 |
ງານແຂ່ງຂັນ Lao Digital Awards 2026 ໄດ້ຈັດຂຶ້ນພາຍໃຕ້ຄຳຂວັນ: “ຮ່ວມສ້າງສັນນະວັດຕະກໍາທີ່ກ້າວໜ້າ ເພື່ອສົ່ງເສີມການຫັນເປັນດີຈີຕອນ ຂອງ ສປປ ລາວ ໃຫ້ເຂັ້ມແຂງ ແລະ ຍືນຍົງ”, ຊຶ່ງໄດ້ໃຊ້ເວລາໃນການແຂ່ງຂັນ ແລະ ນໍາສະເໜີຜົນງານທັງໝົດ 3 ວັນ. ເວທີນີ້ບໍ່ພຽງແຕ່ເປັນການຊອກຫາຜູ້ຊະນະເລີດ ຫຼື ມອບລາງວັນເທົ່ານັ້ນ, ແຕ່ຍັງເປັນການຄົ້ນຫານະວັດຕະກຳທີ່ສາມາດນຳໄປໃຊ້ໄດ້ຈິງ, ພ້ອມທັງສົ່ງເສີມນັກພັດທະນາ ແລະ ຄົນຮຸ່ນໃໝ່ທີ່ຈະກາຍເປັນກຳລັງສຳຄັນໃນການຂັບເຄື່ອນເສດຖະກິດ ແລະ ສັງຄົມດີຈີຕອນຂອງປະເທດ.
ໃນໂອກາດກ່າວປິດງານ, ທ່ານ ສັນຕິສຸກ ສິມມາລາວົງ ໄດ້ສະແດງຄວາມຊົມເຊີຍ ແລະ ຂອບໃຈຢ່າງຈິງໃຈຕໍ່ຄະນະກຳມະການ, ຄະນະຈັດງານ, ຜູ້ສະໜັບສະໜູນ ແລະ ຜູ້ເຂົ້າແຂ່ງຂັນທຸກພາກສ່ວນ. ທ່ານໄດ້ເນັ້ນຢ້ຳວ່າ: ການຫັນເປັນດີຈີຕອນຂອງ ສປປ ລາວ ບໍ່ສາມາດສຳເລັດໄດ້ໂດຍພາກລັດພຽງຝ່າຍດຽວ, ແຕ່ຕ້ອງອາໄສຄວາມຮ່ວມມືຈາກທຸກພາກສ່ວນ ທັງພາກລັດທີ່ຕ້ອງສ້າງສະພາບແວດລ້ອມທີ່ເອື້ອອຳນວຍ, ພາກເອກະຊົນທີ່ກ້າລົງທຶນ, ສະຖາບັນການສຶກສາທີ່ຮ່ວມສ້າງຄົນ ແລະ ຊາວໜຸ່ມ-ເຍົາວະຊົນທີ່ກ້າຄິດ ກ້າລົງມືເຮັດ ເພື່ອຮ່ວມກັນສ້າງລະບົບນິເວດດີຈີຕອນຂອງລາວໃຫ້ເຂັ້ມແຂງ.
 |
ທ່ານ ສັນຕິສຸກ ສິມມາລາວົງ ຍັງໄດ້ຝາກຂໍ້ຄິດເຖິງຜູ້ທີ່ໄດ້ຮັບລາງວັນໃຫ້ຖືວ່າລາງວັນນີ້ແມ່ນຈຸດເລີ່ມຕົ້ນຂອງຄວາມຮັບຜິດຊອບໃນການຕໍ່ຍອດຜົນງານ ແລະ ໃຫ້ກຳລັງໃຈຜູ້ທີ່ຍັງບໍ່ທັນໄດ້ຮັບລາງວັນ ໃຫ້ນຳເອົາບົດຮຽນ ແລະ ປະສົບການໄປພັດທະນາຕົນເອງຕໍ່ໄປ. ພິທີປິດງານໄດ້ສິ້ນສຸດລົງດ້ວຍບັນຍາ ກາດອັນອົບອຸ່ນ ແລະ ຄວາມຫວັງໃນການສ້າງອະນາຄົດດີຈີຕອນຂອງ ສປປ ລາວ ໃຫ້ກ້າວໄກຢ່າງຍືນຍົງ.
ຜົນຂອງການແຂ່ງຂັນ ມີຄື: I ໝວດບໍລິການພາກລັດ (Public Sector) ອັນດັບທີ 1 ຄະນະຈັດຕັ້ງສູນກາງພັກ ລະບົບສູນປະຕູດຽວແບບທັນສະໄຫມ (Smart ODSC), II ໝວດພາກເອກະຊົນ (Private Sector) ອັນດັບທີ 1 ບໍລິສັດ ລາລິເຈັນ ຈໍາກັດຜູ້ດຽວ (Laligence Sole Co., Ltd.) Catbot, III ໝວດທຸລະກິດດີຈີຕອນເລີ່ມຕົ້ນ (Digital Startup) ອັນດັບທີ 1 ບໍລິສັດ ລາວເວ ຈໍາກັດ Laosway, IV ໝວດນະວັດຕະກໍາດີຈີຕອນ (Digital Innovation) ອັນດັບທີ 1 ບໍລິສັດ ສະຕາ ຟິນເທັກ ຈໍາກັດຜູ້ດຽວ (STAR FINTECH SOLE.,LTD) Umoney, V ໝວດການສ້າງຄວາມມີສ່ວນຮ່ວມທາງດີຈີຕອນ (Digital Inclusivity) ອັນດັບ 1 ບໍລິສັດ MBX Robotics MBX Robotics ແລະ VI ໝວດທຸລະກິດດີຈີຕອນເລີ່ມຕົ້ນ (Digital Startup) ສໍາລັບ ບຸກຄົນ ອັນດັບ 1 ຈິລະຢຸດ ນິດວົງໄຂ LoungSy.AI.
(ຂ່າວ: ແສງຈັນ)
ຄໍາເຫັນ