ທັງນີ້, ປະມານ 20 ປະເທດລວມທັງອິນເດຍ, ໜຶ່ງໃນບັນດາປະເທດທີ່ປ່ອຍແກ໊ສກາກບອນສູງທີ່ສຸດ ໄດ້ສະໜັບສະໜູນຄຳໝັ້ນສັນຍານີ້, ໂດຍອີງໃສ່ລະດັບການໃຊ້ເຊື້ອໄຟທີ່ຍືນຍົງໃນປີ 2024.
ເປົ້າໝາຍແມ່ນເພື່ອເພີ່ມການນຳໃຊ້ເຊື້ອໄຟທີ່ຍືນຍົງເຊັ່ນ: ອາຍແກ໊ສຊີວະພາບ, ເຊື້ອໄຟຊີວະພາບແລະ ໄຮໂດຣເຈນທີ່ມີກາກບອນຕ່ຳ, ໂດຍເຊື່ອວ່າການນໍາເຊື້ອໄຟຍືນຍົງມາໃຊ້ແທນເຊື້ອໄຟຟອດຊິວຢ່າງກວ້າງຂວາງຈະຊ່ວຍຫຼຸດຜ່ອນການປ່ອຍແກ໊ສເຮືອນແກ້ວ.
ທັງນີ້, ຖະແຫຼງການສະໜັບສະໜູນການໃຊ້ເຊື້ອໄຟທີ່ຍືນຍົງໄດ້ຖືກເປີດເຜີຍໃນກອງປະຊຸມຜູ້ນຳພາຄີອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດຄັ້ງທີ 30 ຫຼື (COP30).
ທ່ານນາງ ຊານາເອະ ທາຄາອິຈິ ນາຍົກລັດຖະມົນຕີຍີ່ປຸ່ນຄົນໃໝ່ ບໍ່ໄດ້ເດີນທາງໄປປະເທດບຣາຊິນເພື່ອເຂົ້າຮ່ວມກອງປະຊຸມດັ່ງກ່າວ, ໂດຍຍັງຄົງຢູ່ໃນປະເທດຍີ່ປຸ່ນເພື່ອເຂົ້າຮ່ວມການພິຈາລະນາພິເສດຂອງລັດຖະສະພາ.
ຖະແຫຼງການດັ່ງກ່າວໄດ້ເນັ້ນໜັກເຖິງຄວາມຕ້ອງການສຳລັບການດຳເນີນການທາງການເມືອງລະດັບສູງ ແລະ ການຮ່ວມມືກັນເພື່ອເລັ່ງການຂະຫຍາຍການໃຊ້ເຊື້ອໄຟທີ່ຍືນຍົງໃນຂະແໜງການຕ່າງໆເຊັ່ນ: ການບິນ, ການແລ່ນເຮືອ, ການຂົນສົ່ງທາງບົກແລະ ອຸດສາຫະກຳ.
ບັນດາຜູ້ນຳໄດ້ໃຫ້ຄຳໝັ້ນສັນຍາທີ່ຈະນຳເອົາຄຳແນະນຳກ່ຽວກັບເຊື້ອໄຟທີ່ຍືນຍົງເຂົ້າໄປໃຊ້ໃນນະໂຍບາຍແຫ່ງຊາດ ແລະ ສະທ້ອນເຖິງຄຳແນະນຳໃນຂອບການປະກອບສ່ວນທີ່ກຳນົດໄວ້ໃນລະດັບຊາດ ຊຶ່ງເປັນມາດຕະຖານສາກົນທີ່ກຳນົດໂດຍຂໍ້ຕົກລົງປາຣີປີ 2015.
ຖະແຫຼງການດັ່ງກ່າວຍັງໄດ້ຮຽກຮ້ອງໃຫ້ມີການຄົ້ນຄວ້າ ແລະ ພັດທະນາຮ່ວມກັນເພື່ອສົ່ງເສີມນະວັດຕະກໍາ, ຫຼຸດຜ່ອນຄ່າໃຊ້ຈ່າຍຂອງເຕັກໂນໂລຊີນໍ້າມັນເຊື້ອໄຟທີ່ຍືນຍົງ ແລະ ລະບົບຕ່ອງໂສ້ມູນຄ່າຂອງເຊື້ອໄຟຍືນຍົງທີ່ເກີດຂຶ້ນໃໝ່ແລະ ສະໜັບສະໜູນການຄ້າສາກົນຂອງເຊື້ອໄຟເຫຼົ່ານີ້.
ຍີ່ປຸ່ນ ແລະ ບຣາຊິນ ຊຶ່ງເປັນໜຶ່ງໃນຜູ້ນຳດ້ານການຜະລິດເຊື້ອໄຟຊີວະພາບໄດ້ສະເໜີເປົ້າໝາຍທີ່ຈະເພີ່ມການນໍາໃຊ້ເຊື້ອໄຟທີ່ຍືນຍົງຢ່າງໜ້ອຍ 4 ເທົ່າໃນເດືອນກັນຍາ ທີ່ຜ່ານມາ ເມື່ອທັງສອງປະເທດເປັນປະທານຮ່ວມໃນກອງປະຊຸມລັດຖະມົນຕີກ່ຽວກັບນໍ້າມັນເຊື້ອໄຟທີ່ຍືນຍົງໃນໂອຊາກາ ປະເທດຍີ່ປຸ່ນ.
ຄໍາເຫັນ