ສຳນັກຂ່າວສານຊິນຮວາລາຍງານໃນວັນທີ 15 ກໍລະກົດ ຜ່ານມາວ່າ: ຜົນການສຳຫຼວດໂດຍບໍລິສັດ KPMG ຊຶ່ງເປັນບໍລິສັດກວດສອບບັນຊີຊັ້ນນຳຂອງໂລກ ແລະ ຄະນະກຳມະການຫໍສະໝຸດແຫ່ງຊາດສິງກະໂປ ໄດ້ເປີດເຜີຍວ່າ, ມີຜູ້ຊ່ຽວຊານ, ຜູ້ຈັດການ, ຜູ້ບໍລິຫານ ແລະ ພະນັກງານດ້ານເຕັກນິກ ໃນສິງກະໂປ ພຽງ 4 ໃນ 10 ຄົນເທົ່ານັ້ນທີ່ໝັ້ນໃຈວ່າສາມາດຈຳແນກຂໍ້ມູນທີ່ຖືກຕ້ອງອອກຈາກຂໍ້ມູນທີ່ບໍ່ຖືກຕ້ອງທີ່ສ້າງຂຶ້ນໂດຍປັນຍາປະດິດ (AI).
ໜ້ອຍກວ່າເຄິ່ງໜຶ່ງຂອງຜູ້ຕອບແບບສອບຖາມ ຈາກທັງໝົດ 1,150 ຄົນ ໃນການສຳຫຼວດທີ່ດຳເນີນລະຫວ່າງເດືອນມິຖຸນາ ຫາ ເດືອນກໍລະກົດ ໄດ້ຊີ້ໃຫ້ເຫັນວ່າ: ພວກເຂົາຈະກວດສອບແຫຼ່ງຂໍ້ມູນຕົ້ນສະບັບຂອງສະຖິຕິກ່ອນທີ່ຈະໃຫ້ຄຳເຫັນ, ເຖິງແມ່ນວ່າຈະອ່ານເນື້ອໃນທີ່ສະຫຼຸບໂດຍ AI ຈາກລະບົບຄົ້ນຫາກໍຕາມ.
ທ່ານ ຣາຮາຢູ ມາຊຳ ລັດຖະມົນຕີກະຊວງພັດທະນາດີຈີຕອນ ແລະ ຂໍ້ມູນຂ່າວສານ ໄດ້ກ່າວໃນລະຫວ່າງການເປີດໂຄງການ “ອ່ານເພື່ອກາຍເປັນຜູ້ນຳ: ການພັດທະນາທັກສະການຄິດຢ່າງມີວິຈາລະນະຍານເພື່ອກຽມພ້ອມສຳລັບຍຸກ AI” ເປັນເວລາ 1 ປີວ່າ: ຜົນການສຳຫຼວດເຫຼົ່ານີ້ເປັນການເຕືອນວ່າ ເຖິງແມ່ນວ່າຜູ້ໃຊ້ຮູ້ວ່າເນື້ອໃນນັ້ນອາດຈະຖືກສ້າງຂຶ້ນໂດຍ AI ຫຼື ບໍ່ຄົບຖ້ວນ, ແຕ່ບາງຄົນອາດຈະຍັງຍອມຮັບຂໍ້ມູນດັ່ງກ່າວໄດ້ງ່າຍເກີນໄປ. ນີ້ແມ່ນເຫດຜົນທີ່ການຄິດຢ່າງມີວິຈາລະນະຍານ, ການທົບທວນ ແລະ ການອ່ານຢ່າງລະມັດລະວັງຈຶ່ງສຳຄັນຫຼາຍ.
ໂຄງການດັ່ງກ່າວຈັດຮ່ວມກັນໂດຍ ບໍລິສັດ KPMG ແລະ ຄະນະກຳມະການຫໍສະໝຸດແຫ່ງຊາດສິງກະໂປ, ມີຈຸດປະສົງເພື່ອສົ່ງເສີມການອ່ານໃນບ່ອນເຮັດວຽກ ແລະ ເສີມຂະຫຍາຍທັກສະການປະເມີນຜົນທີ່ສຳຄັນຜ່ານການບັນຍາຍ, ກິດຈະກຳໂຕ້ຕອບ ແລະ ແຫຼ່ງຂໍ້ມູນຮູບແບບຕ່າງໆ.
ຄໍາເຫັນ