອງ ທີ່ເປັນປະໂຫຍດໃນການເຮັດໜ້າທີ່ເປັນພາຫະນະໃນການໂຄສະ ນາອົບຮົມ; ຄະນະໂຄສະນາອົບຮົມສູນກາງພັກ ຕ້ອງເປັນເຈົ້າການປະສານສົມທົບ ກັບຄະນະສະພາທິດສະດີສູນກາງພັກ, ສະຖາບັນຕ່າງໆ ສືບຕໍ່ຄົ້ນຄວ້າທາງດ້ານທິດສະດີ ແລະ ສະຫຼຸບພຶດຕິກຳ ຂອງພັກ; ພົວພັນໃກ້ຊິດ, ແລກປ່ຽນບົດຮຽນທາງດ້ານທິດສະດີ ແລະ ພຶດຕິກຳ ກັບບັນດາພັກອ້າຍນ້ອງ ເພື່ອຊ່ວຍກົມການເມືອງ, ຄະນະບໍລິຫານງານສູນກາງພັກ ວາງແນວທາງນະໂຍບາຍຂອງພັກ ໃນຊຸມປີຕໍ່ໜ້ານີ້, ໃຫ້ຖືກຕ້ອງສອດຄ່ອງກັບສະພາບການແຫ່ງຄວາມຮຽກຮ້ອງຕ້ອງການ ທີ່ແທ້ຈິງ; ປັບປຸງພາລະບົດບາດ ແລະ ກົງຈັກການຈັດຕັ້ງ, ສິດ, ໜ້າທີ່, ແລະ ແບບແຜນວິທີເຮັດວຽກ ຂອງ ຄອສພ ໃຫ້ກະທັດຮັດ, ໜັກແໜ້ນ, ເຂັ້ມແຂງ, ສົມຄູ່ກັບບົດບາດ ແລະ ຄວາມສໍາຄັນຂອງວຽກງານໃນໄລຍະໃໝ່.
 |
ພ້ອມກັນນັ້ນ, ກໍຕ້ອງເອົາໃຈໃສ່ ການບັນຈຸສັບຊ້ອນພະນັກງານ ເຂົ້າໃສ່ບັນດາຕໍາແໜ່ງງານໃຫ້ແທດເໝາະ; ເພີ່ມທະວີການຄຸ້ມຄອງດ້ານລະບຽບວິໄນຢູ່ພາຍໃນການຈັດຕັ້ງ ຂອງອົງຄະນະພັກຕິດພັນກັບການສະກັດກັ້ນ ຕີຖອຍບັນດາປະກົດການຫຍໍ້ທໍ້ ໄປຄຽງຄູ່ກັບການຍົກລະດັບຄວາມຮູ້, ຄວາມສາມາດ ໃຫ້ແກ່ຖັນແຖວພະນັກງານ-ສະ ມາຊິກພັກ ເປັນຂໍກະແຈໃຫ້ແກ່ການຮັບປະກັນໜ້າວຽກທີ່ວາງໄວ້ໃນກອງປະຊຸມໃຫຍ່ຄັ້ງນີ້ ໄດ້ຮັບການຈັດ ຕັ້ງປະຕິບັດຢ່າງເປັນລະບົບ, ຕໍ່ເນື່ອງ, ແຂງແຮງ.
 |
ເປົ້າໝາຍໜຶ່ງທີ່ສຳຄັນທີ່ຜູ້ເຮັດວຽກໂຄສະນາອົບຮົມ, ເຮັດວຽກຄົ້ນຄວ້າທິດສະດີ ແລະ ພຶດຕິກຳນັ້ນ, ແມ່ນການຫັນປ່ຽນຄວາມຄິດ, ຫັນປ່ຽນຄ່ານິຍົມ ແລະ ຫັນປ່ຽນວິຖີຊີວິດຂອງຄົນ, ຂອງສັງຄົມ ໃນຍຸກແຫ່ງການປ່ຽນແປງໃໝ່ ໃຫ້ກ້າວໜ້າຕໍ່ໄປ, ສິ່ງສຳຄັນທີ່ສຸດ ແມ່ນຄ່ານິຍົມຂອງສັງຄົມ-ຂອງຊາວໜຸ່ມ ວຽກງານໂຄສະນາອົບຮົມ ເຮົາຈະຮັບມື ແລະ ກະທົບໃສ່ແນວໃດ.
 |
(ຂ່າວ: ວັນເພັງ; ພາບ: ສໍານານ)
ຄໍາເຫັນ