 |
ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນເມື່ອປີ 2012 ເປັນຕົ້ນມາ, ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ເຂົ້າຮ່ວມກິດຈະກຳການປູກຕົ້ນໄມ້ຕາມພັນທະຂອງນະຄອນຫຼວງປັກກິ່ງມາເປັນເວລາ 10 ກວ່າປີຢ່າງລຽນຕິດ. ເພິ່ນໄດ້ຊີ້ໃຫ້ເຫັນຢ່າງເລິກເຊິ່ງວ່າ: “ຄົນຮຸ່ນກ່ອນປູກຕົ້ນໄມ້, ຄົນຮຸ່ນຫຼັງໄດ້ຮົ່ມເຢັນ, ພວກເຮົາທຸກຄົນຕ່າງກໍເປັນຜູ້ໄດ້ຮົ່ມເຢັນແຕ່ຍິ່ງຄວນເປັນຜູ້ປູກໄມ້”.
ໃນຖານະເປັນພາກສ່ວນຫຼັກຂອງລະບົບນິເວດທາງບົກ, ປ່າໄມ້ເປັນແຫຼ່ງກຳເນີດປັດໄຈສຳຄັນທີ່ສຸດສຳລັບການຄົງຕົວຂອງປະເທດ ແລະ ຊົນຊາດໜຶ່ງ, ຍິ່ງເປັນພື້ນຖານແຫ່ງການດຳລົງຄົງຕົວຂອງມະນຸດຊາດ.
ໃນກອງປະຊຸມຄະນະປະຈຳກົມການເມືອງສູນກາງພັກກອມມູນິດຈີນທີ່ຈັດຂຶ້ນເມື່ອວັນທີ 25 ທັນວາ 2014, ທ່ານ ສີຈິ້ນຜິງ ໄດ້ກ່າວເນັ້ນໜັກວ່າ: ຕ້ອງປະຕິບັດຕໍ່ບັນຫານີ້ຈາກລະດັບສູງ ໂດຍພິຈາລະນາເຖິງການພັດທະນາປະຫວັດສາດປະຊາຊາດຈີນ. ພາຍຫຼັງມາ, ເພິ່ນໄດ້ນຳໃຊ້ຄຳປຽບທຽບ ຄື: “ປ່າໄມ້ເປັນຄັງສາງສິ່ງປະເສີດທີ່ລວມເຖິງຄັງນ້ຳ, ຄັງເງິນ, ຄັງສະບຽງອາຫານ ແລະ ຄັງກາກບອນ” ເພື່ອພັນລະນາປ່າໄມ້ທີ່ເປັນ “ພື້ນຖານສີຂຽວຂອງປະເທດຊາດ” ນັ້ນຢ່າງມີຊີວິດຊີວາ.
ຢູ່ສວນສາທາລະນະແຫ່ງຊາດພູອູຢີ ເຂດຢູ່ແຂວງຈ່ຽງຊີ, ອັດຕາການປົກຫຸ້ມຂອງປ່າໄມ້ມີເຖິງ 98.4% ຊຶ່ງເຮັດໃຫ້ນ້ຳຝົນຜ່ານຈາກການປັບປຸງເກັບຮັກສາແລະ ກັ່ນຕອງຂອງປ່າໄມ້ທຳມະຊາດ ແລະ ດິນບໍລິເວນນ້ຳຈົນກາຍເປັນແມ່ນ້ຳລຳເຊຢ່າງໜາແໜ້ນ. “ຄັງນ້ຳສີຂຽວ” ແຫ່ງນີ້ໄດ້ຮັບປະກັນໃຫ້ທົ່ງນາຢູ່ລຸ່ມແມ່ນ້ຳສາມາດເກັບກ່ຽວຜົນຜະລິດໄດ້ດີທຸກປີ ແລະ ສະໜອງຊັບພະຍາກອນນ້ຳທີ່ມີຄຸນນະພາບດີໃຫ້ແກ່ປະຊາຊົນທັງຫຼາຍ.
