ປິດກອງປະຊຸມ ຄະນະກຳມະການປົກຄອງ ແຂວງໄຊສົມບູນ ເປີດກວ້າງ ຄັ້ງ​ທີ 1

ກອງປະຊຸມຄັ້ງນີ້ ໄດ້ພ້ອມກັນສຸມສະຕິປັນຍາຂອງຕົນ ເຂົ້າໃນການຄົ້ນຄວ້າປະກອບຄໍາຄິດຄໍາເຫັນໃສ່ແຕ່ລະບັນຫາ ຢ່າງເປັນເຈົ້າການ, ກົງໄປກົງມາ ແລະ ພາວະວິໄສຮອບດ້ານ ໂດຍມີຄວາມເປັນເອກະພາບສູງ ຕໍ່ການຕີລາຄາເຖິງຜົນສໍາເລັດການຈັດຕັ້ງປະຕິບັດວຽກງານຮອບດ້ານ ຂອງຄະນະກໍາມະການປົກຄອງແຂວງ ພ້ອມທັງປຶກສາຫາລື ແລະ ວາງທິດທາງແຜນການຈຸດສຸມທີ່ຈະຕ້ອງໄດ້ສືບຕໍ່ຈັດຕັ້ງປະຕິບັດໃນຕໍ່ໜ້າ ເພື່ອຊຸກຍູ້ການພັດທະນາເສດຖະກິດ-ສັງຄົມ ຂອງແຂວງ ໃຫ້ມີຄວາມເຂັ້ມແຂງ; ຜ່ານການຮັບຟັງການລາຍງານ ແລະ ປະກອບຄໍາຄິດເຫັນ ຂອງແຕ່ລະຂະແໜງການທີ່ກ່ຽວຂ້ອງ ເຫັນວ່າສາມາດຍາດໄດ້ຜົນສໍາເລັດຫຼາຍດ້ານ ເຖິງແມ່ນວ່າການຈັດຕັ້ງປະຕິບັດໜ້າທີ່ວຽກງານດັ່ງກ່າວຈະຢູ່ໃນທ່າມກາງຄວາມຫຍຸ້ງຍາກທ້າທາຍຫຼາຍຢ່າງເປັນຕົ້ນ ບັນຫາການເໜັງຕິງຂອງລາຄາສິນຄ້າອຸປະໂພກ-ບໍລິໂພກ, ລາຄານໍ້າມັນເຊື້ອໄຟສູງ, ໄພພິບັດທໍາມະຊາດ ແລະ ອື່ນໆ ທີ່ກະທົບຕໍ່ປະເທດເຮົາ ກໍຄືແຂວງໄຊສົມບູນ ແຕ່ເຖິງຢ່າງໃດກໍຕາມ ດ້ວຍຄວາມສູ້ຊົນ, ບຸກບືນ ແລະ ເອົາໃຈໃສ່ນໍາພາ-ຊີ້ນໍາຢ່າງແຂງແຮງຂອງຄະນະພັກ, ຄະນະກໍາມະການປົກຄອງແຂວງ ແລະ ທຸກພາກສ່ວນທີ່ກ່ຽວຂ້ອງ ເຮັດໃຫ້ແຂວງໄຊສົມບູນ ສາມາດຍາດໄດ້ຜົນສໍາເລັດຫຼາຍດ້ານ ແລະ ຫຼາຍຂົງເຂດວຽກງານສາມາດລື່ນຄາດໝາຍທີ່ວາງໄວ້.

ທ່ານ ພົຈວ ບົວພັນ ອິນທະປັນຍາ ໄດ້ເນັ້ນໜັກໃຫ້ ຜູ້ເຂົ້າຮ່ວມສືບຕໍ່ເພີ່ມທະວີວຽກງານສຶກສາອົບຮົມການເມືອງນໍາພາ-ແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ຢ່າງທົ່ວເຖິງ, ເລິກເຊິ່ງ ດ້ວຍຫຼາຍວິທີ, ສຸມໃສ່ແກ້ໄຂປະກົດການຫຍໍ້ທໍ້ຕ່າງໆ ເພື່ອສືບຕໍ່ຮັບປະກັນສະຖຽນລະພາບທາງດ້ານການເມືອງໃຫ້ໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ໂດຍສຸມໃສ່ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ເຂດຫ່າງໄກສອກຫຼີກ ໃຫ້ເຂັ້ມແຂງ, ຜັນຂະຫຍາຍຈັດຕັ້ງປະຕິບັດ ມະຕິວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່, ເອົາໃຈໃສ່ສູ້ຊົນເກັບລາຍຮັບເຂົ້າງົບປະມານ ໂດຍການສຸມໃສ່ຊຸກຍູ້ສົ່ງເສີມໃຫ້ມີຫົວໜ່ວຍລາຍຮັບໃໝ່ເພີ່ມຂຶ້ນ, ສືບຕໍ່ຊຸກຍູ້ ແລະ ສົ່ງເສີມການຜະລິດພາຍໃນແຂວງ ເພື່ອທົດແທນການນໍາເຂົ້າ ບົນພື້ນຖານການຜະລິດທີ່ມີທ່າແຮງ ໂດຍສະເພາະແມ່ນສະບຽງອາຫານ, ສິນຄ້າກະສິກໍາ, ອຸດສາຫະກໍາ ທີ່ມີມູນຄ່າເພີ່ມສູງຂຶ້ນ, ສຸມໃສ່ການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ແລະ ການຄຸ້ມຄອງລາຄາສິນຄ້າ ທີ່ຮັບໃຊ້ຊີວິດປະຈໍາວັນ ໃຫ້ມີຄວາມສອດຄ່ອງກັບສະພາບເສດຖະກິດຕົວຈິງ ພ້ອມກັນນີ້ ກໍໃຫ້ນໍາເອົາແຜນວຽກຈຸດສຸມ 6 ເດືອນ ທ້າຍປີ ໄປປັບປຸງເຂົ້າໃນແຜນວຽກຂອງຂະແໜງການຕົນ ພ້ອມທັງຈັດຕັ້ງປະຕິບັດໃຫ້ໄດ້ຮັບຜົນດີ ແລະ ສຳເລັດຕາມແຜນການທີ່ວາງໄວ້.

ຂ່າວ: ໄຊສົມບູນ