 |
ໃນພິທີດັ່ງກ່າວ, ທ່ານ ວັດຖຸນິຍົມ ດວງມາລາ ຫົວໜ້າສະຖາບັນການຕ່າງປະເທດ ໄດ້ສະຫຼຸບລາຍງານຜົນການຈັດຕັ້ງການບໍາລຸງພາສາອັງກິດ ຊຸດທີ 47 ຊຶ່ງໄດ້ດໍາເນີນມາເປັນເວລາ 20 ອາທິດ(ເລີ່ມແຕ່ວັນທີ 2 ມີນາ-31 ກໍລະກົດ 2026) ໂດຍມີຜູ້ເຂົ້າຮ່ວມທັງໝົດ 51 ທ່ານ (ຍິງ 24 ທ່ານ) ທີ່ມາຈາກກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະ ບັນດາກະຊວງອ້ອມຂ້າງສູນກາງ. ພາຍໃຕ້ການນໍາພາຂອງຄະນະນຳກະຊວງການຕ່າງປະເທດ ບວກກັບຄວາມເອົາໃຈໃສ່ຂອງຄະນະຮັບຜິດຊອບ-ຄູອາຈານ ກໍຄື ຄວາມຮັບຜິດຊອບຂອງຜູ້ເຂົ້າຮັບການບໍາລຸງ, ຈຶ່ງເຮັດໃຫ້ຊຸດບໍາລຸງດັ່ງກ່າວ ສາມາດບັນລຸຜົນສໍາເລັດໄດ້ຕາມລະດັບຄາດໝາຍທີ່ໄດ້ວາງໄວ້ ຊຶ່ງສະແດງອອກຜ່ານຕົວຊີີ້ວັດຕ່າງໆ ເປັນຕົນແມ່ນຜູ້ເຂົ້າຮ່ວມສາມາດຍົກລະດັບພາສາອັງກິດໃນຫຼາຍທັກສະເຊັ່ນ: ການສົນທະນາ, ການນຳສະເໜີບົດ, ການຂຽນບົດຄວາມ, ການຮ່າງເອກະສານ ແລະ ການຟັງໄດ້ດີຂຶ້ນຖ້າທຽບໃສ່ໄລຍະເລີ່ມຕົ້ນຮຽນໃໝ່ ຊຶ່ງສາມາດນຳໃຊ້ເຂົ້າໃນການປະຕິບັດໜ້າວຽກງານໃນຂົງເຂດຄວາມຮັບຜິດຊອບ ຂອງຕົນເປັນຕົ້ນແມ່ນການເຂົ້າຮ່ວມກອງປະຊຸມສໍາມະນາໃນເວທີພາກພື້ນ ແລະ ສາກົນ ລວມທັງການເຂົ້າຮ່ວມພົບປະ ກໍຄືການຕິດຕໍ່ພົວພັນວຽກງານທາງການກັບຕ່າງປະເທດ. ນອກຈາກນັ້ນ, ໃນໄລຍະທ້າຍຂອງການດຳເນີນຫຼັກສູດ, ຄະນະຮັບຜິດຊອບ ຍັງໄດ້ຈັດຕາຕະລາງ ໃຫ້ຜູ້ເຂົ້າຮັບການບໍາລຸງໄດ້ຮັບຟັງການບັນຍາຍເພີ່ມເຕີມກ່ຽວກັບ ນະໂຍບາຍການຕ່າງປະເທດ, ສະພາບການພົ້ນເດັ່ນພາກພື້ນ ແລະ ສາກົນ ແລະ ຄວາມຮູ້ພື້ນຖານກ່ຽວກັບວຽກງານພິທີການທູດ ຊຶ່ງເປັນຫົວຂໍ້ທີ່ສຳຄັນ ແລະ ຕິດພັນກັບວຽກງານຂອງທຸກຂະແໜງການໂດຍສະເພາະແມ່ນການຈັດກອງປະຊຸມສາກົນ, ການຕ້ອນຮັບແຂກຕ່າງ ປະເທດເພື່ອເປັນບົດຮຽນໃຫ້ແກ່ຜູ້ເຂົ້າຮຽນນໍາໄປໝູນໃຊ້ໃນວຽກງານຕົວຈິງຢູ່ກົມກອງຂອງຕົນເອງ. ໃນໂອກາດນີ້, ບັນດາຜູ້ເຂົ້າຮັບການບໍາຊຸດພາສາອັງກິດ ຊຸດ 47 ໄດ້ສະແດງຄວາມຮູ້ສຶກຂອງຕົນຕໍ່ຊຸດຮຽນນີ້ ວ່າ: "ພາສາອັງກິດຂອງຂ້າພະເຈົ້າໄດ້ຮັບການພັດທະນາຂຶ້ນຫຼາຍ ໂດຍສະເພາະດ້ານການເວົ້າ ແລະ ການຟັງ. ຂ້ອຍຮູ້ສຶກມີຄວາມໝັ້ນໃຈຫຼາຍຂຶ້ນເມື່ອສົນທະນາກັບເພື່ອນຮ່ວມງານ ແລະ ຄົນຕ່າງປະເທດ. ນອກຈາກນັ້ນ, ຂ້າພະເຈົ້າຍັງໄດ້ຮຽນຮູ້ຄໍາສັບທາງການທີ່ສໍາຄັນ ທີ່ມັກນໍາໃຊ້ເຂົ້າໃນວຽກງານທາງການສໍາລັບພາກລັດ ແລະ ຄໍາສັບກ່ຽວກັບການບໍລິຫານຕ່າງໆ. ທັກສະການຂຽນຂອງຂ້າພະເຈົ້າ ໂດຍສະ ເພາະການຂຽນຈົດໝາຍ ແລະ ອີເມວທາງການ ກໍໄດ້ມີການພັດທະນາ ແລະ ເປັນທາງການຫຼາຍຂຶ້ນ. ການເວົ້າຂອງຂ້າພະເຈົ້າແມ່ນມີຄວາມຄ່ອງແຄ້ວຫຼາຍຂຶ້ນ ແລະ ມີຄວາມໝັ້ນໃຈໃນການຂຽນເອກະສານທາງການທີ່ກ່ຽວຂ້ອງກັບວຽກງານ ແລະ ໜ້າທີ່ຮັບຜິດຊອບ”. ພ້ອມດຽວກັນນີ້, ກໍໄດ້ມີການມອບໃບຍ້ອງຍໍໃຫ້ຜູ້ເຂົ້າຮ່ວມບໍາລຸງທີ່ດີເດັ່ນປະຈໍາຊຸດຮຽນຈໍານວນ 5 ທ່ານ (ຍິງ 2 ທ່ານ).
 |
ນອກຈາກການຮຽນ-ການສອນ ພາຍໃນຫ້ອງຮຽນແລ້ວ, ຊຸດບໍາລຸງດັ່ງກ່າວ ຍັງໄດ້ສ້າງກິດຈະກໍາເຄື່ອນໄຫວນອກຫຼັກສູດ ເປັນຕົ້ນໄດ້ໄປທັດສະນະສຶກສາ ທີ່ສູນຟື້ນຟູໜ້າທີ່ການ (ສູນຂໍ້ມູນ-ຂ່າວສານຄົນພິການ (COPEVisitor Center) ແລະ ເຂື່ອນໄຟຟ້ານ້ຳງື່ມ I ທີ່ ເມືອງແກ້ວອຸດົມ ແຂວງວຽງຈັນ ລວມທັງໄດ້ຈັດກິດຈະກຳນອກຫຼັກສູດ ເປັນຕົ້ນການແຂ່ງຂັນກິລາຕ່າງໆເພື່ອປະກອບສ່ວນເຂົ້າໃນການສ້າງຂະບວນການຂໍ່ານັບຮັບຕ້ອນວັນສໍາຄັນຕ່າງໆຂອງຊາດ ແລະ ເພື່ອເປັນການສ້າງຄວາມຮັກແພງ, ຮັດແໜ້ນຄວາມສາມັກຄີລະຫວ່າງຄູ-ອາຈານ, ພະນັກງານສະຖາບັນການຕ່າງປະເທດ ແລະ ຜູ້ເຂົ້າຮ່ວມຊຸດບໍາລຸງດັ່ງກ່າວ ທີ່ມາຈາກພາກສ່ວນອື່ນໆໃຫ້ມີບັນຍາກາດຟົດຟື້ນ ແລະ ແໜ້ນແຟ້ນຂຶ້ນ.
ໃນຕອນທ້າຍພິທີ, ທ່ານ ໄມທອງ ທຳມະວົງສາ ປະທານພິທີໄດ້ໃຫ້ກຽດມອບໃບຢັ້ງຢືນໃຫ້ແກ່ຜູ້ເຂົ້າຮ່ວມຊຸດຝຶກອົບຮົມດັ່ງກ່າວ. ພ້ອມທັງໄດ້ໂອ້ລົມໃຫ້ທິດຊີ້ນໍາຕໍ່ພະນັກງານທີ່ສໍາເລັດການບໍາລຸງພາສາອັງກິດໃນຄັ້ງນີ້ ໂດຍໄດ້ເນັ້ນເຖິງຄວາມສຳຄັນ ແລະ ຄວາມຈຳເປັນຕໍ່ກັບການຍົກລະດັບພາສາອັງກິດ ເພື່ອເປັນເຄື່ອງມືໃນການເສີມຂະຫຍາຍການພົວພັນຮ່ວມມືກັບສາກົນ.
 |
(ຂ່າວ: ສຳນານ)
ຄໍາເຫັນ