ຜູ້ມີສິດປ່ອນບັດເລືອກຕັ້ງບ້ານຄຽງຕັງແລ, ບ້ານຂົວເສັດ ຕື່ນຕົວສູງເປັນເຈົ້າໃນການໄປໃຊ້ສິດເລືອກຕັ້ງ

ທ່ານ ນາງ ເຂັມພອນ ທາມອນຕີ ຫົວໜ້າໜ່ວຍປ່ອນບັດທີ 78, ບ້ານຂົວເສັດ ເມືອງເລົ່າງາມ ໃຫ້ສຳພາດວ່າ: ບັ້ນເລືອກໃນຊຸດນີ້ ແມ່ນມີໝາຍຄວາມສຳຄັນຫຼາຍ ແລະ ເປັນເຫດການທີ່ປະຊາຊົນບັນດາເຜົ່າໃຫ້ຄວາມສົນໃຈ, ຕື່ນຕົວສູງໃນການເຂົ້າຮ່ວມ, ຊຶ່ງໄດ້ກຳນົດເອົາໂຮງຮຽນເຕັກນິກວິຊາຊີບແບບປະສົມ ແຂວງສາລະວັນ ເປັນສະຖານທີ່ດຳເນີນການປ່ອນບັດ ຂອງໜ່ວຍປ່ອນບັດທີ 78 ໄດ້ດຳເນີນໄປຢ່າງມີລະບຽບ ແລະ ມີການກໍານົດແບບການປ່ອນບັດ ສສຊ ແລະ ສສຂ ຢ່າງລະອຽດ, ສ້າງຄວາມສະດວກສະບາຍໃຫ້ແກ່ຜູ້ມາໃຊ້ສິດ, ສິ່ງທີ່ໜ້າປະທັບໃຈ ເຫັນໄດ້ພໍ່ແມ່ພີ່ນ້ອງປະຊາຊົນ ບັນດາເຜົ່າ ກໍຄືຜູ້ມີສິດປ່ອນບັດ ມີຄວາມຕື່ນຕົວສູງ, ຍົກສູງສະຕິເປັນເຈົ້າໃນການເລືອກເອົາຜູ້ແທນຂອງຕົນ ສະແດງໃຫ້ເຫັນເຖິງການເຕົ້າໂຮມຄວາມສາມັກຄີຢ່າງແໜ້ນໜາ, ມີຄວາມສະຫງົບ ເປັນລະບຽບ ແລະ ຄວາມຮັບຮູ້ ຄວາມເຂົ້າໃຈ ຕໍ່ກັບຂັ້ນຕອນ, ວິທີການຕ່າງໆຢ່າງເລີກເຊິ່ງ, ຄາດຄະເນການນັບຄະແນນ ເພື່ອລາຍງານຂັ້ນເທີງ ຈະສຳເລັດຕາມເວລາທີ່ໄດ້ກຳນົດໄວ້. ໜ່ວຍປ່ອນບັດທີ 78ມີ 1 ໜ່ວຍບັດ, 2 ຫີບບັດ ແລະ ຜູ້ມີສິດເລືອກຕັ້ງຕົວຈິງ 826 ຄົນຍິງ 406 ຄົນ.

ທ່ານ ນາງ ສຸກະ ປະຊາຊົນບ້ານຄຽງຕັງແລ ໄດ້ສະແດງຄວາມຮູ້ສຶກພາກພູມໃຈເປັນຢ່າງຍິ່ງ ທີ່ໄດ້ເປັນສ່ວນໜຶ່ງໃນການໃຊ້ສິດໃຊ້ສຽງເລືອກເອົາຜູ້ແທນສະພາແຫ່ງຊາດ ແລະ ສະພາປະຊາຊົນແຂວງ, ຊຶ່ງເປັນຄັ້ງທຳອິດຂອງຕົນເອງ ແລະ ໄດ້ມີຄວາມຕື່ນຕົວ, ກຽມພ້ອມໃນແຕ່ຫົວທີ, ອ່ານສຶກສາປະຫວັດຂໍ້ມູນຂອງບັນດາທ່ານຢ່າງລະອຽດ. ນອກນັ້ນ, ຈຸດປ່ອນບັດຄັ້ງນີ້ ແມ່ນມີຄວາມສະດວກສະບາຍ ແລະ ສາມາດດຳເນີນການປ່ອນບັດຢ່າງເປັນລະບຽບ ແລະວ່ອງໄວ.

(ຂ່າວ-ພາບ: ວິໄລວອນ ສິດທິໄຊ)