ປີ 2023 ແຂວງວຽງຈັນ ສາມາດເກັບລາຍຮັບງົບປະມານໄດ້ລື່ນແຜນ

ທ່ານ ວອນ ວໍລະສານ ຫົວໜ້າພະແນກການເງິນແຂວງວຽງຈັນ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງວຽງຈັນ ຊຸດທີ II ຊຶ່ງໄດ້ຈັດຂຶ້ນໃນລະຫວ່າງວັນທີ 26-29 ທັນວານີ້, ທ່ານກ່າວວ່າ: ຜ່ານການຈັດຕັ້ງປະຕິບັດມາດຕະການຕ່າງໆໃນປີ 2023 ແຂວງວຽງຈັນສາມາດເກັບລາຍຮັບງົບປະມານໄດ້ 371,08 ຕື້ກີບ ເທົ່າກັບ 125,95% ຂອງແຜນການ (ແຜນການ 294,63 ຕື້ກີບ) ທຽບໃສ່ປີ 2022 ຜ່ານມາເທົ່າກັບ 118,20% ເພີ່ມຂຶ້ນ 57,13 ຕື້ກີບ, ໃນນີ້ມີລາຍຮັບສູນກາງປະຕິບັດໄດ້ 38,78 ຕື້ກີບ; ລາຍຮັບພູດທ້ອງຖິ່ນປະຕິບັດໄດ້ 332,30 ຕື້ກີບ ເທົ່າກັບ 118,83%, ໃນນີ້ມີລາຍຮັບສ່ວຍສາອາກອນປະຕິບັດໄດ້ 241,93 ຕື້ກີບ ເທົ່າກັບ 115,59% ຂອງແຜນການປີ; ຮັບຈາກທີ່ດິນປະຕິບັດໄດ້ 12,15 ຕື້ກີບ ເທົ່າກັບ 91,33% ຂອງແຜນການປີ; ຮັບຈາກຄ່າທໍານຽມປະຕິບັດໄດ້ 6,98 ຕື້ກີບ ເທົ່າກັບ 87,23% ຂອງແຜນການປີ; ບໍລິການວິຊາການປະຕິບັດໄດ້ 24 ຕື້ກີບ ເທົ່າກັບ 100% ຂອງແຜນການປີ; ລາຍຮັບຊັບສິນປະຕິບັດໄດ້ 47,14 ຕື້ກີບ ເທົ່າກັບ 188,90% ຂອງແຜນການປີ; ລັດລົງທຶນ ແລະ ການປະກັນໄພປະຕິບັດໄດ້ 108,18 ລ້ານກີບເທົ່າກັບ 144,25% ຂອງແຜນການປີ.    ສຳລັບການຄຸ້ມຄອງລາຍຈ່າຍ ໄດ້ສຸມໃສ່ການຄຸ້ມຄອງລາຍຈ່າຍໄປຕາມທິດປະຢັດ ແລະ ຕ້ານການຟູມເຟືອຍຕາມດຳລັດ 205/ລບ, ລົງວັນທີ 22 ກໍລະກົດ 2022; ຂໍ້ຕົກລົງຂອງກະຊວງການເງິນ ສະບັບເລກທີ 0200/ກງ ວ່າດ້ວຍກຳນົດໝາຍລາຍຈ່າຍງົບປະມານ, ການປະຢັດ ແລະ ຕ້ານການຟຸ່ມເຟືອຍ; ຈັດຕັ້ງເຜີຍແຜ່ແຈ້ງການຂອງກະຊວງການເງິນ ສະບັບເລກທີ 1336/ກງ, ລົງວັນທີ 8 ພຶດສະພາ 2023 ການອະນຸມັດ ແລະ ເບິກຈ່າຍງົບ ປະມານລົງທຶນພາຍໃນຂອງລັດ ແລະ ສະບັບເລກທີ 1254/ກງ, ລົງວັນທີ 27 ເມສາ 2023 ເລື່ອງນະໂຍບາຍການ ນໍາໃຊ້ເງິນເກີນແຜນເກັບລາຍຮັບປີ 2022; ເອົາໃຈໃສ່ແກ້ໄຂລາຍຈ່າຍຕາມບູລິມະສິດເປັນຕົ້ນ ເງິນເດືອນ, ເງິນອຸດໝູນພະນັກງານເປັນປົກກະຕິ ແລະ ທັນເວລາ. ພ້ອມນີ້, ສືບຕໍ່ແນະນໍາການປະຢັດໄຟຟ້າ, ນໍ້າປະປາຢູ່ໃນສໍານັກງານຫ້ອງການຂອງລັດ ແລະ ຕ້ານການຟູມເຟືອຍການໃຊ້ຈ່າຍບໍລິຫານຕ່າງໆທີ່ບໍ່ຈໍາເປັນໃຫ້ຫຼຸດລົງໃນຕໍ່ໜ້າ; ສຸມໃສ່ຄຸ້ມຄອງການລົງທຶນຂອງລັດໃຫ້ມີປະສິດທິຜົນສູງຂຶ້ນຕາມກົດໝາຍວ່າດ້ວຍການລົງທຶນຂອງລັດ ແລະ ບັນດານິຕິກຳທີ່ກ່ຽວຂ້ອງຕ່າງໆ. ຜ່ານການອະນຸມັດເບິກຈ່າຍໝົດປີສາມາດອະນຸມັດລາຍຈ່າຍ 731,08 ຕື້ກີບ ເທົ່າກັບ 99,69% ຂອງແຜນການ (ແຜນການ 733,33 ຕື້ກີບ). ໃນນີ້ມີລາຍຈ່າຍປົກກະຕິປະຕິບັດໄດ້ 707,08 ຕື້ກີບ ເທົ່າກັບ 99,68% ຂອງແຜນການປີ, ລາຍຈ່າຍວິຊາການປະຕິບັດໄດ້ 14,36 ຕື້ກີບ ເທົ່າກັບ 82,93% ຂອງແຜນການປີ, ລາຍຮັບຈາກການດຸ່ນດ່ຽງຈາກສູນກາງປະຕິບັດໄດ້ 453,69 ຕື້ກີບ ເທົ່າກັບ 100% ຂອງແຜນການປີ.
    ທ່ານ ວອນ ວໍລະສານ ກ່າວຕື່ມອີກວ່າ: ປີ 2024 ຈະສູ້ຊົນຈັດຕັ້ງປະຕິບັດຄາດໝາຍລາຍຮັບໃຫ້ໄດ້ທັງໝົດ 333,93 ຕື້ກີບ ທຽບໃສ່ປີຜ່ານມາເທົ່າກັບ 113,34%, ເພີ່ມຂຶ້ນ 13,34% ໃນນີ້ມີລາຍຮັບພູດສູນກາງຈະສູ້ຊົນປະຕິ ບັດໃຫ້ໄດ້ 76,10 ຕື້ກີບ ແລະ ລາຍຮັບພູດທ້ອງຖິ່ນຈະສູ້ຊົນປະຕິບັດໃຫ້ໄດ້ 257,83 ຕື້ກີບ ເທົ່າກັບ 92,20% ຂອງແຜນການປີ ແລະ ຈະສູ້ຊົນຄຸ້ມຄອງລາຍຈ່າຍໃຫ້ໄດ້ທັງໝົດ 520,71 ຕື້ກີບ (ບໍ່ລວມຮ່ວງເງິນລົງທຶນປົກກະຕິຂອງລັດ ຊຶ່ງຍັງຢູ່ນຳຂະແໜງແຜນການ ແລະ ການລົງທຶນ) ເທົ່າກັບ 71,01% ຂອງແຜນການປີຜ່ານມາ. ໃນນີ້ມີລາຍຈ່າຍປົກກະຕິ 502,69 ຕື້ກີບ ແລະ ລາຍຈ່າຍວິຊາການ 18,02 ຕື້ກີບ. 
ຂ່າວ-ພາບ: ແຂວງວຽງຈັນ