ຢູ່ເມືອງຢົງອ່ານ ແຂວງຟູຈ້ຽນ, ຊາວກະສິກອນຜູ້ຮັບເໝົາປ່າໄມ້ໄຜ່ປະມານ 7 ເຮັກຕາ, ຫາກເປັນປີທີ່ມີຜົນເກັບກ່ຽວອຸດົມສົມບູນຈະໄດ້ໜໍ່ໄມ້ໄຜ່ຫຼາຍກວ່າ 50 ໂຕນ. ສ່ວນໃນທົ່ວປະເທດຈີນ, ປະລິມານການຜະລິດອາຫານທີ່ເກີດຈາກປ່າໄມ້ເຊັ່ນ: ໝາກຊານ້ຳມັນ, ເຫັດ, ໝາກກໍ່ຫີນເປັນຕົ້ນໄດ້ບັນລຸຫຼາຍກວ່າ 240 ລ້ານໂຕນ, ກາຍເປັນຜະລິດຕະພັນກະສິກຳສຳຄັນອັນດັບສາມຮອງຈາກສະບຽງອາຫານ ແລະ ພືດຜັກ.
ໃນຖານະເປັນ “ຄັງເກັບຮັກສາກາກບອນ” ທາງບົກໃຫຍ່ທີ່ສຸດຢູ່ໃນໂລກ, ປ່າໄມ້ໄດ້ຜ່ານຈາກຂະບວນການສັງເຄາະດ້ວຍແສງ ເພື່ອດູດເອົາກາກບອນດີອົກຊິດແລະ ປະກອບສ້າງເປັນທາດປະສົມອົງຄະທາດ ພ້ອມທັງເກັບຮັກສາໄວ້ຢູ່ໃນພືດແລະ ດິນຢ່າງໝັ້ນຄົງ ຊຶ່ງເປັນການສ້າງສິ່ງກຳບັງສີຂຽວອັນໝັ້ນແກ່ນໃຫ້ແກ່ການຮັບມືກັບການປ່ຽນແປງຂອງດິນຟ້າອາກາດ.
 |
ໃນກອງປະຊຸມຄະນະປະຈຳກົມການເມືອງສູນກາງພັກກອມມູນິດຈີນທີ່ຈັດຂຶ້ນເມື່ອວັນທີ 25 ທັນວາ 2014, ທ່ານ ສີຈິ້ນຜິງ ໄດ້ກ່າວວ່າ: “ປ່າໄມ້ແມ່ນມໍລະດົກທີ່ຄົນເຮົາສືບທອດມາຈາກບັນພະບຸລຸດ, ຕ້ອງຮັກສາໄວ້ໃຫ້ລູກຫຼານຄົນຮຸ່ນຫຼັງ, ບໍ່ໃຫ້ບັນພະບຸລຸດຜິດຫວັງທັງບໍ່ໃຫ້ລູກຫຼານຜິດຫວັງນຳອີກ.”
ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 15 ຂອງຈີນໄດ້ລະບຸໄວ້ວ່າ: “ດຳເນີນການເຄື່ອນໄຫວປູກໄມ້ໃຫ້ເປັນປ່າ ແລະ ສ້າງພື້ນທີ່ສີຂຽວຢ່າງຂະໜາດໃຫຍ່ຕາມຫຼັກວິທະຍາສາດ, ຊຸກຍູ້ການຍົກສູງຄຸນນະພາບປ່າໄມ້ຢ່າງຖືກເປົ້າໝາຍ ແລະ ການສ້າງປ່າສະສົມແຫ່ງຊາດ.” ປະມວນກົດໝາຍວ່າດ້ວຍສິ່ງແວດລ້ອມທຳມະຊາດຂອງຈີນໄດ້ກຳນົດຢ່າງຈະແຈ້ງວ່າ “ການປູກໄມ້ໃຫ້ເປັນປ່າ, ປົກປັກຮັກສາປ່າໄມ້ເປັນພັນທະຂອງພົນລະເມືອງ.”ຮຽກຮ້ອງໃຫ້ “ເພີ່ມທະວີການປົກປັກຮັກສາລະບົບນິເວດປ່າໄມ້ ແລະ ພູເຂົາທີ່ເປັນສິ່ງສຳຄັນແຫ່ງການບັນຈຸປ່າໄມ້.”
