ປີ 2023 ເຊກອງ ລະດົມທຶນໄດ້ 6,7 ພັນຕື້ກີບ

ທ່ານ ສາກົນ ພອນປະເສີດ ຫົວໜ້າພະແນກແຜນການ ແລະ ການລົງທຶນແຂວງເຊກອງ ລາຍງານຕໍ່ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງເຊກອງ ຊຸດທີ II ໃນວັນທີ 3 ມັງກອນ 2024 ວ່າ: ໃນປີ 2023 ແຂວງເຊກອງ ສາມາດລະດົມແຫລ່ງທຶນໄດ້ທັງໝົດ 6.702,13 ຕື້ກີບ ປະຕິບັດໄດ້ລື່ນແຜນ 8 ເທົ່າຕົວ (ແຜນ 797 ຕື້ກີບ). ໃນນີ້, ການລົງທຶນຂອງລັດ 73,13 ຕື້ກີບ ທຽບໃສ່ແຜນປະຕິບັດໄດ້ 87,51%; ທຶນຊ່ວຍເຫລືອເພື່ອການພັດທະນາ (ODA) ແລະ ກູ້ຢືມ 119 ຕື້ກີບ ປະຕິບັດໄດ້ 100%; ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ 6.510 ຕື້ກີບ ປະຕິບັດໄດ້ລື່ນແຜນ 11 ເທົ່າຕົວ. ອັນພົ້ນເດັ່ນ ແມ່ນໂຄງການພະລັງງານໄຟຟ້າພະລັງລົມ ແລະ ໂຄງການພະລັງງານໄຟຟ້າເຊກອງຈໍາກັດ (ຖ່ານຫີນ).
ທ່ານ ສາກົນ ພອນປະເສີດ ກ່າວຕື່ມວ່າ: ການລົງທຶນຂອງລັດ ສະພາແຫ່ງຊາດໄດ້ອະນຸມັດໃຫ້ແຂວງທັງໝົດ 265 ໂຄງການ ມີມູນຄ່າລວມ 4.019,49 ຕື້ກີບ, ອະນຸມັດໃນປີຈໍານວນ 73,13 ຕື້ກີບ ຊຶ່ງສາມາດຢັ້ງຢືນສະເໜີຂໍເບີກຈ່າຍ ຫາພະແນກການເງິນແຂວງໄດ້ທັງໝົດ 197 ໂຄງການ ມູນຄ່າ 70,60 ຕື້ກີບ. ໃນນີ້, ໂຄງການທີ່ປະຕິບັດສໍາເລັດ 100% (ໂຄງການຊໍາລະໜີ້) ຈໍານວນ 77 ໂຄງການ ມູນຄ່າ 24 ຕື້ກວ່າກີບ; ໂຄງການສືບຕໍ່ 26 ໂຄງການ ມູນຄ່າ 40,74 ຕື້ກີບ ແລະ ໂຄງການສະເໜີໃໝ່ 24 ໂຄງການ ມູນຄ່າ 5,85 ຕື້ກີບ. ໄປຄຽງຄູ່ກັນນີ້ ທາງແຂວງກໍໄດ້ສຸມໃສ່ຊຸກຍູ້ສົ່ງເສີມວຽກການຜະລິດເປັນສິນຄ້າຕາມທ່າແຮງບົ່ມຊ້ອນຂອງແຕ່ລະທ້ອງຖິ່ນ ແລະ ຄວາມຕ້ອງການຂອງຕະຫລາດ ໂດຍເນັ້ນໃສ່ຂະແໜງກະສິກຳ ແລະ ອຸດສາຫະກຳປຸງແຕ່ງ ເພື່ອສົ່ງອອກ ຊຶ່ງໃນແຕ່ລະປີບັນດາຂະແໜງການແມ່ນໄດ້ສ້າງບາດກ້າວອັນໃໝ່, ສ້າງຄວາມເຊື່ອໝັ້ນໃນການດຶງດູດນັກລົງທຶນໃຫ້ເຂົ້າມາລົງທຶນນັບມື້ເພີ່ມຂຶ້ນ.
ແນວໃດກໍຕາມ ທຸກໆໂຄງການທີ່ແຂວງໄດ້ຮັບການອະນຸມັດໃຫ້ມີການລົງທຶນນັ້ນ ແມ່ນລ້ວນແລ້ວແຕ່ສຸມໃສ່ການພັດທະນາພື້ນຖານໂຄງລ່າງ ເພື່ອອໍານວຍຄວາມສະດວກໃຫ້ແກ່ການຄົມມະນາຄົມຂົນສົ່ງສິນຄ້າ, ການຄ້າ, ການລົງທຶນ, ການໄປ-ມາຫາສູ່ຂອງປະຊາຊົນ ແລະ ການບໍລິການດ້ານຕ່າງໆ ແນໃສ່ຍູ້ແຮງພັດທະນາເສດຖະກິດ, ສ້າງອາຊີບ, ສ້າງວຽກເຮັດງານທໍາ ແລະ ພັດທະນາຊີວິດການເປັນຢູ່ຂອງປະຊາຊົນໃຫ້ດີຂຶ້ນ.
ຂ່າວ: ສັນຍາ-ພາບ: ບູ້ສຸວັນ