ທ່ານ ຊືງຮະຢຸນ ລີ ຫົວໜ້າອົງການໂລຕັດເວິຣ ປະຈຳລາວ, ມີຮອງເຈົ້າເມືອງໂພນໂຮງ, ຮອງເຈົ້າເມືອງຫີນເຫີບ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຮອງເຈົ້າແຂວງ ກ່າວວ່າ: ໂດຍໄດ້ຮັບການສະໜັບສະໜູນດ້ານງົບປະມານຈາກອົງການໂລຕັສເວີຣ ແຫ່ງ ສ.ເກົາຫຼີ ເປັນມູນຄ່າ 835,000 ກວ່າໂດລາ ຫຼື ປະມານ 16 ຕື້ກວ່າກີບ, ຊຶ່ງໄດ້ຈັດຕັ້ງປະຕິບັດແຕ່ປີ 2022 ຮອດທ້າຍປີ 2024 ຈຶ່ງສໍາເລັດ ໂດຍມີການຈັດຕັ້ງປະຕິບັດຢູ່ 2 ເມືອງຄື: ເມືອງໂພນໂຮງມີ 5 ບ້ານ ໄດ້ແກ່: ບ້ານແອກຊ້າງ, ດົງຂາວ, ສີວິໄລ, ໂພນຄ້ອງ ແລະ ນາເທບ, ເມືອງຫີນເຫີບມີ 2 ບ້ານ ໄດ້ແກ່: ບ້ານໜອງຫຼວງ ແລະ ນາອັນ ຊຶ່ງກິດຈະກຳຕົ້ນຕໍຂອງໂຄງການ ແມ່ນເລັ່ງໃສ່ສົ່ງເສີມ ການສ້າງກຸ່ມປູກເຫັດ ແລະ ກຸ່ມປູກຫຍ້າລ້ຽງງົວ. ນອກນີ້, ຍັງມີກິດຈະການກ່ຽວກັບການກໍ່ສ້າງພື້ນຖານໂຄງລ່າງທີ່ຈຳເປັນສຳລັບການຜະລິດກະສິກຳອີກຈຳນວນໜຶ່ງ.
ທ່ານ ຄຳຮຸ່ງ ພອນພະເສີດ ຜູ້ບໍລິຫານໂຄງການໄດ້ກ່າວວ່າ: ໂຄງການນີ້, ມີປະຊາຊົນໄດ້ຮັບຜົນປະໂຫຍດ 130 ກວ່າຄອບຄົວ ເດັ່ນແມ່ນການສ້າງກຸ່ມປູກເຫັດຢູ່ບັນດາບ້ານຂອງເມືອງໂພນໂຮງ ແລະ ການສ້າງກຸ່ມປູກຫຍ້າລ້ຽງງົວ ຢູ່ບັນດາບ້ານຂອງເມືອງຫີນເຫີບ, ຊຶ່ງໃນໄລຍະຜ່ານມາ ໂຄງການໄດ້ສົມທົບກັບພາກສ່ວນກ່ຽວຂ້ອງຂອງແຂວງເປັນຕົ້ນແມ່ນພະແນກກະສິກຳ ແລະ ປ່າໄມ້ແຂວງວຽງຈັນ ແລະ ພາກສ່ວນກ່ຽວຂ້ອງໃນການຈັດຝຶກອົບຮົມກ່ຽວກັບການປູກເຫັດ ແລະ ການປູກຫຍ້າລ້ຽງງົວ, ພ້ອມນີ້ຍັງໄດ້ມີການສະໜອງວັດຖຸອຸປະກອນຮັບໃຊ້ຕ່າງໆໃນການປູກເຫັດໃຫ້ປະຊາຊົນ, ປຸກເຮືອນປູກເຫັດ, ສະ ໜອງແນວພັນງົວ ຈຳນວນ 50 ກວ່າໂຕ, ປຸກຄອກງົວ, ຊິງຊັ່ງນໍ້າໜັກງົວ ໃຫ້ແກ່ຊາວກະສິກອນ.
ທ່ານກ່າວຕໍ່ອີກວ່າ: ນອກຈາກນັ້ນຍັງໄດ້ປຸກສ້າງອາຄານຕະຫຼາດຊຶ່ງເປັນຈຸດຂາຍເຄື່ອງກະສິກຳ,ເຈາະນໍ້າສ້າງບາດານ, ສ້ອມແປງຊົນລະປະທານ ແລະ ທາງຊອຍເຂົ້າບ້ານໃຫ້ແກ່ປະຊາຊົນຕື່ມອີກ. ຜ່ານການຈັດຕັ້ງປະຕິບັດໂຄງການໃນໄລຍະ 3 ປີຜ່ານມາ ໄດ້ເຮັດໃຫ້ປະຊາຊົນຜູ້ເຂົ້າຮ່ວມໂຄງການມີຊີວິດການເປັນຢູ່ດີຂຶ້ນ ໂດຍຜ່ານການສະໜັບສະໜູນຈາກໂຄງການ ເຊິ່ງມີລາຍຮັບຈາກການປູກເຫັດຂາຍ ແລະ ມີລາຍຮັບຈາກການຂາຍງົວ.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