ພູມໃຈທີ່ເຫັນປະເທດຊາດໄດ້ຮັບການພັດທະນາ

ວັນສະຖາປະນາ ສປປ ລາວ ເປັນວັນໜຶ່ງທີ່ມີຄວາມໝາຍສໍາຄັນຂອງຊາດລາວ ແລະ ປະຊາຊົນລາວບັນດາເຜົ່າ ແມ່ນວັນໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຕ້ານການຮຸກຮານ ແລະ ຢຶດຄອງຂອງຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່ທີ່ເຕັມໄປດ້ວຍການເສຍສະຫຼະເລືອດເນື້ອອັນໃຫຍ່ຫຼວງຂອງພະນັກງານ-ນັກຮົບ, ປະຊາຊົນລາວບັນດາເຜົ່າ ແລະ ກໍແມ່ນວັນທີ່ຊາດລາວ, ປະຊາຊົນລາວໄດ້ມີອິດສະຫຼະພາບ, ເປັນເຈົ້າຂອງປະເທດຊາດຢ່າງແທ້ຈິງ.

ພາຍຫຼັງປະເທດຊາດໄດ້ຮັບການປົດປ່ອຍໃນວັນທີ 2 ທັນວາ 1975 ມາເຖິງປັດຈຸບັນແມ່ນຄົບຮອບ 50 ປີ, ພາຍໃຕ້ການນໍາພາຂອງພັກປະຊາຊົນ ປະຕິວັດລາວທີ່ສະຫຼາດສ່ອງໄສ, ນໍາພາປວງຊົນລາວທັງຊາດໃນການປົກປັກຮັກສາ ແລະ ສ້າງສາພັດທະນາປະເທດຊາດພວກເຮົາໄດ້ຮັບການພັດທະນາກ້າວຂຶ້ນຢ່າງບໍ່ຢຸດຢັ້ງ; ຊີວິດການເປັນຢູ່ຂອງປະຊາຊົນບັນດາເຜົ່ານັບມື້ນັບດີຂຶ້ນ, ສັງຄົມມີຄວາມສະຫງົບປອດໄພ, ເສດຖະກິດ, ວັດທະນະທຳ-ສັງຄົມມີການຂະຫຍາຍຕົວຢ່າງຕໍ່ເນື່ອງ; ພື້ນຖານໂຄງລ່າງໄດ້ຮັບການພັດທະນາດີຂຶ້ນເປັນກ້າວໆ.

ສະຫາຍ ພົນຈັດຕະວາ ສອນໄຊ ຈັນຍາລາດ ກ່າວຕື່ມອີກວ່າ: ຕະຫຼອດໄລຍະຜ່ານມາ, ກອງທັບປະຊາຊົນລາວໄດ້ມີບາດກ້າວເຕີບໃຫຍ່ເຂັ້ມແຂງ ເປັນທີ່ຍອມຮັບໃນພາກພື້ນ ແລະ ສາກົນ; ເວົ້າລວມ, ເວົ້າສະເພາະກົມພະ ນັກງານ ກົມໃຫຍ່ການເມືອງກອງທັບມີຜົນສຳເລັດຫຼາຍດ້ານສະແດງອອກດ້ານວຽກງານກໍ່ສ້າງພັກ ໄດ້ຖືສໍາຄັນການກໍ່ສ້າງພັກທາງດ້ານການເມືອງແນວຄິດໃຫ້ພະນັກງານ-ສະມາຊິກພັກໄດ້ຮັບການຄົ້ນຄວ້າຮໍ່າຮຽນທິດສະດີມາກ-ເລນິນແນວຄິດໄກສອນ ພົມວິຫານ, ແນວທາງແຜນນະໂຍບາຍຂອງພັກ, ກົດໝາຍຂອງລັດ ແລະ ແນວທາງປ້ອງກັນຊາດ -ປ້ອງກັນຄວາມສະຫງົບຂອງພັກ-ລັດຢ່າງເປັນປະຈໍາ. ກົມພະນັກງານຍາມໃດກໍເປັນໃຈກາງປະສານສົມທົບກັບບັນ ດາອົງການ, ກົມກອງຂຶ້ນແຜນກຳນົດພະນັກງານນໍາພາຄຸ້ມຄອງຢູ່ແຕ່ລະຂັ້ນ ການຂຶ້ນແຜນກຳນົດພະນັກງານແມ່ນປະຕິບັດຖືກຕ້ອງຕາມບາດກ້າວ, ຂັ້ນຕອນ, ເຊິ່ງຜ່ານມາໄດ້ສຳເລັດການຂຶ້ນແຜນກຳນົດພະນັກງານແລ້ວ 2 ຂັ້ນຄື ຂັ້ນສູນກາງຄຸ້ມຄອງ ແລະ ຂັ້ນກະຊວງປ້ອງກັນປະເທດຄຸ້ມຄອງ, ສຳລັບການກໍ່ສ້າງ-ບຳລຸງພະນັກງານຜ່ານມາ, ໄດ້ສົ່ງພະນັກງານນັກຮົບໄປກໍ່ສ້າງ-ບຳລຸງຢູ່ພາຍໃນ ແລະ ຕ່າງປະເທດ, ການຄຸ້ມຄອງພະນັກງານໄດ້ປະຕິບັດຖືກຕ້ອງຕາມລະບຽບການຢ່າງເຂັ້ມງວດ, ມີການແບ່ງຂັ້ນຄຸ້ມຄອງຢ່າງຈະແຈ້ງ, ໃນນີ້ໄດ້ຖືສໍາຄັນການຄຸ້ມຄອງພະນັກງານດ້ວຍຖານຂໍ້ມູນ ແລະ ບັນຊີສະຖິຕິ ເຮັດໃຫ້ການຄຸ້ມຄອງເປັນລະບົບຊັດເຈນຂຶ້ນ, ສ່ວນການປັບປຸງການຈັດຕັ້ງແມ່ນໄດ້ເປັນເຈົ້າການຄົ້ນຄວ້ານຳສະເໜີຂັ້ນເທິງປັບປຸງການຈັດຕັ້ງຂັ້ນຕ່າງໆ ໃຫ້ມີຄວາມໜັກແໜ້ນ, ການແຕ່ງຕັ້ງສັບຊ້ອນພະນັກງານແມ່ນໄປຕາມຄວາມຮຽກຮ້ອງຕ້ອງການໜ້າທີ່ການເມືອງຂອງກອງທັບ, ຕາມແຜນກຳນົດພະນັກງານຖືກຕາມມາດຕະຖານແຕ່ລະຕຳແໜ່ງງານ ແລະ ຄວາມຮູ້ຄວາມສາມາດຂອງພະນັກງານ.

