 |
ການພົບປະຜູ້ມີສິດເລືອກຕັ້ງຄັ້ງນີ້, ໄດ້ຜ່ານປະຫວັດຫຍໍ້ຂອງຜູ້ສະໝັກແຕ່ລະທ່ານ. ຈາກນັ້ນ, ຄະນະຜູ້ສະໝັກ ກໍໄດ້ສະເໜີຕົວຕໍ່ຜູ້ມີສິດປ່ອນບັດເລືອກຕັ້ງ ພ້ອມທັງສະແດງວິໄສທັດຂອງຕົນໃນການຮັບໃຊ້ປະຊົນ, ຖ້າໄດ້ຮັບການເລືອກຕັ້ງເປັນ ສສຊ ຊຸດທີ X ໂດຍຈະສືບຕໍ່ເອົາໃຈໃສ່ລົງໃກ້ຊິດຕິດແທດກັບທ້ອງຖິ່ນຮາກຖານ ເພື່ອປະກອບສ່ວນຊຸກຍູ້ຊ່ວຍເຫຼືອແກ້ໄຂຊີສິດການເປັນຢູ່ຂອງພໍ່ແມ່ປະຊາຊົນ ໃຫ້ມີຢູ່ມີກິນ, ເອົາໃຈໃສ່ແກ້ໄຂບັນຫາພື້ນຖານໂຄງລ່າງ, ບັນຫາການສຶກສາ, ສາທາລະນະສຸກ ແລະ ການສ້າງວຽກເຮັດງານທໍາ ເພື່ອເຮັດໃຫ້ປະຊາຊົນມີອາຊີບທີ່ໝັ້ນຄົງ ແລະ ມີລາຍຮັບທີ່ແນ່ນອນ, ສາມາດຫຼຸດພົ້ນອອກຈາກຄວາມທຸກຍາກເທື່ອລະກ້າວ. ພ້ອມນັ້ນ ກໍໄດ້ຮັບຟັງຄຳເຫັນ ແລະ ບາງຄຳສະເໜີຂອງຜູ້ມີສິດເລືອກຕັ້ງຕື່ມ.
ໂອກາດນີ້, ທ່ານ ອາລຸນໄຊ ສູນນະລາດ ໄດ້ຍົກໃຫ້ເຫັນພາລະບົດບາດ, ສິດໜ້າທີ່ ແລະ ຄວາມໝາຍສໍາຄັນຂອງສະພາແຫ່ງຊາດ. ການເລືອກຕັ້ງ ສສຊ ແລະ ສສຂ ກໍເພື່ອປັບປຸງກົນໄກການບໍລິຫານລັດ ໃຫ້ກາຍເປັນອໍານາດຂອງປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດສູງສຸດຂອງປະຊາຊົນຢ່າງແທ້ຈິງ, ເພື່ອກ້າວໄປສູ່ການປ່ຽນແປງ ແລະ ການພັດທະນາທີ່ດີຂຶ້ນ. ເພື່ອສ້າງຕັ້ງລະບົບອຳນາດລັດທີ່ເຂັ້ມແຂງ ແລະ ໂປ່ງໃສ ທີ່ຮັບໃຊ້ຊາດ ແລະ ຮັບໃຊ້ປະຊາຊົນຢ່າງສຸດກົກສຸດປາຍ. ທັງນີ້ ກໍເພື່ອໃຫ້ຄະນະພັກ - ອົງການປົກຄອງ ແລະ ພໍ່ແມ່ປະຊາຊົນ ຮັບຮູ້ເຂົ້າໃຈ ແລະ ກໍາແໜ້ນຢ່າງເລິກເຊິ່ງ. ຈົ່ງພ້ອມກັນປະຕິບັດສິດ, ພັນທະ ແລະ ໄປໃຊ້ສິດເລືອກຕັ້ງໃນວັນທີ 22 ກຸມພາ 2026 ໃຫ້ຄົບຖ້ວນ ແລະ ຮັບປະກັນຜົນສຳເລັດໄດ້ຕາມຄາດໝາຍ 100%. ຜູ້ສະໝັກຮັບເລືອກຕັ້ງ ສສຊ ເຂດເລືອກຕັ້ງທີ 15 ແຂວງຈຳປາສັກ ມີທັງໝົດ 20 ທ່ານ ຍິງ 5 ທ່ານ.ໃນນັ້ນ, ເລືອກເອົາ 15 ທ່ານ, ຂີດອອກ 5 ທ່ານ.
(ຂ່າວ-ພາບ: ທູນທອງໃຈ)
ຄໍາເຫັນ