ພະແນກອຸດສາຫະກໍາ ແລະ ການຄ້າແຂວງຫຼວງນໍ້າທາໄດ້ຈັດພິທີປິດຊຸດຝຶກອົບຮົມ ການວາງແຜນທຸລະກິດ ແລະ ການບັນຊີສໍາລັບຈຸນລະວິສາຫະກິດຢູ່ເມືອງລອງ ແຂວງຫຼວງນ້ຳທາເມື່ອບໍ່ດົນມານີ້ ໂດຍການເຂົ້າຮ່ວມຂອງທ່ານຄໍາແກ້ວ ຈັນທະວົງ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງຫຼວງນໍ້າທາ, ມີຕາງໜ້າຈາກຫ້ອງການອຸດສາຫະກໍາ ແລະ ການຄ້າເມືອງ ແລະ ຫ້ອງການການເງິນເມືອງ, ສຳມະນາກອນເຂົ້າຮ່ວມ.
ຊຸດຝຶກອົບຮົມໃນຄັ້ງນີ້ສໍາມະນາກອນໄດ້ຮຽນຮູ້ກ່ຽວກັບ ຫົວຂໍ້ ພາກການວາງແຜນທຸລະກິດ,ແຜນການຕະຫຼາດ, ແຜນດໍາເນີນທຸລະກິດ ແລະ ແຜນການຄຸ້ມຄອງບໍລິຫານ, ສໍາລັບພາກການບັນຊີວິສາຫະກິດປະກອບມີ: ພາກທິດສະດີ ແລະ ພາກປະຕິບັດຕົວຈິງ ກ່ຽວກັບຫຼັກການບັນຊີສໍາລັບຈຸນລະວິສາຫະກິດ, ການບັນທຶກ, ເອກະສານປະກອບບັນຊີ, ການຈັດປະເພດວິສາຫະກິດ, ລະຫັດກຸ່ມບັນຊີ ແລະ ການສະຫຼຸບບັນຊີ, ປຶ້ມຕິດຕາມບັນຊີເງິນສົດ ແລະ ເງິນຝາກປະຈໍາວັນ, ປຶ້ມຕິດຕາມຊັບສົມບັດຄົງທີ່, ປຶ້ມຕິດຕາມເຄື່ອງໃນສາງ, ປຶ້ມຕິດຕາມໜີ້ຕ້ອງຮັບ ແລະ ໜີ້ຕ້ອງສົ່ງ, ປຶ້ມບັນຊີປະຈໍາວັນຄັງເງິນສົດລວມຫົວດຽວ ແລະ ເອກະສານລາຍງານການເງິນປະຈໍາເດືອນ, ປະຈໍາປີຕຶ່ມອີກ.
ທັງນີ້, ກໍເພື່ອແນໃສ່ສ້າງຄວາມເຂັ້ມແຂງໃຫ້ຫົວໜ່ວຍຈຸນລະວິສາຫະກິດຮັບຮູ້ ແລະ ເຂົ້າໃຈໃນການວາງແຜນທຸລະກິດ ແລະ ການບັນຊີ ສໍາລັບຈຸນລະວິສາຫະກິດ, ເພື່ອສ້າງເງື່ອນໄຂໃນການວາງແຜນທຸລະກິດ ແລະ ການຖືບັນຊີ ໃຫ້ເຂົ້າສູ່ລະບຽບການເທື່ອລະກ້າວ, ທັງເປັນການສ້າງເງື່ອນໄຂໃນການເຂົ້າຫາແຫຼ່ງທຶນ ແລະ ຍົກລະດັບການດໍາເນີນທຸລະກິດແບບຄອບຄົວໃຫ້ມີປະສິດທິພາບ ແລະ ປະສິດທິຜົນເພື່ອກ້າວໄປສູ່ທຸລະກິດຂະໜາດນ້ອຍແລະກາງຕາມລຳດັັບ, ຮັບປະກັນທາງດ້ານການສົ່ງເສີມຫົວໜ່ວຍທຸລະກິດໃຫ້ມີຄຸນນະພາບ ແລະ ມີການຂະຫຍາຍຕົວຢ່າງຕໍ່ເນືື່ອງ.
ຊຸດຝຶກອົບຮົມຄັ້ງນີ້ໄດ້ຮັບການສະໜັບສະໜູນຈາກ ກອງທຶນສົ່ງເສີມຈຸນລະວິສາຫະກິດ,
ວິສາຫະກິດຂະໜາດນ້ອຍ ແລະ ກາງ, ສໍານັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ກະຊວງ ອຸດສາຫະກຳ ແລະ ການຄ້າ.
ຂ່າວ-ພາບ: ສົມພອນ ຂຸນດາວົງ
ຄໍາເຫັນ