ສະຫາຍໃຫ້ຮູ້ຕື່ມອີກວ່າ: ເພື່ອເປັນການສ້າງຜົນງານຂໍ່ານັບຮັບຕ້ອນວັນສຳຄັນຕ່າງໆ ຂອງຊາດຂອງພັກ ຂອງກອງທັບທີ່ຈະມາເຖິງໃນມໍ່ໆນີ້, ກົມພະນັກງານກົມໃຫຍ່ການເມືອງກອງທັບໄດ້ສຸມໃສ່ນໍາພາຊີ້ນໍາສ້າງຂະບວນການດ້ານຕ່າງໆ ເປັນຕົ້ນຂະບວນການປະຕິບັດໜ້າທີ່ການເມືອງຂອງກົມກອງ, ຂະບວນການກິລາ, ຂະບວນການອອກແຮງງານເພີ່ມພູນຜະລິດຜົນ, ອະນາໄມສະຖານທີ່ເຮັດວຽກໃຫ້ມີຄວາມສະອາດຈົບງາມ, ນໍາພາພະນັກງານ, ສະມາຊິກພັກເຂົ້າຮ່ວມຮັບຟັງປາຖະກະຖາມູນເຊື້ອວັນສໍາຄັນຂອງຊາດ, ຂອງພັກ, ຂອງກອງທັບ ແລະ ສາກົນຢ່າງເປັນຂະບວນການຟົດຟື້ນກວ້າງຂວາງ.

ສະຫາຍຍັງໄດ້ຕາງໜ້າໃຫ້ຄະນະພັກ-ຄະນະກົມພະນັກງານ ກົມໃຫຍ່ການເມືອງກອງທັບ ກໍຄືສະມາຊິກພັກພາຍໃນກົມກອງເຊີນຊວນບັນດາສະຫາຍພະນັກງານ, ສະມາຊິກພັກ, ນັກຮົບໃນທົ່ວກອງທັບ ຈົ່ງພ້ອມກັນອອກ ແຮງແຂ່ງຂັນກັນສ້າງຜົນງານຮອບດ້ານເພື່ອຂໍ່ານັບຮັບຕ້ອນ ແລະ ຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ວັນສະຖາປະນາ ສປປລາວ ຄົບຮອບ 50 ປີ, ວັນເກີດປະທານ ໄກສອນ ພົມວິຫານ ຄົບຮອບ 105 ປີ ແລະ ກອງປະຊຸມໃຫຍ່ຄັ້ງທີ XII ຂອງພັກໃຫ້ເປັນຂະບວນຟົດຟື້ນກວ້າງຂວາງເຕັມໄປດ້ວຍຄວາມໝາຍອັນເລິກເຊິ່ງ. ພ້ອມທັງກ່າວອວຍພອນໄຊອັນປະເສີດມາຍັງການນໍາພັກ-ລັດ, ການນໍາກະຊວງປ້ອງກັນປະເທດຈົ່ງມີສຸຂະພາບເຂັ້ມແຂງ, ມີພາລະນາໄມສົມບູນ, ມີຜົນສຳເລັດໃນໜ້າທີ່ວຽກງານອັນມີກຽດສະຫງ່າຂອງຕົນ, ອວຍພອນໄຊມາຍັງພະນັກງານ, ນາຍ ແລະ ພົນທະຫານໃນທົ່ວກອງທັບຈົ່ງມີສຸຂະພາບແຂງແຮງ ພ້ອມກັນເຮັດສຳເລັດໜ້າທີ່ ທີ່ການຈັດຕັ້ງຂັ້ນເທິງມອບໝາຍໃຫ້.