ຢູ່ທີ່ຫ້ອງປະຊຸມພະແນກພະລັງງານ ແລະ ບໍ່ແຮ່ແຂວງໄຊຍະບູລີ ໂດຍການເປັນປະທານຂອງທ່ານ ຄໍາເພັດ ພົມມະລາດ ຫົວໜ້າພະແນກພະລັງງານ ແລະ ບໍ່ແຮ່ແຂວງ, ມີບັນດາຮອງຫົວໜ້າພະແນກການ ແລະ ເມືອງທີ່ກ່ຽວຂ້ອງ ພ້ອມດ້ວຍທີມງານ ບໍລິສັດ ໄຊຍະບູລີພາວເວີ ຈໍາກັດ ເຂົ້າຮ່ວມ.
ໃນກອງປະຊຸມ, ບັນດາຜູ້ເຂົ້າຮ່ວມ ໄດ້ຮັບຟັງການລາຍງານການຈັດຕັ້ງປະຕິບັດໃນການຄຸ້ມຄອງແລວສາຍສົ່ງໃນໄລຍະຜ່ານມາ, ບັນຫາສາຍສົ່ງໄຟຟ້າແຮງສູງ 500 kv, ບັນຫາຕົ້ນໄມ້ຢູ່ເສດຖະກິດທີ່ຍັງຕົກຄ້າງ, ຖຽງນາ, ຖຽງສວນ ຂອງຊາວບ້ານ ຢູ່ໃນແລວສາຍສົ່ງໄຟຟ້າ 500 kv, ບັນຫາການບຸກລຸກພື້ນທີ່ຢູ່ໃນແລວສາຍສົ່ງແຮງສູງ 500 kv, ບັນຫາເສັ້ນທາງເຂົ້າເຖິງເສົາໄຟຟ້າແຮງສູງ 500 kv. ພ້ອມນີ້ ຍັງໄດ້ຮັບຟັງການເຜີຍແຜ່ລະບຽບການຄຸ້ມຄອງແລວສະຫງວນສາຍສົ່ງໄຟຟ້າແຮງດັນສູງ, ມາດຕາທີ່ກ່ຽວຂ້ອງ ຂອງມາດຕະຖານເຕັກນິກໄຟຟ້າຢູ່ ສປປ ລາວ (ສະບັບປັບປຸງ 2018), ແຈ້ງການຂອງຫ້ອງການ ກະຊວງພະລັງງານ ແລະ ບໍ່ແຮ່ ສະບັບເລກທີ 1585/ພບ.ຫກ, ລົງວັນທີ 12 ມິຖຸນາ 2018 ກ່ຽວກັບຫ້າມການກໍ່ສ້າງສິ່ງປຸກສ້າງ, ຕັ້ງຖິ່ນຖານ, ບຸກລຸກ ຫຼື ທໍາການປູກຝັງ ແລະ ລ້ຽງສັດ ຢູ່ໃນຂອບເຂດແລວສະຫງວນສາຍສົ່ງໄຟຟ້າແຮງດັນສູງໂດຍບໍ່ໄດ້ຮັບອະນຸຍາດ, ແຈ້ງການຂອງເຈົ້າແຂວງ ສະບັບເລກທີ 082/ຈຂ.ຊຍ, ລົງວັນທີ 28 ມິຖຸນາ 2018 ກ່ຽວກັບການຈັດຕັ້ງປະຕິບັດລະບຽບການ ກ່ຽວກັບຄວາມປອດໄພໃນລະບົບສາຍສົ່ງໄຟຟ້າແຮງດັນສູງ. ຈາກນັ້ນ ປະທານ ແລະ ຜູ້ເຂົ້າຮ່ວມໄດ້ປະກອບຄໍາຄິດຄໍາເຫັນຢ່າງກົງໄປກົງມາ ຕໍ່ກັບບັນຫາດັ່ງກ່າວ ແລະ ພ້ອມກັນຊອກຫາວິທີການແກ້ໄຂໃຫ້ສໍາເລັດ.
ຈຸດປະສົງ ຂອງກອງປະຊຸມຄັ້ງນີ້, ກໍເພື່ອເປັນການຮ່ວມກັນແກ້ໄຂບັນຫາທີ່ຍັງຄົງຄ້າງ ຮັບປະກັນຄວາມປອດໄພຕໍ່ກັບຊີວິດ ຊັບສິນຂອງປະຊາຊົນ ແລະ ຄວາມປອດໄພໃນການດໍາເນີນງານ, ການໃຊ້ ແລະ ບໍາລຸງຮັກສາ ຂອງອຸປະກອນ ແລະ ສິ່ງປະກອບສ້າງດ້ານໄຟຟ້າ.
(ຂ່າວ: ມະໄລວັນ)
ຄໍາເຫັນ