ຜູ້ແທນກອງປະຊຸມສຳມະນາລະດັບຊາດ ໄປທັດສະນະຢູ່ເມືອງໂຂງ

ເມື່ອວັນທີ 23 ທັນວາ ຜ່ານມາ, ຄະນະຜູ້ແທນຫຼາຍສະຫາຍ ທີ່ເຂົ້າຮ່ວມກອງປະຊຸມສຳມະນາວິທະຍາສາດລະດັບຊາດ ໃນໂອກາດລະນຶກ ວັນເກີດຂອງ ປະທານ ຄໍາໄຕ ສີພັນດອນ ຄົບຮອບ 100 ປີ (8/2/1924-8/2/2024) ໄດ້ຈັດຂຶ້ນໃນວັນທີ 22 ທັນວາ ຜ່ານມາ ທີ່ແຂວງຈໍາປາສັກ ໄດ້ໄປທັດສະນະຢູ່ເມືອງໂຂງ ຊຶ່ງແມ່ນຖິ່ນຖານບ້ານເກີດຂອງ ປະທານ ຄໍາໄຕ ສີພັນດອນ ເພື່ອຢ້ຽມຊົມ ແລະ ຮັບຮູ້ເຖິງບາງຜົນງານທີ່ ປະທານ ຄໍາໄຕ ສີພັນດອນ ນໍາພາປະຊາຊົນສ້າງສາພັດທະນາບ້ານເກີດເມືອງນອນຂອງເພິ່ນ.
    ການທັດສະນະຄັ້ງນີ້, ນໍາໂດຍ ສະຫາຍ ລາວປາວຊົງ ນະວົງໄຊ ກຳມະການສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ; ມີສະຫາຍ ນາງ ອິນລາວັນ ແກ້ວບຸນພັນ ກຳມະການສູນກາງພັກ ຮອງປະທານສູນກາງແນວລາວສ້າງຊາດ ພ້ອມດ້ວຍບັນດາສະຫາຍການນໍາຂັ້ນຕ່າງໆ ທີ່ເປັນນັກວິທະຍາສາດ ທີ່ສະເໜີບົດກ່ຽວກັບແນວຄິດຊີ້ນໍາ ຂອງປະທານ ຄໍາໄຕ ສີພນດອນ ໃນແຕ່ລະຂົງເຂດ ແລະ ມີບັນດາພະນັກງານກ່ຽວຂ້ອງເຂົ້າຮ່ວມ ຊຶ່ງການທັດສະນະຄັ້ງນີ້ ໄດ້ຮັບການຕ້ອນຮັບຂອງ ສະຫາຍ ນາງ ຄຳພູ ລິດທິສັກ ກຳມະການພັກແຂວງ, ເຈົ້າເມືອງໂຂງ ພ້ອມຄະນະ.
    ບັນດາສະຖານທີ່ ທີ່ໄດ້ໄປທັດສະນະຄັ້ງນີ້, ມີຫຼາຍບ່ອນເປັນຕົ້ນຄື: ເຮືອນຂອງປະທານ ຄຳໄຕ ສີພັນດອນ, ສຸກສາລາ ຫຼື ໂຮງໝໍນ້ອຍຫົວໂຂງ, ຜະລິດຕະພັນນ້ຳຕານກ້ອນຂອງປະຊາຊົນບ້ານຫີນສິ່ວ, ຣີສອດນາແປງຂອງພໍ່ເຖົ້າສ້າງ, ປັດຈຸບັນກຳລັງປັບປຸງເປັນຫໍມູນເຊື້ອ, ໂຄງການກໍ່ສ້າງເຂດເສດຖະກິດພິເສດ ແລະ ໂຄງການກໍ່ສ້າງຕຶກແຄນຄູ່ ແລະ ຕຶກຕິບເຂົ້າໃຫຍ່ ຂອງໂຄງການມະຫານາທີສີທັນດອນ ຊຶ່ງທັງໝົດນັ້ນເປັນພຽງບາງສ່ວນທີ່ປະທານ ຄໍາໄຕ ສີພັນດອນ ໃຊ້ຊີວິດໃນຍາມພັກຜ່ອນ ຢູ່ໃກ້ຊິດຕິດແທດ ກັບຊີວິດຕົວຈິງຂອງປະຊາຊົນ, ຊອກຮູ້ບັນຫາ ແລະ ຄວາມຕ້ອງການຂອງປະຊາຊົນ ຄົ້ນຄວ້າຫາວິທີຊ່ວຍເຫຼືອເຂົາເຈົ້າ, ແນະນໍາ ແລະ ພາປະຊາຊົນເຮັດຕົວຈິງ ເພື່ອພັດທະນາສ້າງສາບ້ານເກີດເມືອງນອນ ກໍຄືພັດທະນາປະເທດຊາດ.
(ຂ່າວ-ພາບ: ສຸກສະຫວັນ, ຂໍ້ມູນຈາກ: ຄອຂ ຈໍາປາສັກ)