ວິທະຍຸກະຈາຍສຽງຫວຽດນາມລາຍງານວ່າ: ພາຍຫຼັງເຮັດວຽກມາເປັນເວລາ 7 ວັນ (2-8 ຕຸລາ), ໃນວັນທີ 8 ຕຸລາ ຜ່ານມາ ທີ່ສຳນັກງານສູນກາງພັກ, ກອງປະຊຸມ ຄັ້ງທີ 8 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ XIII ໄດ້ປິດກອງປະຊຸມ ໂດຍພາຍໃຕ້ການເປັນປະທານຂອງ ທ່ານ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ.
ຂ່າວລະບຸວ່າ: ທ່ານ ຫງວຽນຝູຈ້ອງ ກ່າວຄຳເຫັນປິດກອງປະຊຸມວ່າ: ກອງປະຊຸມເຫັນດີຢ່າງສູງ, ເຖິງວ່າສະພາບການໂລກ ແລະ ພາຍໃນປະເທດປະສົບກັບຄວາມຫຍຸ້ງຍາກ, ສິ່ງທ້າທາຍຜິດປົກກະຕິ, ສັບສົນຫຼາຍເມື່ອທຽບໃສ່ການຄາດຄະເນ, ຫວຽດນາມ ໄດ້ບັນລຸຫຼາຍໝາກຜົນສຳຄັນໃນຫຼາຍຂົງເຂດ. ບົນພື້ນຖານນັ້ນ, ທ່ານ ຫງວຽນຝູຈ້ອງ ເນັ້ນໜັກ ບັນດາວຽກງານຕ້ອງຜັນຂະຫຍາຍໃນຊຸມເດືອນຍັງເຫຼືອຂອງປີນີ້ ແລະ ປີ 2024 ວ່າ: ຄວນສືບຕໍ່ຜັນຂະຫຍາຍຢ່າງຂ້ຽວຂາດ, ມີປະສິດທິຜົນ ບັນດາແຜນນະໂຍບາຍ, ນະໂຍບາຍ ແລະ ເປົ້າໝາຍ, ໂດຍສູນກາງປຶກສາຫາລືຢ່າງລະອຽດ ແລະ ເປັນເອກະພາບວາງອອກໃນບົດສະຫຼຸບຂອງກອງປະຊຸມຄັ້ງນີ້. ສຸມໃສ່ບຸລິມະສິດຊຸກຍູ້, ຍົກສູງຄຸນນະພາບການເຕີບໂຕ, ສ້າງວຽກເຮັດງານທຳ, ເພີ່ມລາຍຮັບໃຫ້ແກ່ຊາວຜູ້ອອກແຮງງານ ບົນພື້ນຖານຮັກສາເສດຖະກິດມະຫາພາກໃຫ້ເປັນປົກກະຕິ, ຮັບປະກັນຄວາມດຸ່ນດ່ຽງໃຫຍ່ຂອງພື້ນຖານເສດຖະກິດ, ຮັບປະກັນຊີວິດສັງຄົມ. ສືບຕໍ່ຕິດຕາມສະພາບການສາກົນ ແລະ ພາຍໃນປະເທດຢ່າງໃກ້ຊິດ ເພື່ອມີບັນດານະໂຍບາຍທີ່ເໝາະສົມ, ມີປະສິດທິຜົນ, ສູ້ຊົນບັນລຸບັນດາເປົ້າໝາຍ, ຄາດໝາຍຕົ້ນຕໍໃນລະດັບສູງສຸດຂອງປີ 2023 ແລະ ທັງອາຍຸການຊຸດທີ XIII.
ທ່ານ ຫງວຽນຝູຈ້ອງ ຍັງໃຫ້ຮູ້ວ່າ: ຄະນະບໍລິຫານງານສູນກາງພັກ ໄດ້ເຫັນດີເປັນເອກະພາບປະກາດໃຊ້ມະຕິກ່ຽວກັບການສືບຕໍ່ປ່ຽນແປງໃໝ່, ຍົກສູງຄຸນນະພາບນະໂຍບາຍສັງຄົມ ດ້ວຍຫຼາຍເນື້ອໃນໄດ້ສືບທອດ, ປ່ຽນແປງໃໝ່, ເພີ່ມເຕີມ, ພັດທະນາ ເມື່ອທຽບໃສ່ມະຕິສູນກາງພັກຄັ້ງທີ 5 ຊຸດທີ XI (ປີ 2012).
ທ່ານ ຫງວຽນຝູຈ້ອງ ໄດ້ຮຽກຮ້ອງວ່າ: ພາຍຫຼັງກອງປະຊຸມຄັ້ງນີ້, ກົມການເມືອງສູນກາງພັກ ຈະພິຈາລະນາແຜນສັບຊ້ອນບຸກຄະລາກອນຂອງຄະນະບໍລິຫານງານສູນກາງພັກ ອາຍຸການ 2026 – 2031, ໃຊ້ເປັນພື້ນຖານເພື່ອບຳລຸງສ້າງ, ຝຶກອົບຮົມ ແລະ ຕິດຕາມ, ກວດກາເປັນປະຈຳສຳລັບບັນດາພະນັກງານ ທີ່ຖືກນຳເຂົ້າແຜນສັບຊ້ອນ; ຄົ້ນພົບຢ່າງທັນການ, ແນະນຳເພີ່ມເຕີມໃນແຜນສັບຊ້ອນເພື່ອລາຍງານກົມການເມືອງ ຍື່ນສະເໜີຕໍ່ສູນກາງພັກພິຈາລະນາ ໃນກອງປະຊຸມຄັ້ງຕໍ່ໆໄປ.
ຄໍາເຫັນ