ພົອ ຈັນສະໝອນ ຈັນຍາລາດ ຊີ້ນຳກອງປະຊຸມປຶກສາຫາລືວຽກງານຄຸ້ມຄອງໄພພິບັດ

ໃນພິທີຜູ້ເຂົ້າຮ່ວມກອງປະຊຸມໄດ້ຮັບຟັງການລາຍງານກ່ຽວກັບຜົນການເກັບກຳຂໍ້ມູນຜົນກະທົບ ແລະ ຜົນເສຍຫາຍຈາກພາຍຸວຸທິບ, ວິພາ ແລະ ບົວລອຍ ຈາກຜູ້ຕາງໜ້າຄະນະກຳມະການຄຸ້ມຄອງໄພພິບັດຂັ້ນສູນກາງ ຊຶ່ງຜົນກະທົບຈາກພາຍຸບົວລອຍທີ່ພັດຜ່ານເຂົ້າມາ ສປປ ລາວ ໃນລະຫວ່າງວັນທີ 29 ກັນຍາ ຫາ ວັນທີ 4 ຕຸລາ 2025 ເຮັດໃຫ້ເກີດມີຝົນຕົກໜັກ ແລະ ນໍ້າຖ້ວມຢູ່ 10 ແຂວງຄື: ໄຊຍະບູລີ, ຫົວພັນ, ຊຽງຂວາງ, ບໍລິຄຳໄຊ, ໄຊສົມບູນ, ວຽງຈັນ, ນະຄອນຫຼວງວຽງຈັນ, ສະຫວັນນະເຂດ, ຈຳປາສັກ ແລະ ອັດຕະປື ສົ່ງຜົນກະທົບຕໍ່ 34 ເມືອງ, 131 ບ້ານ, 632 ຄົວເຮືອນ, 3,118 ຄອບຄົວ, 17,202 ຄົນ ຍິງ 7,020 ຄົນ, ມີຜູ້ເສຍຊີວິດ 4 ຄົນ (ຢູ່ແຂວງບໍລິຄໍາໄຊ, ໄຊສົມບູນ, ສະຫວັນນະເຂດ ແລະ ຫົວພັນ ແຂວງລະ 1 ຄົນ), ສູນຫາຍ 4 ຄົນ (ຊຽງຂວາງ 2 ຄົນ,ຫົວພັນ 1 ຄົນ ແລະ ນະຄອນຫຼວງວຽງຈັນ 1 ຄົນ). ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ປຶກສາຫາລືແລກປ່ຽນຄໍາຄິດເຫັນ ພ້ອມທັງລາຍງານບາງວຽກງານທີ່ຕິດພັນກັບຂະແໜງການຂອງຕົນ, ຊຶ່ງຜູ້ຕາງໜ້າກະຊວງອຸດສາຫະກຳ ແລະ ການຄ້າໄດ້ລາຍງານໃຫ້ຊາບກ່ຽວກັບສະພາບການຕິດຕາມກວດກາຄວາມປອດໄພຂອງບັນດາເຂື່ອນໄຟຟ້າ ແລະ ການບໍລິຫານຈັດການນໍ້າໃນເຂື່ອນ ເຫັນວ່າປັດຈຸບັນບັນດາເຂື່ອນໄຟຟ້າໃນທົ່ວປະເທດແມ່ນຮັບປະກັນຄວາມປອດໄພດີລວມທັງການບໍລິຫານຈັດການນໍ້າໃນເຂື່ອນ ແລະ ໄດ້ເອົາໃຈໃສ່ກະກຽມແຜນຮັບມືຕໍ່ພາຍຸທີ່ຈະເຂົ້າມາໃນຕໍ່ໜ້າເປັນຢ່າງດີ.

ໂອກາດນີ້, ທ່ານ ພົອ ຈັນສະໝອນ ຈັນຍາລາດ ໄດ້ມີຄຳເຫັນໂອ້ລົມພ້ອມທັງເນັ້ນໜັກໃຫ້ພາກສ່ວນກ່ຽວຂ້ອງເອົາໃຈໃສ່ຕໍ່ບາງວຽກງານສຳຄັນ ເປັນຕົ້ນ: ສືບຕໍ່ເອົາໃຈໃສ່ກອບກູ້, ຊ່ວຍເຫຼືອປະຊາຊົນຜູ້ປະສົບໄພ ຢ່າງທັນການ; ເອົາໃຈໃສ່ຟື້ນຟູພື້ນຖານໂຄງລ່າງໃຫ້ກັບຄືນສູ່ສະພາບປົກກະຕິໂດຍໄວ ໂດຍສະເພາະຂົວ, ເສັ້ນທາງຄົມມະນາຄົມໃຫ້ສາມາດນໍາໃຊ້ໄດ້; ສືບຕໍ່ເອົາໃຈໃສ່ຕິດຕາມສະພາບອາກາດທີ່ອາດຈະເກີດມີພາຍຸຫົວໃໝ່ ໃຫ້ມີລະບົບການແຈ້ງເຕືອນໄພລ່ວງໜ້າເຖິງປະຊາຊົນບັນດາເຜົ່າໃນພື້ນທີ່ ທີ່ມີຄວາມສ່ຽງຢ່າງວ່ອງໄວທັນການ ເພື່ອການກະກຽມຄວາມພ້ອມຮັບມືກັບໄພພິບັດທີ່ອາດຈະເກີດຂຶ້ນ ພ້ອມທັງໃຫ້ກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບເປັນເຈົ້າການກະກຽມກໍາລັງ, ອຸປະກອນຕ່າງໆເພື່ອເຂົ້າຊ່ວຍເຫຼືອປະຊາຊົນໃນກໍລະນີຫາກເກີດໄພພິບັດ ແລະ ປະສົບໄພຕົວຈິງຢ່າງທັນການ;ໃຫ້ກະຊວງ ຮສສກໍຄືກອງເລຂາຄະນະກຳມະການຄຸ້ມຄອງໄພພິບັດຂັ້ນສູນກາງສືບຕໍ່ປັບປຸງບົດລາຍງານການປະເມີນຜົນເສຍຫາຍ ແລະ ຄວາມຕ້ອງການໃນການແກ້ໄຂສຸກເສີນ ແລະ ການຟື້ນຟູໄລຍະຍາວເພື່ອນໍາສະເໜີລັດຖະບານມີທິດຊີ້ນໍາ; ປະສານສົມທົບຢ່າງໃກ້ຊິດກັບຄະນະກໍາມະການຄຸ້ມຄອງໄພພິບັດບັນດາແຂວງໃນການເກັບກຳຂໍ້ມູນຜົນກະທົບແລະ ຄວາມຕ້ອງການໃນການຟື້ນຟູແຕ່ລະໄລຍະ ລວມທັງການກະກຽມຄວາມພ້ອມດ້ານຕ່າງໆ ຕໍ່ການປ້ອງກັນ ແລະ ຮັບມືກັບສະພາບໄພພິບັດທີ່ອາດຈະເກີດຂຶ້ນ.

ຂ່າວ-ພາບ: ກົມປະຊາສຳພັນ ຫສນຍ