 |
ກ່ອນເຂົ້າສູ່ພິທີກໍາທາງສາສະໜາ, ຄະນະກໍາມະການຈັດງານບຸນປີ 2026 ກໍໄດ້ມີການມອບຮູບຈໍາລອງອົງພະສີໂຄດຕະບອງ, ຮູບຫຼຽນພະຍາສີໂຄດຕະບອງ, ຫຼຽນພະເຈົ້າໃຫຍ່ສີໂຄດ ແລະ ຂອງທີ່ລະນຶກແກ່ຄະນະການນໍາຂັ້ນສູນກາງ, ຂັ້ນແຂວງ, ບັນດາເມືອງ, ບໍລິສັດຫ້າງຮ້ານ, ຜູ້ໃຫ້ການອຸປະຖໍາຕະຫຼອດພໍ່ແມ່ປະຊາຊົນຜູ້ທີ່ມາຮ່ວມໃນງານບຸນຄັ້ງນີ້. ໃຫ້ກຽດມອບໂດຍຍາທ່ານໃຫຍ່ ມະຫາຄໍາມາ ປັນຍາວິຈິດ. ຈານັ້ນ, ທ່ານ ໄຊຊະນະ ໂຄດພູທອນ ກໍາມະການສູນກາງພັກ ເລຂາພັກແຂວງ ກໍໄດ້ໄຕ້ທຽນໄຊຖວາຍຄຸນພະຣັດຕະນະໄຕຣ ເພື່ອໄຫວ້ພະຮັບສິນ, ໃສ່ບາດ, ຢາດນໍ້າ ແລະ ຖວາຍປັດໃຈໄຊຍະທານຕາມສັດທາຂອງໃຜລາວ.
 |
ສ່ວນໃນຕອນບ່າຍ, ແມ່ນຈະໄດ້ມີການຮັບຊົມການແຂ່ງຂັນກິລາບານສົ່ງຍິງ-ຊາຍ ແລະ ກະຕໍ້ຊາຍປະເພດທີມທົ່ວໄປ ແລະ ທີມອາວຸໂສ ຮອບຊິງຊະນະເລີດ. ຊຶ່ງທີມບານສົ່ງຍິງເປັນການພົບກັນລະຫວ່າງ ຮ້ານລ້າງລົດ ບິວ ບິວ ແລະ ໂຮງຮຽນມິດຕະພາບຄໍາມ່ວນ-ກວາງບິ່ງ, ທີມບານສົ່ງຊາຍເປັນການພົບກັນລະຫວ່າງ ຮ້ານລ້າງລົດ ບິວ ບິວ ແລະ ໄວລຸ້ນຂົວ 3. ຊຶ່ງກິລາກະຕໍ້ຊາຍທີມອາວຸໂສເປັນການພົບກັນລະຫວ່າງ ທີມທະວັດໄຊ ແລະ ທີມຮ້ານອາຫານນາງຈອນ, ກະຕໍ້ຊາຍປະເພດທີມທົ່ວໄປເປັນການພົບກັນລະຫວ່າງ ທີມບ້ານມ່ວງສຸມ ແລະ ທີມມີໄຊຂົນສົ່ງ.
 |
ສໍາລັບຕອນຄໍ່າຄືນ ແມ່ນຈະໄດ້ມີການວຽນທຽນອ້ອມຮອບ ພຸດທະສິມມາ ແລະ ອົງພະທາດ ພ້ອມທັງຮັບຊົມກິດຈະກໍາຕ່າງໆພາຍໃນງານ ພ້ອມນັ້ນໃນຕອນເຊົ້າຂອງວັນທີ 3 ກຸມພາ 2026 ກົງກັບມື້ແຮມ 1 ຄໍ່າ ເດືອນ 3 ລາວ ພສ 2568 ແມ່ນຈະໄດ້ມີພິທີໃສ່ບາດຢູ່ເທິງບໍລິເວນຕີນຂອງພະທາດ ແລະ ຖວາຍພັດຕະຫານ -ປັດໃຈໄຊຍະທານແດ່ພະສົງເປັນອັນສໍາເລັດງານບຸນປີ 2026 .
 |
(ຂ່າວ-ພາບ: ແດງສະຫວັດ ແສນພານິດ)
ຄໍາເຫັນ