ປີຜ່ານມາ ຄໍາມ່ວນສາມາດລະດົມທຶນເພື່ອການພັດທະນາໄດ້ 4.559 ຕື້ກວ່າກີບ 

ສະຫາຍ ເດດສັກດາ ມະນີຄໍາ ກໍາມະການພັກແຂວງ ຫົວໜ້າພະແນກແຜນການ ແລະ ການລົງທຶນແຂວງຄໍາມ່ວນໄດ້ກ່າວຕໍ່ກອງປະຊຸມເປີດກວ້າງຄົບຄະນະບໍລິຫານງານພັກແຂວງຄັ້ງທີ 11 ສະໄໝທີ X ທີ່ຈັດຂຶ້ນໃນວັນທີ 3 – 4 ມັງກອນ 2023 ວ່າ:  ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2023 ເຖິງວ່າຈະໄດ້ຮັບຜົນກະທົບຫຼາຍດ້ານທັງພາຍນອກ ແລະ ພາຍໃນກໍຕາມ , ແຕ່ແຂວງຄໍາມ່ວນກໍ່ຍັງມີທ່າແຮງຫຼາຍດ້ານທີ່ເອື້ອອໍານວຍໃຫ້ແກ່ການພັດທະນາເສດຖະກິດ-ສັງຄົມຂອງແຂວງໂດຍສະເພາະທ່າແຮງດ້ານພະລັງງານ-ບໍ່ແຮ່, ດ້ານກະສິກໍາ ແລະ ດ້ານການທ່ອງທ່ຽວເຊິ່ງໄດ້ກາຍເປັນປັດໄຈພື້ນຖານໃນການຍູ້ແຮງເຮັດໃຫ້ເສດຖະກິດຂອງແຂວງຍັງສືບຕໍ່ມີການຂະຫຍາຍຕົວດ້ວຍບາດກ້າວທີ່ດີພໍສົມຄວນ ເຊິ່ງສະແດງອອກໃນປີ 2023 ເສດຖະກິດ ຂະຫຍາຍຕົວໃນລະດັບ 5,88 % ( ມະຕິສະພາ 5,90 % ), ລວມຍອດຜະລິດຕະພັນພາຍໃນ (GDP) ບັນລຸໄດ້ 16.593 ຕື້ກີບ ເທົ່າກັບ 111,43 % ( ມະຕິສະພາ 14.891 ຕື້ກີບ ), ລາຍຮັບສະເລ່ຍຕໍ່ຫົວຄົນເທົ່າກັບ 36,56 ລ້ານກີບ/ຄົນ ເທົ່າກັບ 1.979 ໂດລາ ( ມະຕິສະພາ 1.985 ໂດລາ), ພົນລະເມືອງ 453.765 ຄົນ ເທົ່າກັບ 100,54 % ຂອງແຜນການປີ, ອັດຕາເງິນເຟີ້ສະເລ່ຍຢູ່ໃນລະດັບ 32,44 %, ການລົງທຶນແຫຼ່ງທຶນທົ່ວສັງຄົມກວມເອົາ 27,48%ຂອງ GDP ຫຼື ເທົ່າກັບ 4.559,76 ຕື້ກີບ (ມະຕິສະພາ 3.534,28 ຕື້ກີບ ຫຼື ເທົ່າກັບ 23,73 % ຂອງ GDP ).
ມາຮອດປັດຈຸບັນສາມາດເກັບລາຍຮັບງົບປະມານໄດ້ທັງໝົດ 2.711,29 ຕື້ກີບ ກວມເອົາ 16,34% ຂອງ GDP, ໃນນີ້ລາຍຮັບສູນກາງປະຕິບັດໄດ້ 978,34 ຕື້ກີບ ກວມເອົາ 5,90% ຂອງ GDP, ລາຍຮັບທ້ອງຖິ່ນ 1.732,95 ຕື້ກີບ ກວມເອົາ 10,44% ຂອງ GDP ແລະ ລາຍຈ່າຍປະຕິບັດໄດ້ 719 ,88 ຕື້ກີບ ກວມເອົາ 4,34% ຂອງ GDP. 
