ປກສ ແຂວງເຊກອງ ປະກາດດັດແກ້ຊັ້ນ ແລະ ເລື່ອນຊັ້ນໃຫ້ພະນັກງານ-ນັກຮົບ

ກອງບັນຊາການປ້ອງກັນຄວາມສະຫງົບ (ປກສ) ແຂວງເຊກອງ ໄດ້ຈັດພິທີປະກາດດັດແກ້ຊັ້ນ ແລະ ເລື່ອນຊັ້ນ ໃຫ້ພະນັກງານ-ນັກຮົບ ຂຶ້ນເມື່ອບໍ່ດົນມານີ້ທີ່ສະໂມສອນກອງບັນຊາການ ປກສ ແຂວງ ໂດຍການເຂົ້າຮ່ວມ ແລະ ປະດັບຊັ້ນຂອງ ສະຫາຍ ພັນເອກ ຄຳບານ ພົມມະນີວົງ  ກໍາມະການພັກແຂວງ ຫົວໜ້າກອງບັນຊາການ ປກສ ແຂວງ, ມີຄະນະພັກ-ຄະນະບັນຊາ ແລະ ພະນັກງານ-ນັກຮົບ ຜູ້ທີ່ໄດ້ຮັບການເລື່ອນຊັ້ນເຂົ້າຮ່ວມ.
ໃນພິທີ, ທ່ານ ພັນໂທ ພອນວິຈິດ ກີບເກສອນ ຮອງຫົວໜ້າຫ້ອງການເມືອງ ກອງບັນຊາການ ປກສ ແຂວງ ໄດ້ຜ່ານຂໍ້ຕົກລົງ ຂອງຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ວ່າດ້ວຍການດັດແກ້ຊັ້ນ ແລະ ເລື່ອນຊັ້ນໃຫ້ພົນຕໍາຫຼວດທົ່ວກອງບັນຊາການ ປກສ ແຂວງເຊກອງ ຄື: ດັດແກ້ຊັ້ນສິບໂທຂຶ້ນເປັນຊັ້ນຮ້ອຍຕີຈຳນວນ 2 ສະຫາ, ຍິງ 1 ສະຫາຍ; ດັດແກ້ຊັ້ນສິບໂທ ຂຶ້ນເປັນຊັ້ນວາທີຮ້ອຍຕີຈຳນວນ 4 ສະຫາຍຍິງ 1 ສະຫາຍ ແລະ ເລື່ອນຊັ້ນຮ້ອຍຕີ ຂຶ້ນເປັນຊັ້ນຮ້ອຍໂທຈຳນວນ 1 ສະຫາຍ, ເລື່ອນຊັ້ນວາທີ ຂຶ້ນເປັນຊັ້ນຮ້ອຍຕີຈຳນວນ 1 ສະຫາຍ, ເລື່ອນຊັ້ນສິບເອກ ຂຶ້ນເປັນຊັ້ນວາທີຮ້ອຍຕີຈຳນວນ 3 ສະຫາຍຍິງ 1 ສະຫາຍ, ເລື່ອນຊັ້ນສິບໂທ ຂຶ້ນເປັນຊັ້ນສິບເອກຈຳນວນ 2 ສະຫາຍ. ພ້ອມນີ້, ຍັງໄດ້ຜ່ານຂໍ້ຕົກລົງຂອງຫົວໜ້າກອງບັນຊາການ ປກສ ແຂວງ ວ່າດ້ວຍການແຕ່ງຕັ້ງຫົວໜ້າ ແລະ ຮອງພະແນກ, ຫົວໜ້າ-ຮອງຫົວໜ້າໜ່ວຍງານທີ່ຂຶ້ນກັບຫ້ອງການເມືອງ ແລະ ຫ້ອງຕຳຫຼວດ ກອງບັນຊາການ ປກສ ແຂວງ ເພື່ອສືບຕໍ່ນໍາພາ-ຊີ້ນໍາວຽກງານໃຫ້ມີຜົນສໍາເລັດຕາມແຜນການທີ່ວາງໄວ້.
ໂອກາດນີ້, ທ່ານ ພັອ ຄຳບານ ພົມມະນີວົງ ໄດ້ສະແດງຄວາມຍ້ອງຍໍຊົມເຊີຍຕໍ່ຜູ້ທີ່ໄດ້ຮັບການເລື່ອນຊັ້ນ ແລະ ຮຽກຮ້ອງໃຫ້ສືບຕໍ່ຮັກສາມູນເຊື້ອ ພ້ອມກັນສູ້ຊົນບຸກບືນ ແລະ ພັດທະນາຕົນເອງໃນການຍົກສູງຄວາມຮູ້ຄວາມສາມາດ ພ້ອມກັນແກ້ໄຂບັນຫາທີ່ຍັງຄົງຄ້າງ ແລະ ຮັດແໜ້ນຄວາມສາມັກຄີພາຍໃນ ແລະ ພາຍນອກໃຫ້ໜັກແໜ້ນ ເພື່ອເຮັດສຳເລັດໜ້າທີ່ການເມືອງຕາມການມອບໝາຍຂອງຂັ້ນເທິງໃຫ້ມີຜົນສໍາເລັດ.
ຂ່າວ-ພາບ: ສິບເອກ ກິທອງ ດອນກັນນ້ອຍ