ປີ 2023 ຜົ້ງສາລີ ສາມາດປະຕິບັດລາຍຮັບໄດ້ 483,05 ຕື້ກີບ 

ທ່ານ ວັນໄຊ ສຸກສັນ ຫົວໜ້າພະແນກການເງິນແຂວງຜົ້ງສາລີໄດ້ລາຍງານການຈັດຕັ້ງປະຕິບັດວຽກງານການເງິນໃນໄລຍະປີ 2023ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຜົ້ງສາລີຊຸດທີ II ໃນວັນທີ 27 ທັນວາຜ່ານມາວ່າ: ການຂຸດຄົ້ນລາຍຮັບລວມປະຕິບັດໄດ້ 483,05 ຕື້ກີບເທົ່າກັບ 122,98% ຂອງແຜນການປີ (ແຜນ 392,78 ຕື້ກີບ)ທຽບໃສ່ໄລຍະດຽວກັນໃນປີຜ່ານມາເພີ່ມຂຶ້ນ 17,47%; ໃນນີ້, ລາຍຮັບພູດສູນກາງປະຕິບັດຢູ່ທ້ອງຖິ່ນໄດ້ 41,67 ຕື້ກີບເທົ່າກັບ 83,35% ຂອງແຜນການປີ (ແຜນການ 50,00 ຕື້ກີບ), ລາຍຮັບພູດທ້ອງຖິ່ນປະຕິບັດໄດ້ 90,62 ຕື້ກີບເທົ່າກັບ 114,15% ຂອງແຜນການ (ແຜນການ 79,39 ຕື້ກີບ)ທຽບໃສ່ໄລຍະດຽວຂອງປີຜ່ານມາເພີ່ມຂຶ້ນ 12,94%ແລະ ທຽບໃສ່ແຜນດັດແກ້ປະຕິບັດໄດ້ 118,51%. 
    ສຳລັບການປະຕິບັດລາຍຈ່າຍຖືເອົາການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍເປັນບຸລິມະສິດ, ປະຕິບັດລາຍຈ່າຍລວມໄດ້ທັງໝົດ 372,11 ຕື້ກີບທຽບໃສ່ມະຕິສະພາປະຊາຊົນແຂວງເທົ່າກັບ 99,67% (ແຜນການ 373,33 ຕື້ກີບ) ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 0,33%.
    ສຳລັບທິດທາງແຜນການປີ 2024, ພະແນກການເງິນແຂວງໄດ້ວາງແຜນຄາດຄະເນລາຍຮັບ-ລາຍຈ່າຍ ໂຕເລກຄາດໝາຍສູ້ຊົນລາຍຮັບປີ 2024 ໃຫ້ໄດ້ທັງໝົດ 440,59 ຕື້ກີບທຽບໃສ່ປີຜ່ານມາຫຼຸດລົງ 7,55% ຂອງແຜນດັດແກ້ທ້າຍປີ 2023; ລາຍຮັບພູດດຸ່ນດ່ຽງຈາກສູນກາງ 292,19 ຕື້ກີບທຽບໃສ່ປີຜ່ານມາຫຼຸດລົງ 16,7%ຂອງແຜນດັດແກ້ທ້າຍປີ 2023; ລາຍຮັບທ້ອງຖິ່ນ87,20 ຕື້ກີບທຽບໃສ່ປີຜ່ານມາເພີ່ມຂຶ້ນ 15,05%ຂອງແຜນດັດແກ້ທ້າຍປີ 2023 ແລະ ລາຍຮັບຈາກສູນກາງປະຕິບັດຢູ່ແຂວງ 61,20 ຕື້ກີບທຽບໃສ່ປີຜ່ານມາເພີ່ມຂຶ້ນ 22,4% ຂອງແຜນດັດແກ້ທ້າຍປີ 2023. ດ້ານລາຍຈ່າຍຄາດຄະເນໃນປີ 2024 ລວມ 379,39 ຕື້ກີບທຽບໃສ່ແຜນດັດແກ້ທ້າຍປີຜ່ານມາຫຼຸດລົງ 11,06% ບໍ່ທັນສັງລວມບ້ວງພາກການລົງທຶນ. ສ່ວນຄາດໝາຍລວມຕາມມະຕິ XI ຂອງແຂວງໃນ 2024 ສາມາດສ້າງຄວາມເຂັ້ມແຂງໃຫ້ການເງິນຂັ້ນບ້ານໄດ້ 40 ບ້ານເທົ່າກັບ 100% ຂອງແຜນການປີ; ເຊັນສັນຍາເຊົ່າສໍາປະທານທີ່ດິນໃຫ້ໄດ້ 13ສັນຍາເທົ່າກັບ 100% ຂອງແຜນການປີ.
(ຂ່າວ-ພາບ: ແສງຄຳ ສາລີວັນ)