ໄປຄຽງຄູ່ກັບຈີນຊຸກຍູ້ການລົງເລິກປະຕິຮູບລະບຽບການກຳມະສິດປ່າໄມ້ລວມໝູ່, ທ້ອງຖິ່ນຕ່າງໆໄດ້ຖືເອົາການປົກປັກຮັກສາສິ່ງແວດລ້ອມທຳມະຊາດໄວ້ຢູ່ໃນຖານະສຳຄັນອັນດັບໜຶ່ງ, ວາງແຜນເປັນເອກະພາບກັນໃນການປົກປັກຮັກສາແລະ ພັດທະນາ, ຊຸກຍູ້ການນຳໃຊ້ຊັບພະຍາກອນປ່າໄມ້ແບບໝູນວຽນ, ປະຢັດແລະ ມີປະສິດທິພາບສູງ, ດຳເນີນການທຸລະກິດປ່າໄມ້ຢ່າງມີວິທະຍາສາດ, ເພີ່ມປະສິດທິຜົນດ້ານນິເວດ, ປະສິດທິຜົນດ້ານເສດຖະກິດ ແລະ ປະສິດທິຜົນດ້ານສັງຄົມຂອງປ່າໄມ້ໃຫ້ສູງຂຶ້ນຢ່າງບໍ່ຢຸດຢັ້ງ. ປີ2025, ຍອດມູນຄ່າການຜະລິດຂອງອຸດສາຫະກຳປ່າໄມ້ ແລະ ທົ່ງຫຍ້າຂອງຈີນໄດ້ບັນລຸເກືອບ 11,000 ຕື້ຢວນ, ຍອດມູນຄ່າການຄ້ານຳເຂົ້າ ແລະ ສົ່ງອອກຜະລິດຕະພັນປ່າໄມ້ບັນລຸຫຼາຍກວ່າ 180 ຕື້ໂດລາ.
ພວກເຮົາຊົມໃຊ້ຮົ່ມເຢັນທີ່ເປັນຂອງຂວັນຈາກຄົນຮຸ່ນກ່ອນຍິ່ງຄວນສ້າງປ່າໄມ້ອັນກວ້າງໃຫຍ່ໄພສານໄວ້ໃຫ້ແກ່ຄົນຮຸ່ນຫຼັງ.
ທ່ານ ສີຈິ້ນຜິງ ເນັ້ນໜັກວ່າ: “ພະນັກງານການນຳທຸກຂັ້ນຕ້ອງປະຕິບັດດ້ວຍຕົນເອງ, ພ້ອມທັງປະດິດສ້າງຮູບການປູກຕົ້ນໄມ້ຕາມພັນທະ, ເພື່ອສ້າງເງື່ອນໄຂອຳນວຍຄວາມສະດວກໃຫ້ແກ່ປະຊາຊົນເຂົ້າຮ່ວມການປູກໄມ້ໃຫ້ເປັນປ່າ ແລະ ສ້າງພື້ນທີ່ສີຂຽວຢ່າງມີປະສິດທິຜົນຫຼາຍກວ່າເກົ່າ.”
ບໍ່ວ່າຈະເປັນການປະກອບທຶນປູກຕົ້ນໄມ້ຕົ້ນໜຶ່ງໃນຕົວເມືອງ ຫຼື ຮັບເໝົາປ່າໄມ້ຜືນໜຶ່ງໃນຊົນນະບົດ, ບໍ່ວ່າຈະເປັນການເຂົ້າຮ່ວມກິດຈະກຳປູກຕົ້ນໄມ້ຕາມພັນທະ ຫຼື ປະຕິບັດຕົວຈິງໃນການໃຊ້ວິຖີຊີວິດແບບສີຂຽວ… ຈາກ “ຜູ້ໄດ້ຮົ່ມເຢັນ” ສູ່ “ຜູ້ປູກໄມ້” ຊຶ່ງບໍ່ພຽງແຕ່ເປັນການຫັນປ່ຽນທາງດ້ານຖານະເທົ່ານັ້ນຍັງເປັນການສືບທອດຄວາມຮັບຜິດຊອບອີກດ້ວຍ.
ໂດຍ: ຊີອາໄອ
ຄໍາເຫັນ