ສຳນັກຂ່າວຊິນຮວາ ລາຍງານວ່າ: ຮຸ້ນຂອງ ບໍລິສັດ Haitian ເຄື່ອງປຸງອາຫານ ແລະ ອາຫານ ຈໍາກັດ ໄດ້ເພີ່ມຂຶ້ນຫຼາຍກວ່າ 3% ໃນເວລາເປີດຕົວໃນຕະຫຼາດ, ສົ່ງຜົນໃຫ້ມູນຄ່າຕະຫຼາດທັງໝົດສູງກວ່າ 400 ຕື້ຢວນ, ເຮັດໃຫ້ບໍລິສັດ Haitian ຂຶ້ນເປັນວິສາຫະກິດເຄື່ອງປຸງອາຫານທີ່ມີມູນຄ່າສູງທີ່ສຸດໃນໂລກ.
ລາຄາ IPO ຢູ່ທີ່ 36.3 ໂດລາຮົງກົງຕໍ່ຮຸ້ນ, ມີ 279 ລ້ານຮຸ້ນທີ່ຂາຍອອກ, ລະດົມທຶນໄດ້ 1.48 ຕື້ໂດລາ. ນີ້ບໍ່ພຽງແຕ່ເປັນ IPO ທີ່ໃຫຍ່ທີ່ສຸດໃນອຸດສາຫະກໍາສິນຄ້າບໍລິໂພກທົ່ວໂລກໃນປີ 2025, ແຕ່ຍັງສ້າງສະຖິຕິການເງິນໃນອຸດສາຫະກໍາເຄື່ອງປຸງອາຫານທົ່ວໂລກໃນໄລຍະ 25 ປີທີ່ຜ່ານມາອີກດ້ວຍ.
 |
|
ວັນທີ 19 ມິຖຸນາ 2025, ຮູບພາບສະແດງໃຫ້ເຫັນ ບໍລິສັດ Haitianເຄື່ອງປຸງອາຫານ ແລະ ອາຫານ ຈໍາກັດ (03288.HK) ຢູ່ໃນຕະຫຼາດຫຼັກຊັບຮົງກົງ. |
IPO ນີ້ ສະແດງໃຫ້ເຫັນຄວາມໝັ້ນໃຈຂອງນັກລົງທຶນທົ່ວໂລກທີ່ມີຕໍ່ຜູ້ນໍາອຸດສາຫະກໍາເຄື່ອງປຸງອາຫານຂອງຈີນ, ໂດຍການສະເໜີຂາຍຮຸ້ນຕໍ່ສະທາລະນະຄັ້ງທໍາອິດໃນຮົງກົງມີຜູ້ຈອງຊື້ເກີນກວ່າ 918.2 ເທົ່າ. ການສະເໜີຂາຍຮຸ້ນສາກົນມີຜູ້ຈອງຊື້ເກີນກວ່າ 22.9 ເທົ່າ ແລະ ສໍາເລັດການຂາຍກ່ອນກໍານົດ.
ນັກລົງທຶນທີ່ສໍາຄັນ ເຊັ່ນ: HHLR Advisors, Ltd., GIC Private Limited ແລະ UBS Asset Management (Singapore) Ltd. ເປັນຜູ້ໃຫ້ການສະໜັບສະໜູນເງິນທຶນໃນການຈອງຊື້ ລວມມູນຄ່າເກືອບ 4.7 ຕື້ໂດລາຮົງກົງ ຊຶ່ງເກືອບເຄິ່ງໜຶ່ງຂອງມູນຄ່າການຂາຍອອກຮຸ້ນທັງໝົດ.
ຕາມລາຍງານລະບຸວ່າ: ເງິນທຶນທີ່ລະດົມໄດ້ໃນຄັ້ງນີ້ ສ່ວນໃຫຍ່ຈະນໍາໄປໃຊ້ເຂົ້າໃນການພັດທະນາຜະລິດຕະພັນທີ່ແນໃສ່ສຸຂະພາບ ແລະ ສອດຄ່ອງກັບເທຣນຊັ້ນ, ການວິໄຈ ແລະ ການພັດທະນາເຕັກໂນໂລຊີການໝັກເປັນຫຼັກ, ການສ້າງພື້ນຖານໂຄງລ່າງດ້ານການວິໄຈ ແລະ ການພັດທະນາໃນທົ່ວໂລກ, ການຍົກລະດັບຍີ່ຫໍ້ໃນທົ່ວໂລກ ແລະ ການຂະຫຍາຍເຄືອຂ່າຍການຈຳໜ່າຍ, ລວມທັງເພີ່ມທະວີຄວາມສາມາດຂອງຕ່ອງໂສ້ການສະໜອງຢູ່ຕ່າງປະເທດ.
ຕາມລາຍງານ ບໍລິສັດໄດ້ສ້າງຜະລິດຕະພັນແບບປະສົມປະສານທີ່ຄົບວົງຈອນທີ່ສຸດຂອງອຸດສາຫະກໍາ ໂດຍກວມເອົາຜະລິດຕະພັນຫຼາຍກວ່າ 1,400 SKUs. 7 ຜະລິດຕະພັນຫຼັກຂອງບໍລິສັດໄດ້ສ້າງຍອດການຂາຍຕໍ່ປີເກີນ 1 ຕື້ຢວນ. ບໍລິສັດເປັນຜູ້ນໍາໃນຕະຫຼາດພາຍໃນປະເທດ ດ້ວຍສ່ວນແບ່ງການຕະຫຼາດຫຼາຍກວ່າຄູ່ແຂ່ງຫຼາຍກ່ວາສອງເທົ່າ.
ອີງຕາມການຄາດຄະເນຂອງ Frost & Sullivan, ຕະຫຼາດເຄື່ອງປຸງອາຫານທົ່ວໂລກຄາດວ່າຈະບັນລຸເຖິງ 402.7 ຕື້ໂດລາ ໃນປີ 2029, ດ້ວຍອັດຕາການຂະຫຍາຍຕົວປະຈໍາປີແບບທົບຕົ້ນ (CAGR) ຢູ່ທີ່ 6.2% ຕັ້ງແຕ່ປີ 2024 ຫາປີ 2029. ຕະຫຼາດທີ່ເກີດໃໝ່ກໍາລັງເລັ່ງການຂະຫຍາຍຕົວດັ່ງກ່າວ, ໂດຍອາຊີຕາເວັນອອກສ່ຽງໃຕ້ ແລະ ອາເມຣິກາລາຕິນ ອັດຕາການຂະຫຍາຍຕົວປະຈໍາປີແບບທົບຕົ້ນ (CAGR) ຢູ່ທີ່ 9.1% ແລະ 7.8%. ຕາມລໍາດັບ.
ນັກວິເຄາະອຸດສາຫະກຳກ່າວວ່າ: ເສັ້ນທາງການເຕີບໂຕທີ່ເຂັ້ມແຂງນີ້ສ້າງໂອກາດທີ່ກວ້າງຂວາງໃຫ້ແກ່ການຫັນເປັນສາກົນຂອງເຄື່ອງປຸງອາຫານຂອງຈີນໄປທົ່ວໂລກ, ໄດ້ສ້າງເງື່ອນໄຂທີ່ສະດວກໃຫ້ແກ່ການພັດທະນາໃນລະດັບໂລກຂອງ Haitian ອີກດ້ວຍ.
(ໂດຍ: Niu Huizhe ກັບ Xinhua Silk Road, niuhuizhe@xinhua.org)
ຄໍາເຫັນ