ດ້ານການລະດົມທຶນແມ່ນສາມາດລະດົມທຶນເພື່ອການພັດທະນາໄດ້ 4.559,76 ຕື້ກີບ ກວມເອົາ 27,48% ຂອງ GDP ເທົ່າກັບ 129,02% ( ມະຕິສະພາ 3.534,28 ຕື້ກີບ). ໃນນີ້ການລົງທຶນຂອງລັດ 121,57 ຕື້ກີບ ກວມເອົາ 0,73% ຂອງ GDP ເທົ່າກັບ 2,67% ຂອງການລົງທຶນທັງໝົດ ( ຮ່ວງເກີນແຜນ 20 ຕື້ກີບ ); ທຶນຊ່ວຍເຫຼືອເພື່ອການພັດທະນາ (ODA) 168,44 ຕື້ກີບ ກວມເອົາ 1,02% ຂອງ GDP ເທົ່າກັບ 3,69% ຂອງການລົງທຶນທັງໝົດ, ການລົງທຶນເອກະຊົນພາຍໃນ ແລະ ຕ່າງປະເທດ 3.562,65 ຕື້ກີບ ກວມເອົາ 21,47% ຂອງ GDP ເທົ່າກັບ 78,13% ຂອງການລົງທຶນທັງໝົດ, ລະບົບສິນເຊື່ອທະນາຄານ 707,10 ຕື້ກີບ ກວມເອົາ 4,26 % ຂອງ GDP ເທົ່າກັບ 15,51 % ຂອງການລົງທຶນທັງໝົດ . 
ໃນປີ 2023 ຜ່ານມາສາມາດປະຕິບັດໄດ້ 219 ໂຄງການ, ມູນຄ່າ 101,57 ຕື້ກີບເທົ່າກັບ  98,36% ຂອງແຜນການລົງທຶນທັງໝົດທີ່ໄດ້ຮັບອະນຸມັດ   ແລະ ເທົ່າກັບ 74,72% (ມະຕິສະພາ  162,71 % ຕື້ກີບ) ໃນນັ້ນທຶນປົກກະຕິ 20 ຕື້ກີບຂຶ້ນໄປປະຕິບັດໄດ້ 32 ໂຄງການ ມູນຄ່າ 16,03 ຕື້ກີບ; ທຶນປົກກະຕິ 20 ຕື້ກີບລົງມາປະຕິບັດໄດ້ 107 ໂຄງການ ມູນຄ່າ 13,54 ຕື້ກີບ; ທຶນໂຄງການເປົ້າໝາຍສະເພາະປະຕິບັດໄດ້ 3 ໂຄງການ ມູນຄ່າ 17,91 ຕື້ກີບ; ທຶນພັດທະນາຊົນນະບົດ-ລຶບລ້າງຄວາມທຸກຍາກ 20 ຕື້ກີບຂຶ້ນໄປປະຕິບັດໄດ້ 5 ໂຄງການ ມູນຄ່າ 3,14 ຕື້ກີບ ; ທຶນພັດທະນາຊົນນະບົດ-ລຶບລ້າງຄວາມທຸກຍາກ 20 ຕື້ກີບລົງມາປະຕິບັດໄດ້ 7 ໂຄງການ ມູນຄ່າ  0,8 ຕື້ກີບ; ທຶນຈັດສັນພູມລໍາເນົາ 20 ຕື້ກີບຂຶ້ນໄປ ປະຕິບັດໄດ້ 3 ໂຄງການ ມູນຄ່າ 5,57 ຕື້ກີບ; ທຶນຈັດສັນພູມລໍາເນົາ 20 ຕື້ກີບລົງມາ ປະຕິບັດໄດ້ 10 ໂຄງການ ມູນຄ່າ 3,18 ຕື້ກີບ; ທຶນພັດທະນາເມືອງໃໝ່ ປະຕິບັດໄດ້ 18 ໂຄງການ ມູນຄ່າ 9,50 ຕື້ກີບ; ທຶນອື່ນໆ ແລະ ບ້ວງຈົດຮັບ-ຈົດຈ່າຍ (ທົ່ງຮາບ) ປະຕິບັດໄດ້ 12 ໂຄງການ ມູນຄ່າ 18 ຕື້ກີບ;  ທຶນອື່ນໆ ແລະ ບ້ວງຈົດຮັບ-ຈົດຈ່າຍ ( ດ່ານ ) ປະຕິບັດໄດ້ 7 ໂຄງການ ມູນຄ່າ 7,50 ຕື້ກີບ; ທຶນຟື້ນຟູໄພພິບັດ ປະຕິບັດໄດ້ 12 ໂຄງການ ມູນຄ່າ 6,14 ຕື້ກີບ; ທຶນ  ODA ໜ້ອຍກວ່າ 20 ຕື້ກີບ ປະຕິບັດໄດ້ 3 ໂຄງການ ມູນຄ່າ 0,25 ຕື້ກີບ (ທຶນພາຍໃນ 0,25 ຕື້ກີບ).
ຂ່າວ-ພາບ : ແດງສະຫວັດ ແສນພານິດ