ທ່ານ ອາດສະພັງທອງ ສີພັນດອນ ເຈົ້າຄອງ ນວ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນ ນວ ຊຸດທີ II ເມື່ອບໍ່ດົນມານີ້ ທີ່ຫ້ອງວ່າການປົກຄອງ ນວ ໂດຍສັງເຂບ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 6 ເດືອນຕົ້ນປີ 2025 ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ບາງດ້ານທີ່ພົ້ນເດັ່ນຈໍານວນໜຶ່ງ ຄື: ຄາດຄະເນວ່າ ໃນປີ 2025 ເສດຖະກິດ ນວ ຈະຂະຫຍາຍຕົວໃນລະດັບ 6.6% (ລື່ນມະຕິສະພາ 0.1%), ໂດຍປັດໄຈຕົ້ນຕໍທີ່ຈະເຮັດໃຫ້ GDP ຂະຫຍາຍຕົວລື່ນແຜນການ ແມ່ນມາຈາກຂະແໜງອຸດສາຫະກໍາຂະຫຍາຍຕົວ 8.1%, ກວມເອົາ 49% ຊຶ່ງອັນພົ້ນເດັ່ນແມ່ນການຂະຫຍາຍຕົວຂອງລວມຍອດການຜະລິດອຸດສາຫະກໍາ ແລະ ລວມຍອດການຜະລິດຫັດຖະກໍາ; ຕໍ່ມາແມ່ນຂະແໜງບໍລິການ ຂະຫຍາຍຕົວເປັນອັນດັບທີສອງ 4%, ກວມເອົາ 38% ອັນພົ້ນເດັ່ນແມ່ນວຽກງານຟື້ນຟູການທ່ອງທ່ຽວຢ່າງເປັນຮູບປະທໍາ, ປັບປຸງໂຄງລ່າງພື້ນຖານສິ່ງອໍານວຍຄວາມສະດວກ ແລະ ການບໍລິການ, ຍົກສູງຄຸນນະພາບຂອງການບໍລິການທ່ອງທ່ຽວໃຫ້ໄດ້ມາດຕະຖານ, ເຮັດໃຫ້ມີນັກທ່ອງທ່ຽວເຂົ້າມາ ນວ ຫຼາຍກວ່າ 1,271,089 ເທື່ອຄົນ, ຄາດຄະເນລາຍຮັບຈາກນັກທ່ອງທ່ຽວ 364.22 ລ້ານໂດລາ ແລະ ຂະແໜງກະສິກໍາ ຂະຫຍາຍຕົວ ໃນລະດັບ 3.9%, ກວມເອົາ 13%. ໃນ 6 ເດືອນຕົ້ນປີ ການລົງທຶນລວມທົ່ວສັງຄົມ ສາມາດປະຕິບັດໄດ້ 85.8%; ໃນນີ້: ການລົງທຶນຂອງລັດ ປະຕິບັດໄດ້ 74.77%; ທຶນຊ່ວຍເຫຼືອທາງການເພື່ອການພັດທະນາປະຕິບັດໄດ້ 89.06% ແລະ ການລົງທຶນພາກເອກະຊົນພາຍໃນ ແລະ ຕ່າງປະເທດ ປະຕິບັດໄດ້ 83.4% ຄາດຄະເນວ່າ ຈະສາມາດບັນລຸໄດ້ຕາມແຜນ.
ຄຽງຄູ່ກັນນັ້ນ ກໍໄດ້ສຸມໃສ່ຈັດຕັ້ງປະຕິບັດ ຫຼາຍມາດຕະການ ແນໃສ່ເຮັດໃຫ້ການຈັດເກັບລາຍຮັບຫັນເປັນທັນສະໄໝ, ຄຸ້ມຄອງລາຍຈ່າຍໃຫ້ມີຄວາມເຂັ້ມງວດ ຮັດກຸມ ສະດວກວ່ອງໄວ ແລະ ໂປ່ງໃສ ໂດຍນໍາໃຊ້ທັງໝົດ 20 ລະບົບ ໃນນີ້ ລະບົບຄຸ້ມຄອງລາຍຮັບ 16 ລະບົບ ແລະ ລະບົບຄຸ້ມຄອງລາຍຈ່າຍ 4 ລະບົບ ຊຶ່ງເຮັດໃຫ້ສາມາດເກັບລາຍຮັບງົບປະມານ ໄດ້ທັງໝົດເທົ່າກັບ 61.29%; ໃນນີ້ ລາຍຮັບສູນກາງປະຕິບັດໄດ້ 61.43%; ລາຍຮັບທ້ອງຖິ່ນ ປະຕິບັດໄດ້ ເທົ່າກັບ 61%. ດ້ານລາຍຈ່າຍ ປະຕິບັດໄດ້ ເທົ່າກັບ 52.86%, ດ້ານການດຸ່ນດ່ຽງ ສາມາດປະຕິບັດໄດ້ ເທົ່າກັບ 100% ຂອງແຜນການ 6 ເດຶອນຕົ້ນປີ ຫຼື ເທົ່າກັບ 48.19% ຂອງແຜນການປີ.
ຄໍາເຫັນ