 |
ທ່ານ ນາງ ບຸນຕາ ຢູ່ບ້ານເມືອງສີ ເມືອງແມດ ແຂວງວຽງຈັນ ໄດ້ໃຫ້ສໍາພາດຕໍ່ຜູ້ຂຽນທີ່ງານວາງສະແດງສິນຄ້າກະສິກໍາ ລາວ-ເກົາຫຼີ ທີ່ສູນການຄ້າລາວ-ໄອເຕັກເມື່ອບໍ່ດົນມານີ້ວ່າ: ກຸ່ມປູກເຫັດ ໄດ້ຮັບການຊ່ວຍເຫຼືອ ຈາກອົງການກອຍກາ ໃນປີ 2023 ດ້ວຍຈໍານວນເງິນ 12 ພັນໂດລາ, ເງິນຈໍານວນດັ່ງກ່າວນໍາໃຊ້ເຂົ້າໃນການຊື້ອຸປະກອນເຮືອນຮົ່ມ ກຽມການປູກເຫັດ ຈໍານວນ 15 ຫຼັງ, 1 ກຸ່ມມີ 15 ຄອບຄົວ, ຝຶກສອນໃຫ້ສະມາຊິກພາຍໃນກຸ່ມຈົນມີຄວາມຊໍານານ. ມາເຖິງປັດຈຸບັນ ສະມາຊິກພາຍໃນກຸ່ມ ແມ່ນມີຄວາມໝັ້ນຄົງ, ຜົນຜະລິດໄດ້ສົ່ງຂາຍຕະຫຼາດພາຍໃນເມືອງ-ແຂວງ, ກ່ອນເວລາຈໍາໜ່າຍ ແມ່ນໃຫ້ບັນດາສະມາຊິກນໍາເອົາຜົນຜະລິດທີ່ໄດ້ນັ້ນມາລວມກັນແລ້ວຂາຍ ໝາຍຄວາມວ່າຜົນຜະລິດໜ້ອຍ ຫຼື ຫຼາຍ ກໍແມ່ນໄດ້ຮັບເງິນຕາມຕົວຈິງ. ສະນັ້ນຈຶ່ງສາມາດສະຫຼຸບໄດ້ວ່າ ພາຍໃນ 1 ເດືອນ ຕໍ່ 1 ຄອບຄົວ, ລາຍຮັບປະມານ 5 - 7 ລ້ານກີບ, 1 ຄອບຄົວປູກເຫັດຈໍານວນ 3 ພັນເບົ້າ, ຂາຍອອກສະເລ່ຍ 1 ກິໂລ 40 ພັນກີບ,
 |
ວິທີກຽມການເຮັດເບົ້າເຫັດ: ນໍາເອົາຂີ້ເລື່ອຍ, ຂີ້ໄກ່ ປະສົມກັນ ແລ້ວຮ່າຍໃສ່ຖົງ ຈາກນັ້ນ ຈຶ່ງນໍາໄປໜຶ້ງ, ພາຍຫຼັງໜຶ້ງແລ້ວ ກໍເອົາລົງປະໄວ້ ຈົນກວ່າຈະເຢັນ ຈຶ່ງຢອດຫົວເຊື້ອ ແລະ ຫຼັງຈາກນັ້ນ ຈຶ່ງນໍາໄປອະນຸບານໄວ້ໃນເຮືອນຮົ່ມ 25 – 30 ວັນໄວ້ໃນໂຮງເຮືອນຮົ່ມ ແລະ ຈຶ່ງເປີດອອກ, ພາຍຫຼັງເປີດອອກ ແລະ ຫົດນໍ້າໄປເລື້ອຍໆ ຈົນເຖິງ 5 ວັນ ກໍສາມາດເກັບເຫັດອອກຂາຍໄດ້ເລີຍ, ເຫັດທີ່ປູກ ມີ: ເຫັດນາງຟ້າພູຖານ, ນາງລົມ, ຂອນຂາວ. ໃນໂອກາດນີ້, ທ່ານນາງ ບຸນຕາ ໃນນາມຕາງໜ້າກຸ່ມປູກເຫັດ ສະແດງຄວາມຄອບໃຈນໍາອົງການກອຍກາທີ່ໄດ້ໃຫ້ການສະໜັບສະໜູນປະຊາຊົນພາຍໃນບ້ານ ກໍຄືສະມາ ຊິກພາຍໃນກຸ່ມປູກເຫັດ ມີຊີວິດການເປັນຢູ່ທີ່ດີຂຶ້ນ, ເຖິງວ່າ ໂຄງການປູກເຫັດຈະສິ້ນສຸດລົງ ເດືອນ 9 ປີ 2025 ກໍຕາມ ຫົວໜ້າກຸ່ມຈະນໍາພາສະມາຊິິກພາຍໃນກຸ່ມສືບຕໍ່ວຽກງານປູກ-ຈໍາໜ່າຍໄປເລື້ອຍໆເພື່ອໃຫ້ມີຄວາມຍືນຍົງ, ຮັບປະກັນສ້າງລາຍຮັບໃຫ້ກັບຄອບຄົວຂອງກຸ່ມມີຊີວິດການເປັນຢູ່ທີ່ດີໝັ້ນຄົງເລື້ອຍໆ ແລະ ໄດ້ອວຍພອນໃຫ້ການນໍາຂອງອົງການກອຍກາ (ຜູ້ໃຫ້ທຶນ) ພ້ອມດ້ວຍວິຊາການ ໃນການຖ່າຍທອດຄວາມຮູ້-ວິຊາການປູກເຫັດ ຈົ່ງມີສຸຂະພາບແຂງແຮງ ປະສົບຜົນສໍາເລັດໃນໜ້າທີ່ວຽກງານຂອງພວກທ່ານ ແລະ ຢາກໃຫ້ພວກທ່ານ ຈົ່ງໄດ້ສືບຕໍ່ໃຫ້ການສະໜັບສະໜູນກຸ່ມປູກເຫັດ ບ້ານເມືອງສີ ພ້ອມທັງຈັດງານວາງສະ ແດງຜະລິດຕະພັນສິນຄ້າກະສິກໍາວ ລາວ-ເກົາຫຼີ ຕື່ມອີກ ເພາະວ່າ ສະມາຊິກພາຍໃນກຸ່ມ ຈຶ່ງຈະໄດ້ນໍາເອົາຜົນຜະລິດເຂົ້າມາຂາຍ ແລະ ທັງໄດ້ທ່ອງທ່ຽວ, ຖ້າທ່ານໃດຢາກສັ່ງ ຈອງເຫັດເປັນຈໍານວນຫຼາຍ ຫຼື ນໍາໄປຂາຍ ສາມາດຕິດຕໍ່ໄດ້ ໂທ: 020 77827959.
ຄໍາເຫັນ